އެންމެ ބޮޑު ހުރަހަކީ ފޮތް ޗާޕުކުރެވޭނެ ގޮތެއް ނެތުން
ދިވެހީންގެ އަސްލުތައް ޒަމާންތަކަށް ފޯރުވައި ދިނުމުގައި ލިޔުންތެރީންނަށް އޮތް އެންމެ ބޮޑު ހުރަހަކީ ފޮތް ޗާޕުކުރެވޭނެ ފަސޭހަ މަގެއް ނެތުން ކަމަށް ލިޔުންތެރިޔާ ޙަސަން ޒަރީރު ވިދާޅުވެއްޖެއެވެ. މިޔަރުގެ ދިރިއުޅުމާ ބެހޭ ގޮތުން އޭނާ އެކުލަވައިލެއްވި ‘ކަނޑުތަކުގެ ރަސްގެފާނުގެ ގޮތްފާޑު’ މި ފޮތް ނެރުމަށް މިއަދު ދިވެހިބަހާއި ސަގާފަތާއި ތަރިކައާ ބެހޭ ވުޒާރާގައި އޮތް ހަފުލާގައި ވާހަކަދައްކަވަމުން ޒަރީރު ވިދާޅުވީ ދިވެހިބަހުން ފޮތް ލިޔަނީ ވަރަށް މާޔޫސްކަމާއެކީގައިކަމަށެވެ. ނަމަވެސް ދިވެހީންގެ ތާރީޚާއި ސަގާފަތާއި ތަރިކައިގެ މުއްސަނދިކަމަށް ޓަކައި އެ ކަމުން ހިތްވަރު ލިބިގަންނަނީ ކަމަށް އޭނާ ވިދާޅުވިއެވެ.
ޒަރީރު މީގެ ކުރިން ލިޔުއްވި 435 ޞަފުޙާ ހިމެނޭ އިހުތިބީންގެ ދުލުން އެވޭލާ ދިރިއުޅުން މި ފޮތަކީ ވެސް ވަރަށް ގިނަ ދުވަސް ހޭދަކޮށްގެން ވަރަށް ބޮޑު ހޭދައެއް ކޮށްގެން އަމިއްލަ ޝައުޤުގައި ލިޔުއްވި ފޮތެއްކަމަށް އޭނާ ވިދާޅުވިއެވެ. ނަމަވެސް ޗާޕުކޮށްދޭނެ ފަރާތެއް ނެތުމުން އަމިއްލަ ޚަރަދުގައި 100 ފޮތް ޗާޕުކުރެއްވީއެވެ. އަދުގެ ސަރުކާރުން ދިވެހި ޤައުމިއްޔަތުު ދިރުވައި އާލާކުރުމަށް ކުރައްވާ މަސައްކަތްޕުޅުގައި މި ފަދަ ކަންކަމަށް ހައްލެއް ލިބިގެންދާނެ ކަމަށް އުންމީދުކުރައްވާކަމުގައި ޒަރީރު ވިދާޅުވިއެވެ.
