“ވެރިކަމަކީ ލިބޭ މާބޮޑު މޮޅެއް ނޫން، ވެރިކަން ކުރާ މީހާއަށް ލިބޭ މުދާ ގަނޑެއް ނޫން. އެއީ ބޮޑު ޒިންމާއެއް، މަސްއޫލިއްޔަތެއް އަދި އަމާނާތެއް.” -ރައީސުލްޖުމްހޫއްރިއްޔާ ޑރ މުޙައްމަދު މުޢިއްޒު

ވެރިކަމަކީ ލިބޭ މާބޮޑު މޮޅެއް ނޫންކަމަށާއި އެއީ ވެރިކަން ކުރާ މީހާއަށް ލިބޭ މުދާ ގަނޑެއް ނޫންކަމަށާއި، އެއީ ބޮޑު ޒިންމާއެއް ކަމަށާއި އެއީ މަސްއޫލިއްޔަތެއް އަދި އަމާނާތެއް ކަމުގައި ރައީސުލްޖުމްހޫއްރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިފަދައިން ވިދާޅުވީ ދިވެހިރާއްޖޭގެ 56 ވަނަ ޖުމްހޫރީ ދުވަހުގެ މުނާސަބާ ފާހަގަކުރުމަށް އާދިއްތަ ދުވަހުގެ ރޭ ދަރުބާރު ގޭގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާގެ ވާހަކަފުޅުގައި އިތުރަށް ވިދާޅުވީ އެމަނިކުފާނު މީގެ އެއް އަހަރު ކުރީން ވެރިކަމުގެ ހުވައި ކުރެއްވި ދުވަހު ވެވަޑައިގެންނެވި ވަޢުދުފުޅާއި އެއްގޮތަށް ރައްޔިތުން ޙަވާލުކުރެއްވި ޒިންމާއާއި މަސްއޫލިއްޔަތު އަދާކުރެއްވުމުގައި ސާބިތުވެވަޑައިގެން ހުންނެވި ކަމަށެވެ. އަދި އެމަނިކުފާނު ވެރިކަން ކުރެއްވުމުގައި ދެމިހުންނަވާނީ “ރައްޔިތުންގެ ފަޅީގައި” ކަމުގައި ވިދާޅުވިއެވެ. އަދި ރައްޔިތުންގެ ފަޅީގައި ހުންވައިގެން ވެރިކަން ކުރެއްވުމުގައި ފާއިތުވި އެއް އަހަރު ދުވަހު މަސައްކަތްތައް ބައްޓަންކުރެއްވި ގޮތުގެ މައްޗަށް ވަނީ ބައްލަވައިލައްވާފައެވެ.

އެމަނިކުފާނު ވިދާޅުވީ ވެރިކަން ކުރެއްވުމުގައި ބައްލަވާނީ ޖުމްހޫރީ ނިޒާމުގެ ޙަޤީޤީ ރައްޔިތުންގެ ބާރުގެ ދަށުން، ދިވެހީންގެ  އަމިއްލަ މަސްލަހަތު އިސްކޮށް، ދިވެހީންނަށް އެންމެ ފައިދާ ހުރި ގޮތަށް ކަމަށެވެ. އަދި މީގެ 51 ހަފްތާ ކުރިން ވަޢުދުވެވަޑައިގެންނެވި ފަދައިން، ފިކުރީ ގޮތުންނާއި އަޚްލާޤީ ގޮތުން ރައްޔިތުން ތަރައްޤީ ކުރެއްވުމުގައި ދެމިހުންނަވާނޭކަމުގެ ޔަޤީންކަން އެމަނިކުފާނު ވަނީ ތަކުރާރު ކުރައްވާފައެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، އެމަނިކުފާނު ރައްޔިތުންގެ ފަޅީގައި ހުންނަވައިގެން ކުރައްވަމުން ގެންދަވާ މި މަސައްކަތްޕުޅުތަކުގައި ރައްޔިތުންގެ ސާބިތުކަމާއި ފުރިހަމަ އެއްބާރުލުން ލިބިވަޑައިގަންނަވާނޭކަމުގައި ޤަބޫލުފުޅުކުރައްވާ ކަމުގައެވެ. އަދި ރައްޔިތުންނާ ގުޅިގެން ކުރެވޭ މި މަސައްކަތްތަކުގެ ސަބަބުން މުޖުތަމަޢުގައި ހުރި ނޭދެވޭ މައްސަލަތަކަށް ޙައްލު ލިބޭނޭކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސްގެ ވާހަކަފުޅުގައި ވަނީ ކުރިއަށް އޮތް 20 އަހަރަށް އެކުލަވައިލައި ޤައުމީ ތަރައްޤީގެ މާސްޓަރ ޕްލޭނަށް އަލިއަޅުއްވައިލައްވައި، މި ޕްލޭން ހެއްދެވުމުގައި ރާއްޖޭގެ ހުރިހާ ރަށެއްގެ ބަސް ހޯއްދަވާނޭ ކަމުގައި ވިދާޅުވެ، މި މަސައްކަތަށް ޤާނޫނީ ބާރު ހޯއްދަވާނޭ ކަމުގައި ވިދާޅުވެފައެވެ.

8 ޖުމާދަލްއޫލާ 1446

10 ނޮވެންބަރު 2024