މާޅޮސްމަޑުލު އުތުރުބުރީ އުނގޫފާރު ކައުންސިލްގެ ރައީސާ ބައްދަލު ކުރައްވައި އަޟްޙާ ޢީދުގެ ހަރަކާތްތަކާއި ތައްޔާރީތަކާ ބެހޭ ގޮތުން މަޝްވަރާ ކުރައްވައިފި.
ޤައުމީ ފެންވަރުގައި އަޟްޙާ ޢީދު ފާހަގަކުރުމަށް ސަރުކާރުން ކަނޑައަޅުއްވާފައިވާ ތިން ރަށުގެ ތެރޭގައި ހިމެނޭ މާޅޮސްމަޑުލު އުތުރުބުރީ އުނގޫފާރުގައި ޢީދު ފާހަގަކުރުމުގެ ތައްޔާރީތައް ކުރިއަށް ދާ ގޮތާ ބެހޭ ގޮތުން އެރަށު ކައުންސިލްގެ ރައީސާ ބަހާ ބެހޭ ވަޒީރު އާދަމް ނަޞީރު އިބްރާހީމް މަޝްވަރާ ކުރައްވައިފިއެވެ. މި މަޝްވަރާ ބައްދަލުކުރެއްވުން އޮތީ މިއަދު ދިވެހިބަހާއި ސަގާފަތާއި ތަރިކައާ ބެހޭ ވުޒާރާގައެވެ.
ވަޒީރުގެ އަރިހުގައި މި ބައްދަލުކުރެއްވުމުގައި ވުޒާރާގެ ފަރާތުން ބައިވެރިވެވަޑައިގެންނެވީ ޢީދަށް ޚާއްސަ ޓީމުގެ އިސްވެރީންނެވެ.
ކައުންސިލްގެ ފަރާތުން ބައިވެރިވެވެޑައިގެންނެނީ ކައުންސިލްގެ ރައީސް އަލްފާޟިލް ޢަބްދުއްﷲ ރަޝީދާއި، ޢީދު ކޮމިޓީގެ ޗެއަރ އަލްފާޟިލް ޢަލީ އައިމަންގެ އިތުރުން އެސިސްޓެންޓް ކައުންސިލް އެގްޒެކެޓިވް ޠާހާ ޙަނީފެވެ.
މި ބައްދަލުކުރެއްވުން ފަށްޓަވަމުން ވަޒީރު ވަނީ އުނގޫފާރަށް ނިސްބަތްވާ ދިވެއްސެއްގެ ކުއްލި މަރުގެ ހިތާމަވެރި ޚަބަރު ލިބިވަޑައިގެންފާވާތީ، މި ދަނޑިވަޅުގައި އެ ޢާއިލާއަށް ވަޒީރުގެ އިޚްލާސްތެރި ތަޢުޒިޔާ ފޮނުއްވާފައެވެ.
ޤައުމީ ފެންވަރުގައި ޢީދު ފާހަގަކުރަން ކަނޑައެޅުނު ތިން ރަށުގައި ވެސް ޢީދުގެ ތައްޔާރީތައް ވިލަރެސް ކުރެއްވުމަށް ވުޒާރާއިން އިންސްޕެކްޝަން ޓީމުތައް މިދިޔަ ހަފްތާ ބަންދުގައި ފޮނުއްވާފައިވާކަން ވަޒީރު ވަނީ ފާހަގަކުރައްވާފައެވެ. އެގޮތުން އުނގޫފާރުގެ ތައްޔާރީތައް ވެސް ވަރަށް ފުރިހަމަކަމަށް ވުޒާރާގެ ޓީމުން ފާހަގަކޮށްފައިވާ ކަމަށާއި، ޢީދަށް ވަމުންދާ ތައްޔާރީތަކަށް ވުޒާރާގެ ފުރިހަމަ އެއްބާރުލުން ކުރިއަށް އޮތްތަނުގައި ވެސް ލިބޭނޭ ކަމުގެ ޔަޤީންކަން ވަޒީރު ދެއްވިއެވެ. އަދި ރާވާފައިވާ ހަރަކާތްތަކުގައި ވީހާވެސް ބޮޑަށް ދިވެހި ސަގާފަތް ރަމްޒުވާ ގޮތަށް ރޭއްވެވުމަށް ވަޒީރު އެދިވަޑައިގެންނެވިއެވެ.
މި ބައްދަލުކުރެއްވުމުގައި ޢީދަށް ރަށުތެރެ ޒީނަތްތެރިކުރުމާ ބެހޭ ގޮތުން ކަމާ ގުޅުން ހުރި އިދާރާތަކާ އެކު މަސައްކަތް ކުރިއަށް ދާގޮތުގެ އަދާހަމަ ކައުންސިލްގެ ރައީސް ހިއްސާކުރެއްވިއެވެ. މިގޮތުން ހުރިހާ މަގެއްގެ މަގު ފާރުތަކުގައި ކުލަ ލުމާއި ބޮޑެތި ހުރިހާ މަގުތަކަށް ވާވަރަށް ދިދަ އާއި ބޮކިފަތި ހޯދުމުގެ މަސައްކަތް ކުރެވެމުންދާ ކަމުގައި ކައުންސިލުން ފާހަގަކުރެއްވިއެވެ. އަދި ރަށުގެ މަލަމަތި ޒީނަތްތެރިކުރުމަށް ގިޑިގެތައް ހަމަކުރުމަށް މަސައްކަތް ކުރެވެމުންދާ ކަމުގައި ވެސް ކައުންސިލް ރައީސް ފާހަގަކުރެއްވިއެވެ.
ޢީދުގައި އުނގޫފާރުގައި ކުރިއަށްގެންދާ ބޮޑެތި ހުރިހާ ހަރަކާތްތައް ބޭއްވުމަށް ހަމަޖެހިފައި ވަނީ އެރަށުގެ ޒުވާނުންގެ މަރުކަޒު ސަރަޙައްދުގައިކަމުން، އެސަރަޙައްދުގައި ހުރި ދަތިތައް ހައްލުކޮށް، ޢީދަށް އެ މަރުކަޒު ތައްޔާރުކުރުމަށް ކަމާ ގުޅުން ހުރި މުއައްސަސާތަކާ އެކު މަޝްވަރާ ކުރައްވަމުން ގެންދަވާ ކަމުގައި ވެސް އުނގޫފާރު ކައުންސިލްގެ ރައީސް ވަނީ ފާހަގަކުރައްވާފައެވެ.
ރަށުގެ ރައްޔިތުންނަށް މިއީ ވަރަށް ޚާއްސަ މުނާސަބެއްކަމުގައި ކައުންސިލުން ފާހަގަކުރެވިއެވެ. އެގޮތުން، މިއަހަރުގެ އަޟްޙާ ޢީދު އެރަށުގެ ރައްޔިތުންނާ އެކު ފާހަގަކުރެއްވުމަށް ދިވެހިރާއްޖޭގެ ރައީސުލްޖުމްހޫރިއްޔާ އެރަށަށް ވަޑައިގެންނެވުމަށް ކައުންސިލާއި ރަށުގެ ރައްޔިތުންގެ ފަރާތުން ދަޢުވަތު އަރުވާފައިވާކަން ވެސް ފާހަގަކުރެއްވިއެވެ.
މިއީ ރ. އުނގޫފާރުގައި ޤައުމީ ފެންވަރެއްގައި އަޟްޙާ ޢީދު ފާހަގަކުރާ ފުރަތަމަ ފަހަރެވެ.
26 ޛުލްޤަޢިދާ 1445
3 ޖޫން 2024
