މޭޖަރ ޖެނެރަލް ރިޓަޔަރޑް މޫސާ ޢަލީ ޖަލީލަށް ނިޝާން ޢަސްކަރީގެ ވެރިކަމުގެ ޢިއްޒަތް އަރުއްވައިފި.

ދިވެހި ދައުލަތުގެ މަތިވެރި ޢިއްޒަތެއްކަމަށްވާ، ނިޝާން ޢަސްކަރީގެ ވެރިކަމުގެ ޢިއްޒަތް (ނ.އ.ވ)، މޭޖަރ ޖެނެރަލް (ރިޓަޔަރޑް) މޫސާ ޢަލީ ޖަލީލަށް އަރުއްވައިފިއެވެ. މި ޢިއްޒަތް މޭޖަރ ޖެނެރަލް ރިޓަޔަރޑް މޫސާ ޢަލީ ޖަލީލަށް އެރުއްވީ ނަޞްރުގެ ދުވަހުގެ ރަސްމީ ޖަލްސާގައި، ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.

މިޢިއްޒަތް މޭޖަރ ޖެނެރަލް (ރިޓަޔަރޑް) މޫސާ ޢަލީ ޖަލީލަށް އެރުއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވީ، ދިވެހި ޤައުމާއި ރައްޔިތުންގެ ސަލާމަތަށްޓަކައި ޢަސްކަރީ ގޮތުން ކުރެއްވި އަގުހުރި ޚިދުމަތްތަކާއި، ޤައުމުގެ އިސްތިޤްލާލާއި ސިޔާދަތު ރައްކާތެރިކޮށް ދެމެހެއްޓުމަށްޓަކައި ކޮށްދެއްވި އިޙްލާޞްތެރި މަސައްކަތްޕުޅުތަކުގެ އަގު ޤައުމީ ފެންވަރެއްގައި ވަޒަން ކުރެއްވުމުގެ ގޮތުންނެވެ. ވަކިން ޚާއްސަކޮށް، 1988 ވަނަ އަހަރުގެ 3 ނޮވެންބަރުގައި ރާއްޖެއަށް ކުރިމަތިވި ނުރައްކާތެރި ޢުދުވާނީ ޙަމަލާއާ ގުޅިގެން، ދިވެހި ޤައުމާއި ރައްޔިތުންގެ ދިފާޢުގައި ކުރެއްވި މަތިވެރި ޖިހާދުގެ އަގު ވަޒަންކުރެއްވުމުގެ ގޮތުންނެވެ.

މޭޖަރ ޖެނެރަލް (ރިޓަޔަރޑް) މޫސާ ޢަލީ ޖަލީލު ވަނީ ދިވެހި ޢަސްކަރިއްޔާގެ ޗީފް އޮފް ޑިފެންސް ފޯސްގެ މަޤާމުގެ އިތުރުން ދިފާޢީ ވަޒީރުކަންވެސް ކުރައްވާފައެވެ. އަދި ދިވެހިރާއްޖެއިން ޕާކިސްތާނަށް ކަނޑައަޅުއްވާ ސަދީރުކަމުގެ މަޤާމުވެސް އަދާކުރައްވާފައި ވެއެވެ.

1 ޖުމާދަލްއައްވަލް 1446

3 ނޮވެންބަރު 2024