1445 ވަނަ އަހަރުގެ ރަމަޟާންމަހާ ދިމާކޮށް ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ކުރިއަށް ގެންދާ ޚާއްޞަ ހަރަކާތްތަކުގެ ތެރޭގައި ހިމެނޭ “ރޯދަ ސާފު” ޕްރޮގްރާމުގެ ދަށުން މާލެ ސަރަހައްދު ސާފުކުރުން މިއަދު ކުރިއަށް ގެންގޮސްފިއެވެ. މާލެ ސަރަހައްދު ސާފުކުރުމުގެ މި ހަރަކާތް ކުރިއަށް ގެންގޮސްފައި ވަނީ މާލެއާއި ހުޅުމާލެއާއި ވިލިމާލޭގައެވެ.
މާލެއާއި ހުޅުމާލެއާއި ވިލިމާލެ 7 ބަޔަކަށް ބަހާލުމަށްފަހު މި ހަރަކާތުގައި ބައިވެރިވި މުއައްސަސާތައް ޓީމުތަކަކަށް ބަލާލައި، އެކި ޓީމުތަކުން އެކި ބައިތައް ސާފުކުރާގޮތަށް ކުރިއަށް ގެންދިޔަ މި ހަރަކާތުގައި ހުޅުމާލެ ސާފު ކުރުމުގެ ހަރަކާތް ކުރިއަށް ގެންދިޔައީއެޗްޑީސީ އާއި ވެމްކޯ ގުޅިގެންނެވެ. “ރޯދަ ސާފު” ހަރަކާތުގައި މި ވުޒާރާގެ އިތުރުން ގިނަ މުއައްސަސާތަކަކުން ބައިވެރިވެފައިވެއެވެ.
މިއަދު ހެނދުނު 6 ން މެންދުރު 12 ށް މި ހަރަކާތް ކުރިއަށް ގެންދިޔައިރު،”ސާފު ރޯދަ” ހަރަކާތް ފެށުމުގެ ގޮތުން މިއަދު ހެނދުނު މާލޭ ހެދިގޮނޑުދޮށް ސަރަހައްދުގައި ވަނީ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމާއި މި ވުޒާރާގެ އިސްވެރީންނާއި މުވައްޒަފުންގެ އިތުރުން ސާފުކުރުމުގެ ހަރާތުގައި ބައިވެރިވި މުއައްސަސާތަކުގެ މުވައްޒަފުން ވެސް ވަނީ ބައިވެރިވެފައެވެ.
ރަސްމިއްޔާތުގައި “ރޯދަ ސާފު” ހަރަކާތުގެ ބައިވެރިންނާ މުޚާޠަބުކުރައްވައި ދެއްކެވި ވާހަކަފުޅުގައި ވަޒީރު އާދަމް ނަޞީރު އިބްރާހީމް ވަނީ ސާފުތާހިރުކަމާ ދިވެހީންގެ ސަގާފަތާ ގުޅިފައިވާ މިންވަރުގެ މައްޗަށް އަލިއަޅުއްވާލައްވައިފައެވެ. އަދި އެމަނިކުފާނު ވަނީ ހަރަކާތުގައި ބައިވެރިވި އެންމެހާ މުއައްސަސާތަކަށް ޝުކުރު އަދާކުރައްވައިފައެވެ. އަދި އައްޝައިޚް އިންޠިޠާޢް ޢައްބާސް ވަނީ ހަރަކާތުގެ ބައިވެރިންނާ މުޚާޠަބުކުރައްވައި އިސްލާމްދީނުގައި ސާފުތާހިރުކަމަށް ދެއްވާފައިވާ އަހައްމިއްޔަތުކަމުގެ މައްޗަށް އަލިއަޅުއްވާލައްވައި ވާހަކަފުޅުދައްކަވާފައެވެ.
މި އަހަރުގެ ރޯދައާ ދިމާކޮށް ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ކުރިއަށްގެންދާ “ރޯދަ ސާފު” ހަރަކާތަކީ ޒަމާނުއްސުރެ ދިވެހީން ދަމަހައްޓަމުންއައި ސާފުތާހިރުކަމުގެ ރީތި އާދަތަކަށް ހިތްވަރުދީ، ރައްކާތެރިކަމާ ޒިންމާދާރުކަމާއެކު ކުނި އުކާލުމުގެ އާދަ އަށަގެންނެވުމުގެ މަގުސަދުގައި ކުރިއަށް ގެންދާ ހަރަކާތެކެވެ. މި އަހަރުގެ މި ހަރަކާތުގައި ގިނަ އަދަދެއްގެ ރަށު ކައުންސިލުތަކުން ވެސް ވަނީ ބައިވެރިވެ،ރަށްރަށުގައި ސާފު ކުރުމުގެ ހަރަކާތްތައް ކުރިއަށް ގެންގޮސްފައެވެ. “ރޯދަ ސާފު” ހަރަކާތަކީ ކުރިއަށް އޮތް ތަނުގައި ކޮންމެ ރޯދަ މަހަކާ ދިމާކޮށް ސިލްސިލާކޮށް ކުރިއަށް ގެންދިއުމަށް ހަމަޖެހިފައިވާ ހަރަކާތެކެވެ.
28 ޝަޢްބާން 1445
9 މާރިޗު 2024
