އެކި ދާއިރާތަކުން ދުނިޔެއަށް އަންނަ ކުރިއެރުންތައް ދެނެގެންތިބޭ ފޮތްތެރި ބަޔަކަށްވުން މިއަދު ވަރަށް މުހިންމުވެފައި ވާކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ. ވަޒީރު މިހެން ވިދާޅުވީ އެމް.އައި ކޮލެޖުގެ ދަސްވެނީންނަށް ސަނަދު ހަވާލުކުރުމަށް ބޭއްވި އެކޮލެޖުގެ 10 ވަނަ ދަސްވެނިވުމުގެ ޙަފުލާ ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ.
ވަޒީރުގެ ވާހަކަފުޅުގައި އަލިއަޅުއްވާލައްވައިފައި ވަނީ މައިގަނޑު ދެނުކުތާއަކަށެވެ. ފުރަތަމަ ނުކުތާއެއްގެ ގޮތުގައި ވަޒީރު ފާހަގަކުރައްވާފައި ވަނީ އަމިއްލަނަފްސަށްޓަކައި ޢިލްމު އުނގެނޭފަދައިން މުޖުތަމަޢަށްޓަކައި ޢިލްމު އުނގެނުމުގެ މުހިންމުކަމުގެ މައްޗަށް އަލިއަޅުއްވައިލެއްވިއެވެ. އެމަނިކުފާނު ވިދާޅުވީ ޢިލްމު އުނގެނެވުނީމައި މީހާއަށް އަންނަ ބަދަލަކީ ކަންކަމާމެދު ފުންކޮށްވިސްނަން ފެށުންކަމަށެވެ. އަދި ހާއްސަކޮށް މަތީތަޢުލީމުގެ މަރުޙަލާތަކުގައި ހަގީގަތުގައި ދަސްކުރާ ކަމަކީ މައްސަލަ ހޯދުމާއި މައްސަލައިގެ ހައްލު ހޯދުންކަމަށެވެ. އެކަންކުރަނީ ޢާއިލާއެއްގެ ނިސްބަތުގައިވިޔަސް ނުވަތަ މުޖްތަމަޢެއްގެ ނިސްބަތުގައިވިޔަސް ނުވަތަ ޤައުމެއްގެ ނިސްބަތުގައިވިޔަސް އަޅުގަނޑުމެންގެ ދިރިއުޅުން ފަހިކުރުމަށްކަމަށް އެމަނިކުފާނު ވިދާޅުވިއެވެ.
ދެވަނަ ކަމަކަށް ވަޒީރު ފާހަގަކުރެއްވީ ޢިލްމު އުނގެނުމާއެކު ޢިލްމާއެކު ދިރިއުޅުމާއި ޢިލްމުގެ ދުނިޔެއެއްގައި އުޅުމުގެ މުހިންމުކަމެވެ. ވަޒީރު ވިދާޅުވީ ޢިލްމުވެރީން އުފެދެނީ މިގޮތަށް ބައްޓަންވެފައި އޮންނަ ދިރިއުޅުމުގެ ނިޒާމެއްގެތެރެއިންކަމަށެވެ. ޢިލްމުވެރިއަކަށް ނުވަތަ ޢިލްމާ ހުނަރުގެ މީހަކަށް ވެވެނީ އުނގެނެވުނު އެއްޗެއްގެ މަތީގައި ދެމިހުރެގެންކަމަށް ވެސް އެމަނިކުފާނު ވިދާޅުވިއެވެ. ޢިލްމުގެ މަންފާ މުޖްތަމަޢަށް ނެރެދިނުމަށްޓަކައި އެކިދާއިރާތަކުން ކަމާބެހޭ ހޯދުންތައް ކިޔާ ޖާނަލްތައް ބަލާ ބަޔަކަށް އަޅުގަނޑުމެން ވާންޖެހޭކަމަށް ވެސް ވަޒީރު ވިދާޅުވިއެވެ.
“ރާއްޖޭގެ ތާރީޚަށް ބަލާއިރު ދިވެހީންގެ ޢިލްމުވެރިކަމާ ގުޅުވައިލެވޭ އެންމެ ފުރިހަމަ އެއް މިސާލަކީ، ދިވެހީންގެ އެެންމެ އުފެއްދުންތެރި އަދީބު ފަޟީލަތުއްޝައިޚް ޙުސައިން ޞަލާހުއްދީން އަމިއްލަފުޅަށް ތަޢުލީމު ހާސިލުކުރެއްވުމުގެ ބޭނުންފުޅުގައި އައްޑުއަށް ވަޑައިގަތީ ޢުމުރުފުޅުން އެންމެ 14 ވަރަކަށް އަހަރުފުޅުގައި. ޢުމުރުފުޅުން 18 އަހަރުފުޅުގައި ހުންނެވީ ދިވެހި ދައުލަތުގެ ބަންޑާރަނައިބަކަށް. އެމަނިކުފާނުގެ މުޅިޙަޔާތްޕުޅުގައި ތަފާތު އެތައް ރޮނގަކުން ތަޢުލީމު ހާސިލުކުރައްވައި ތަފާތު އެތައް ފޮތެއް ލިޔުއްވައި، ދިވެހީންނަށް އެޒަމާނަށް ހުރި އެތައް މައްސަލަތަކަކަށް ޚިޔާލުކުރައްވައި ފިކުރުފުޅު ހިންގަވައި އެމަނިކުފާނުގެ ޚިޔާލުފުޅުތައް ހިއްސާކުރައްވާފައިވޭ. އެމަނިކުފާނު ދެކެވަޑައިގަންނަވާ ގޮތް ގެނެސްދެއްވާފައިވޭ.” ވަޒީރު ވިދާޅުވިއެވެ.
ހުޅުމާލޭ ދެވަނަފިޔަވަހީގައި ހުންނަ ޞަލާޙުއްދީން ސްކޫލުގައި ބޭއްވި މި ޙަފުލާގައި ތަފާތު އެކިދާއިރާތަކުން އެމް.އައި ކޮލެޖުން މަތީތަޢުލީމު ހާސިލުކުރި 678 ދަރިވަރަކަށް ދަސްވެނިވިކަމުގެ ސަނަދު ހަވާލުކޮށްފައިވެއެވެ.
19 ޝަޢުބާން 1445
29 ފެބުރުވަރީ 2024
