ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް އދ ގެ ވޯލްޑް ޓޫރިޒަމް އޮގަނައިޒޭޝަން ގެ ޓީމަކާ މިއަދު ބައްދަލުކުރައްވައިފިއެވެ. މި ބައްދަލުވުން އޮތީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާގައެވެ.

މި ބައްދަލުވުމަކީ ވޯލްޑް ޓޫރިޒަމް އޮގަނައިޒޭޝަން (UNWTO) ފަރާތުން “The Island” ގެ ނަމުގައި ތައްޔާރުކުރަމުންދާ ޑޮކިއުމެންޓްރީ ޝޯގައި ދިވެހިރާއްޖެ ތަމްސީލުކުރާނެ ގޮތްތަކާ ބެހޭގޮތުން މަޝްވަރާ ކުރުމަށް ބޭއްވި ބައްދަލުވުމެކެވެ.

ވަޒީރު އާދަމް ނަޞީރު ވަނީ ދިވެހިރާއްޖޭގައި ޑޮކިއުމެންޓްރީ ޝޯ ގެ ޝޫޓިންގ ތައް ކުރިއަށް ގެންދިއުމަށް ރަނގަޅު ސަރަޙައްދުތަކާއި ރަށްރަށުގެ ބައެއް މަޢުލޫމާތުތައް UNWTO ގެ ޓީމާ ހިއްސާކުރައްވައިފައެވެ. އަދި އެތަންތަން ހާއްސަވާ ތާރީޚީ ނުވަތަ ސަޤާފީ ސަބަބުތައްވެސް ވަޒީރު ވަނީ އެޓީމާ ހިއްސާ ކުރައްވައިފައެވެ.

ވޯލްޑް ޓޫރިޒަމް އޮގަނައިޒޭޝަން ގެ ޓީމާ އެކު ކުރެއްވި މަޝްވަރާތަކުގައި ވަޒީރު ވަނީ ފަތުވެރީންނަށް ރާއްޖޭގެ ރީތިކަމާއި މޫދާއި ދޮންވެލި ގޮނޑުދޮށްތަކުގެ އިތުރުން ދިވެހީންގެ ސަގާފަތާއި ތާރީޚާ ގުޅުންހުރި މައުލޫމާތު މި ޝޯ މެދުވެރިކޮށް ދައްކުވައިދޭން އެދިވަޑައިގަންނަވައިފައެވެ. އެގޮތުން ހދ. ކުޅުދުއްފުއްޓާއި ހއ. އުތީމާއި އއ.ތޮއްޑޫ އަދި މ.ދިއްގަރު ފަދަ ބައެއް ރަށްރަށާ ގުޅިފައިވާ ދިވެހީންގެ މަސައްކަތްތެރިކަމާއި، ކަނބުރުވެރިކަމާއި، ހެދުން އެޅުމުގެ ވައްޓަފާޅިއާއި، ކާބޯތަކެތި ތައްޔާރުކޮށް އުޅޭގޮތް ގެނެސްދިނުން ރަނގަޅުވާނެކަމަށް ފާހަގަކުރެއްވިއެވެ.

މީގެއިތުރުން، ރާއްޖޭގެ އެކި ހިސާބުތަކުގައި ވާހަކަދައްކައިއުޅޭ ތަފާތު ބަހުރުވަތަކުގެ މަޢުލޫމާތު ޑޮކިއުމެންޓްރީ ޝޯ ގެ ތެރެއިން ގެނެސްދިނުން ވެސް އެދެވިގެންވާކަމަށް ވަޒީރު ވިދާޅުވިއެވެ.

22 ޝަޢުބާން 1445

3 މާރިޗު 2024