އަލްއުސްތާޛު އިބްރާހީމް ޝިހާބު
އަލްއުސްތާޛު އިބްރާހީމް ޝިހާބު ލިޔުއްވާފައިވާ މަޒުމޫނުތަކަކީ، ޢިބުރަތްތެރި، ފަށުވި ޢިބާރާތްތަކަކުން ލިޔުއްވާފައިވާ މަޒުމޫނުތަކެއް ކަމުގައި ދަންނަވަންޖެހެއެވެ. ބަހުގެ ހަމަތަކާއި އުޞޫލުތައް އޭގެ އެންމެ މަތީ ދަރަޖައަށް ހިފަހައްޓަވާފައިވެއެވެ. އެހިނދަކަށް ބޭނުންފުޅު ކޮންމެ މައުޟޫޢަކީ، ފަސޭހަކަމާއެކު އެމަނިކުފާނުގެ ގަލަން ހިނގާ މައުޟޫޢެއް ކަމުގައި އޮންނަނީ ވެފައެވެ. އަލްއުސްތާޛު އިބްރާހީމް ޝިހާބަކީ، މޮޅު ޝާޢިރެއްވެސްމެއެވެ. ރާއްޖޭގައި ފާހަގަކުރެވޭ ޅެންވެރިންގެ ދުވަސް ފާހަގަކުރެވެމުން އަންނަނީ، އެމަނިކުފާނުގެ ނަންފުޅަށް ނިސްބަތްކޮށެވެ. އަލްއުސްތާޛު އިބްރާހީމް ޝިހާބު ދެމިއޮތުމުގެ ޢާލަމަށް ދަތުރުކުރެއްވި ދުވަހާ ދިމާވާގޮތަށް، ކޮންމެ ޖެނުއަރީ މަހެއްގެ ފަނަރަވަނަ ދުވަހުއެވެ. ޅެންވެރިކަމުގެ ދުނިޔޭގައި އެމަނިކުފާނު މަޝްހޫރު ވެވަޑައިގެންފައިވަނީ “ގުލްފާމް” ގެ ނަމުންނެވެ. ވާހަކަދެއްކުންތެރިކަމުގެ ރޮނގުން ބަލާއިރު އެއީ ޤައުމުގެ “ދޫ” ކަމުގައި ބުނެވިދާނެއެވެ. އެހާވެސް ފަސޭހަފުޅުކަމާއެކު ފަށުވި ޢިބާރާތުން މީހުންގެ ސަމާލުކަން އަތުލައްވަމުން ތަޤުރީރުތައް ދެއްވާފައިވެއެވެ.