ދިވެހިބަސް ސަލާމަތް ކުރެވޭނީ އެކަމާމެދު ޢާއްމު ހޭލުންތެރިކަމެއް އުފެދިގެންކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ދިވެހިބަހުގެ އެކެޑެމީން އިންތިޒާމްކޮށްގެން ބޭއްވި އަދަބީ މުބާރާތްތަކުގެ ނަތީޖާ ފާޅުކުރުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުންނެވެ.
ވަޒީރު އާދަމް ނަޞީރު އިބްރާހީމް ވިދާޅުވީ ދިވެހިބަސް ސަލާމަތްކުރަންޖެހޭ ކަމުގެ ވާހަކަ ވަރަށް ގިނައިން އިވޭ ކަމަށެވެ. އަދި ދިވެހިބަހަށް އިސްކަންދިނުމުގެ ޤާނޫނެއް ހެދިފައި އޮތް ނަމަވެސް، ބަސް ސަލާމަތްކުރަންޖެހޭކަމަށް ބުނެ ގިނަ ބަޔަކު ވާހަކަދައްކަނީ ކީއްވެގެންކަމާމެދު ވިސްނަންޖެހޭކަމަށެވެ. އެމަނިކުފާނު ވިދާޅުވީ، ޤާނޫނެއް ހެދިފައި އޮތަސް ދިވެހިބަސް ސަލާމަތްކުރެވޭނީ ބަސް ސަލާމަތްކުރަންޖެހޭކަން ގިނަ ބަޔަކު ޤަބޫލުކޮށްގެން ކަމަށާއި، އަދި ބަސް ސަލާމަތްކުރަންޖެހޭކަން ޤަބޫލުކުރެވޭނީ ބަހުގެ މުހިންމުކަން އެނގިގެންކަމަށް ވަޒީރު ވިދާޅުވިއެވެ.
މީގެއިތުރުން ދިވެހި ޤައުމިއްޔަތުގައި ދިވެހިބަސް އަދާކުރާ ދައުރާއި ބަސް މުހިންމުވާ ސަބަބުތައް ގިނަ ބަޔަކަށް އެނގެންޖެހޭ ކަމަށް ވެސް ވަޒީރު ވިދާޅުވިއެވެ. އެސަބަބުތައް ދަނެގަނެވި އެނގިގެން ބަސް ސަލާމަތްކުރުމަށް ގިނަ ބަޔަކު މަސައްކަތްކޮށްފިނަމަ ބަސް ދެމެހެއްޓޭނެކަމަށް ވަޒީރު ވިދާޅުވިއެވެ. އެހެންކަމުން ގިނަ ބަޔަކު ދިވެހިބަހަށް ހޭލުންތެރިކުރުމުގެ މަޝްރޫޢެއް ކަމާގުޅޭ އިދާރާތަކާއި މުއައްސަސާތަކާ ގުޅިގެން ކުރިއަށްގެންދިޔުމަށް ރާއްވަވާފައިވާކަމަށް ވަޒީރު ވިދާޅުވިއެވެ.
“ރައީސް ޑރ. މުޢިއްޒު ފަށްޓަވާފައިވާ ދިވެހި ޤައުމިއްޔަތު އިޢާދަކުރުމުގެ ނިޒާމުގެ ތެރެއިން ގިނަ ބަޔަކަށް ބަހުގެ އަހަންމިއްޔަތުކަން އަންގައިދިނުމަށްޓަކައި ސަރުކާރުގެ ހުރިހާ މުއައްސަސާތަކާ ގުޅިގެން 5 އަހަރު ދުވަހަށް ރާވާލެވިފައިވާ މަޝްރޫޢެއް އެބައޮތް.” ވަޒީރު ވިދާޅުވިއެވެ.
ދިވެހިބަހުގެ އެކެޑަމީން ބޭއްވި އަދަބީ މުބާރާތްތަކުގެ ނަތީޖާ ފާޅުކުރުމުގެ ރަސްމިއްޔާތުގައި އެކެޑަމީން ބޭއްވި 4 މުބާރާތެއްގެ ނަތީޖާ ފާޅުކޮށް ވަނަތަކަށް އިނާމު ދީފައިވެއެވެ. އެއީ އަލްއުސްތާޛު އިބްރާހީމް ޝިހާބުގެ ހަނދާނީ ވާދައިގެ ތަށްޓަށް ބާއްވާ ވާހަކަދެއްކުމުގެ ޤައުމީ މުބާރާތާއި، ހުތްއަލި ދީދީގެ ހަނދާނީ ވާދައިގެ ތަށްޓަށް ބާއްވާ ޅެން ހެދުމުގެ ޤައުމީ މުބާރާތާއި، އަލްއުސްތާޛު މުޙައްމަދު ޖަމީލް ދީދީގެ ހަނދާނީ ވާދައިގެ ތަށްޓަށް ބާއްވާ މަޒުމޫނު ލިޔުމުގެ ޤައުމީ މުބާރާތާއި، އައްޝައިޚް މަލިން މޫސާ މާފަތްކަލޭގެފާނުގެ ހަނދާނީ ވާދައިގެ ތަށްޓަށް ބާއްވާ ކުރުވާހަކަ ލިޔުމުގެ ޤައުމީ މުބާރާތެވެ. މި މުބާރާތްތައް ކުރިއަށް ގެންގޮސްފައިވަނީ ދަރިވަރުންގެ އިތުރުން އަމިއްލަ ފަރާތްތަކަށް ވެސް ބައިވެރިވެވޭ ގޮތަށެވެ.
28 ޝަޢްބާން 1445
9 މާރިޗު 2024
