މިއަހަރުގެ މިނިވަން ދުވަސް ފާހަގަކުރުން 1 ހަފްތާއަށް ކުރިއަށް ގެންދަވަން ރައީސުލްޖުމްހޫރިއްޔާ ނިންމަވައިފި.
ދިވެހިރާއްޖޭގެ 59 ވަނަ މިނިވަން ދުވަހުގެ އިޙްތިފާލްތައް އެއް ހަފްތާއަށް ދިގު ދެމިގެންދާ ގޮތަށް ބާއްވަވަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާކަން އިޢުލާން ކުރައްވައިފިއެވެ. މިކަން އިޢުލާން ކުރެއްވީ ދިވެހި ބާހާއި ސަގާފަތާއި ތަރިކައާ ބެހޭ ވުޒާރާއިން މިއަދު ދިވެހިރާއްޖޭގެ އަޑުގެ ސެނެކޯ މާލަމުގައި ބޭއްވި ނޫސްވެރީންގެ ބައްދަލުވުމުގައެވެ. ދިވެހިބަހާއި ސަގާފަތާއި ތަރިކައިގެ ވަޒީރު އާދަމް ނަޞީރު އިބްރާހީމް ބައިވެރިވެވަޑައިގެންނެވި މި ނޫސްވެރީންގެ ބައްދަލުވުމުގައި މިނިވަން ދުވަހުގެ ރަސްމީ އަދި ނުރަސްމީ ހަރަކާތްތަކުގެ ތަފްސީލުތައް ހިއްސާ ކުރެއްވެވިއެވެ.
މި ނޫސްވެރީންގެ ބައްދަލުވުމުގައި މިނިވަން ދުވަހުގެ ހަރަކާތްތަކާ ގުޅޭ ގޮތުން އިތުރަށް މަޢުލޫމާތު ދެއްވަމުން މި ވުޒާރާގެ ޑިރެކްޓަރ ޖެނެރަލް އަލްފާޟިލާ ޢާތިކާ އިބްރާހީމް ވިދާޅުވީ, ރައީސްގެ މި ނިންމެވުމާ އެއްގޮތަށް މި އަހަރުގެ މިނިވަން ދުވަހުގެ އިޙްތިފާލްތައް ޖުލައި މަހުގެ 24އިން 31އަށް ކުރިއަށް ދާނެ ކަމަށެވެ. މީގެ ތެރޭގައި ރަސްމީ ހަރަކާތްތަކާއި ނުރަސްމީ ހަރަކާތްތައް ވެސް ހިމެނޭ ކަމަށާއި, ހަފްތާއަކަށް މި ހަރަކާތްތައް ދިގު ދެމިގެން ދާނެ ކަމަށް އޭނާ ވިދާޅުވިއެވެ.
މިނިވަން ދުވަހުގެ ރަސްމީ ހަރަކާތްތަކުގެ ތެރޭގައި މިނިވަން ދުވަހުގެ ޚާއްސަ ޖަލްސާ ބޭއްވުމާއި, ދިދަ ނެގުމުގެ ރަސްމިއްޔާތާއި, ރައީސުލްޖުމްހޫރިއްޔާގެ ދެކަނބަލުން ބާއްވަވާ ރަސްމީ ބައްދަލުކޮށްލެއްވުން ހިމެނެއެވެ. ރަސްމީ ޖަލްސާގައި ދައުލަތަށް 35 އަހަރަށް ވުރެ ގިނަ ދުވަހު ޚިދުމަތް ކުރެއްވި ފަރާތްތަކަށް އިނާމު ދެއްވުން އޮންނާނެ ކަން ޢާތިކާ ފާހަގަކުރެއްވިއެވެ. އަދި ހަމަމިއާއެކު, ހެވިކަމާއި ކުޅިވަރު, ފުޅަނދުބުރު, ކާނިވާ, މިނިވަން ދުވަހުގެ ހާއްސަ ދުވުން, ސާގާފީ ޝޯ އާއި ކާބޯތަކެތީގެ މައުރަޒު, ކުޑަކުދީންގެ ހަވީރު, ފިޔަވަތީގައި ތިބޭ ކުދީންނަށް ހާއްސަ ހަވީރު, އިސްރަށްވެހީންގެ ބައްދަލުވުން އަދި ސްޓޭޖް ޝޯތައް ވެސް ކުރިއަށް ގެންދިޔުމަށް ނިންމާފައިވާކަމަށް ވިދާޅުވިއެވެ.
އެއް ހަފްތާގެ މުއްދަތަށް ދިގު ދެމިގެންދާ ގޮތަށް މިނިވަންދުވުގެ މުނާސަބަތު ރާއްޖޭގައި ފާހަގަކުރާ މިއީ ފުރަތަމަ ފަހަރެވެ. މިގޮތުން މިނިވަން ދުވަސް ފާހަގަކުރުން މުޅި ރާއްޖޭގައި ހުރިހާ އުމުރުފުރައެއް ހިމެނޭގޮތަށް ކުލަގަދަ ހަރަކާތްތަކެއް ކުރިއަށް ގެންދިއުމަށް ރާއްވަވައި, އެކަމުގެ އިންތިޒާމްތައް ގެންދަނީ ހަމަޖައްސަވަމުންނެވެ.
17 ޛުލްޤަޢިދާ 1445
25 މޭ 2024
