ޤާނޫނުން ބާރު ލިބިގެން ހިންގޭ ޤައުމީ ޚިދުމަތުގެ ޕްރޮގްރާމަކުން 5000 ދިވެހީންނަށް ޢަސްކަރީ ޚިދުމަތާ ގުޅޭ ވަޒީފާތައް ދެއްވުމަށް ރައީސުލްޖުމްހޫރިއްޔާ ޑޮކްޓަރ މުޢިއްޒު ނިންމަވައިފި.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިނިންމެވުން ނިންމަވައި، މިކަން އިޢުލާން ކުރައްވާފައިވަނީ ނަޞްރުގެ ދުވަހުގެ މުނާސަބަތުގައި ނޮވެންބަރު 3 ވަނަ ދުވަހުގެ ރޭ ދަރުބާރުގޭގައި ބޭއްވެވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.

އެމަނިކުފާނުގެ ވާހަކަފުޅުގައި ވިދާޅުވީ، މިހާރު ޤާނޫނު އޮންނަ ގޮތުން ޢުމުރުން 16 އަހަރު ފުރި، ތަޢުލީމީ މަރުޙަލާ ނިންމާ ކުދީން، 18 އަހަރު ފުރެންދެން ވަޒީފާއަށް ކުރިމަތިލުމުގެ ޝަރުޠު ހަމަނުވާ ކަމަށެވެ. އަދި ފަހުގެ ހިސާބުތައް ދައްކާގޮތުން، ގުރޭޑު 10އެއް ނިންމާ ޖީސީއީ އޯލެވެލް ފުރިހަމަ ނުކުރާ 500އެއްހައި ދަރިވަރުން މިހާރު ކޮންމެ އަހަރަކުވެސް ތިބޭކަމަށާއި، ތަޢުލީމާއި ވަޒީފާއިން އެކަހެރިވެފައި ތިބޭ މިފަދަ ކުދީންނަކީ މަސްތުވާތަކެއްޗާއި، އެފަދަ ނޭދެވޭ ޢަމަލުތަކަށް ހުށައެޅުމުގެ ފުރުޞަތު އޮތް ކުދީންކަމުގައި ދެކެވަޑައިގަންނަވާ ކަމަށެވެ.

މިހެންކަމުން، 16 އަހަރުގެ ކުދީންނަށް، ޤާނޫނުން ބާރު ލިބިގެން ދިވެހި ފުލުހުންގެ ޚިދުމަތަށާއި، ދިވެހި ޢަސްކަރިއްޔާގެ ޚިދުމަތަށް ވަނުމަށް ފުރުޞަތުދީ، ތަމްރީނު ދެވިއްޖެނަމަ، އެކަން ވެގެން ދާނީ ޤައުމަށާއި މުޖުތަމަޢަށް، އަދި އެޢާއިލާތަކަށްވެސް ފައިދާ ވާނޭ ކަމަކަށް ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވިއެވެ.

މިމޭރުމުން ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވީ، މިކަން ޙާސިލް ކުރުމަށްޓަކައި އަންނަ އަހަރަށް ލަފާކުރާ ބަޖެޓުގައި މި މަސައްކަތަށް 400 މިލިއަން ރުފިޔާ ހިމަނުއްވާނޭ ކަމަށާއި، ކުރިއަށް ހުރި އަހަރުތަކުގައި މިކަމަށް ބޭނުންވާ ޢަދަދު ބަޖެޓަށް އިތުރުކުރައްވާނޭ ކަމުގައެވެ.

މިމަސައްކަތުގެ ނަތީޖާއަކަށް ވެގެންދާނީ، އެމަނިކުފާނުގެ ވެރިކަމުގެ މިދައުރަށް 5 އަހަރު ވެގެން ދާއިރު، 5000 މީހުން ޢަސްކަރިއްޔާއާ ގުޅޭ ޚިދުމަތްތަކަށް ނެރެވުންކަމުގައި ރައީސުލްޖުމްހޫރިއްޔާ ވިދާޅުވިއެވެ.

ޝަހީދުންގެ ދުވަހުގެ ރަސްމީ ޖަލްސާގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ދިވެހި ޢަސްކަރިއްޔާ ހަރުދަނާ ކުރުމަށް ކުރައްވަމުން ގެންދަވާ ގިނަގުނަ މަސައްކަތްތަކަށް އަލިއަޅުއްވާލައްވައިފައެވެ. އެގޮތުން މީހުން ބިނާ ކުރުމުގެ ދާއިރާގެ އިތުރުން، ވަޞީލަތް އިތުރުމާއި ރާއްޖޭގެ އެކި ކަންކޮޅުތަކުގައި ޢަސްކަރީ ޢިމާރާތްތައް ތަރައްޤީ ކުރުމުގެ މަސައްކަތްތައް ފަހަގަކުރެއްވިއެވެ.

1 ޖުމާދަލްއައްވަލް 1446

3 ނޮވެންބަރު 2024

އިތުރަށް ބެއްލެވުމަށް...