ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިވެހި ޤައުމިއްޔަތާމެދު ގެންގުޅުއްވާ ތަޞައްވުރަކީ އެމްއެސްއާރްއޯ ފަދަ ޒުވާން ލޯތަކުން ރާއްޖޭގެ ތާރީޚަށް ބަލާނޭ ޒަމާނެއް އުފެއްދުން ކަމުގައި ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ.
ވަޒީރު މިފަދައިން ވިދާޅުވީ މޯލްޑިވްސް ސްޕޭސް ރިސާރޗް އޯގަނައިޒޭޝަން (އެމްއެސްއާރްއޯ) އާއެކު މިއަދު ބޭއްވުނު ބައްދަލުވުމުގައި ވާހަކަފުޅު ދައްކަވަމުންނެވެ.
މިވުޒާރައިގައި ބޭއްވުނު މި ބައްދަލުވުމަކީ އެމްއެސްއާރްއޯގެ އިސްނެގުމުގެމަތިން ފަލަކީ ޢިލްމު ހޯދާބަލައި ދިރާސާ ކުރުމަށް އެ އޯގަނައިޒޭޝަނުން ކުރަމުންގެންދާ މަސައްކަތްތަކުގެ ތެރެއިން، ރާއްޖޭގެ ނުޖޫމީ ތަރިކައާ ބެހޭ މަޢުލޫމާތު އެއްކުރުމަށް ކުރެވޭ މަސައްކަތްތަކުގައި މިވުޒާރާގެ އެހީ ހޯދެނޭ ދާއިރާތައް ދެެނެގަތުމާއި، ގުޅިގެން މަސައްކަތް ކުރިއަށް ގެންދާނެގޮތާ ބެހޭ ގޮތުން މަޝްވަރާ ކުރުމަށް ބޭއްވުނު ބައްދަލުވުމެކެވެ. މި ބައްދަލުވުމުގައި ވަޒީރުގެ އިތުރުން މިވުޒާރާގެ ސްޓޭޓް މިނިސްޓަރ މުޙައްމަދު ޝަހުރުއްޒިޔާދު ބައިވެރިވެވަޑައިގެންނެވިއެވެ.
އެމްއެސްއާރްއޯގެ ފަރާތުން މިދާއިރާގައި މިހާރު ކުރަމުން ގެންދާ މަސައްކަތްތަކުގެ ތެރެއިން އެންމެ ފާހަގަކޮށްލެވޭ އެއްމަސައްކަތެއްކަމަށް އެ އޯގަނައިޒޭޝަނުން ފާހަގަކުރެއްވީ، އިހުޒަމާނުއްސުރެ ރާއްޖޭގައި އޮތް ފަލަކީ ޢިލްމުގެ މަޢުލޫމާތު އެއްކުރުމެވެ. އެގޮތުން ނަކަތްތައް ދެނެގަތުމާއި ނަކަތްތަކާއި ރާއްސާ ހުރި ގުޅުން ދެނެގަތުމުގައި އިހުގެ ދިވެހީންގެ ޢިލްމު ތަރައްޤީވެފައި އޮތް މިންވަރާއި ސަމުގާގެ މާހިރުންގެ ތަޖުރިބާތަކާއި، ފިލާއެޅުން ފަދަ ކަންކަން ރާއްޖޭގެ ސަގާފަތުގައި އޮތްނެތް ގޮތް ދިރާސާކުރުން ވެސް ހިމެނޭކަން ފާހަގަކުރެއްވިއެވެ. އަދި މިސަގާފަތާއި ޢިލްމު ބޭނުން ކުރެވުނު މިންވަރާއި އެކަންކަމާ އޭރުގެ ދިވެހީންގެ އުޅުމާއި ވިސްނުން ގުޅި ލާމެހިފައިވީ މިންވަރު ދެނެގަތުންވެސް ހިމެނެއެވެ. މީގެ އިތުރުން އިހުގެ މިސަގާފަތްތަކުން މިއަދުގެ ޒަމާނީ ދިރާސާތަކުގައި އެޢިލްމު ބޭނުން ކުރެވޭނެ ދާއިރާތަކަކީ ކޮބައިކަން ދެނެގަތުމަކީ މި މަސައްކަތްތަކުގެ މުހިންމު މަގުސަދެއްކަމުގައި އެ އޯގަނައިޒޭޝަނުން ފާހަގަކުރެއްވިއެވެ.
ދިވެހިރާއްޖޭގެ ސަގާފަތާއި ތަރިކައާ ގުޅުން ހުރި މިފަދަ މަސައްކަތެއްގައި ދިވެހި ޒުވާނުން އިސްނަގައި، ނުޖޫމީ ތަރިކަ ހޯދާބަލައި، ރައްކާކުރުމަށް ކުރެވޭ މިމަސައްކަތަކީ ބޭނުންތެރި މަސައްކަތެއްކަން ވަޒީރު ފާހަގަކުރެއްވިއެވެ. އަދި މިމަސައްކަތްތަކަކީ ރައީސް ޑރ. މުޙައްމަދު މުޢިއްޒު ދިވެހި ޤައުމިއްޔަތު އިއާދަކުރެއްވުމަށް ކުރައްވާ މަސައްކަތްޕުޅުގެ މުހިންމު ބަހާއެއްކަމަށް ދެކެވަޑައިގަންނަވާ ކަމަށާއި މިކަމުގައި މިވުޒާރާއިން ފަންނީ ގޮތުންނާއި ޢިލްމީ ގޮތުން ދެއްވެން އޮތް ހުރިހާ އެއްބާރުލެއްވުމެއް ދެއްވާނެކަމުގެ ޔަޤީންކަން ދެއްވިއެވެ.
ވަޒީރު އިތުރަށް ފާހަގަކުރެއްވި ގޮތުގައި، ތަރިތަކުގެ ޢިލްމުގައްޔާއި، ގަސްގަހާގެއްސާއި ކަނޑުގެ އަޑިއަށް ނަޒަރު ހިންގިޔަސް، އެތަންތަނުން 4000 އަހަރުވީ ދިވެހި ތާރީޚީ މުއްސަނދި ތަރިކަތައް ފެންނަން ހުންނާނެއެވެ. އެކަންކަން ދެނެގަތުމަށް ބޭނުންވަނީ ޝައުޤުވެރި ލޯތަކެއްކަމަށް ވެސް ވަޒީރު ވިދާޅުވިއެވެ.
މި ބައްދަލުވުމުގައި ބައިވެރިވެވަޑައިގެން އެމްއެސްއާރްއޯގެ ޑިރެކްޓަރު ރައުޝަން ޢަލީ ފިރާޤް ވިދާޅުވީ، މި މަސައްކަތުގެ ތެރެއިން ހޯދާ ހޯދުންތައް ރައްކާކޮށް، މިޖީލާއި އަންނަން އޮތް ޖީލަށް ފޯރުކޮށްދޭން ބޭނުންވާ ކަމަށެވެ. އެގޮތުން “ސިންކް 2024” ގެ ނަމުގައި މި މަހުގެ 23 އިން 25 އަށް ކްރޮސްރޯޑްސްގައި މަހާސިންތާއެއް ބޭއްވުމުގެ ތައްޔާރީތައް ވަމުންދާކަމަށް ވިދާޅުވިއެވެ. އެމްއެސްއާރްއޯ ގެ އެއް ތަސައްވުރަކީ ދިވެހިރާއްޖޭގެ ފަލަކީ ޢިލްމުގެ ދާއިރާ މުޅި ދުނިޔޭގެ ފެންވަރުގައި ތަމްސީލުކުރެވި، އިތުރަށް ކުރިއެރުވުމަށް މަސައްކަތް ކުރުމެވެ. މި ތަސައްވުރުގެ ތެރެއިން އިހުގެ ދިވެހީންގެ ދިރިއުޅުމުގެ އާދަކާދަތަކާ ތަރިތަކާ ގުޅިފައިވާ މިންވަރު މި މަހާސިންތާގައި ހިއްސާކުރެވޭނެ ކަމަށް ރައުޝަން ވިދާޅުވިއެވެ.
ރައުޝަން އިތުރަށް ވިދާޅުވީ، އެމްއެސްއާރްއޯ ގެ ތަސައްވުރުގެ ދިރުމަކީ ދިވެހީންނާއި ތަރިތަކާ ދެމެދު ޒަމާނުއްސުރެ އޮންނަ ގުޅުން ކަމުގައެވެ. އަދި އެމްއެސްއާރްއޯއިން ކުރާ ކޮންމެ މަސައްކަތެއްގެ އަމާޒަކީ މި ހާއްސަ ގުޅުން ދެނެގަނެ، މުޅި ދުނިޔެއަށް އެ މަޢުލޫމާތުތައް ހިއްސާކޮށް ބައިނަލްއަޤްވާމީ ނުޖޫމީ ޢިލްމުގެ ފަންނުގައި ދިވެހީންނަށް ހާއްސަ ނަމެއް ގާއިމުކުރުން ކަމަށެވެ.
18 ރަމަޟާން 1445
28 މާރިޗު 2024
