ދިވެހިބަހާއި ސަގާފަތާއި ތަރިކައާ ބެހޭ ވުޒާރާއީ ރާއްޖެ އޮންލައިންއާ ދެމެދު ފަހުމުނާމާއެއްގައި މިއަދު ސޮއިކޮށްފިއެވެ. މި ފަހުމުނާމާއަކީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ މުވާސަލާތީ ކަންކަން ހަރުދަނާކޮށް، މި ވުޒާރާއިން ކުރިއަށްގެންދާ ހަރަކާތްތަކާއި ރަސްމިއްޔާތުތަކަށް ބޭނުންވާ ފަންނީ އެހީތެރިކަން ފޯރުކޮށްދިނުމާއި އެކި މަޝްރޫޢުތަކަށް ކޮންސަލްޓެންސީގެ ޚިދުމަތް ފޯރުކޮށްދިނުމަށް ރާއްޖެ އޮންލައިންއާ އެކު ސޮއިކުރެވުނު ފަހުމުނާމާއެކެވެ.
މި އެއްބަސްވުމުގެ ދަށުން މައިގަނޑުގޮތެއްގައި މަސައްކަތް ކުރެވޭނެ ދާއިރާތަކުގެތެރޭގައި ޤައުމިއްޔަތު މަޝްރޫޢުގެދަށުން މި ވުޒާރާއިން ހިންގާ ހަރަކާތްތަކަށް މުވާސަލާތީ ރޮނގުން ބޭނުންވާ އެހީތެރިކަން ފޯރުކޮށްދިނުމާއި ދިވެހިބަސް ދިރުވައި އާލާކުރުމަށާއި ދިވެހި ސަގާފަތާއި ތަރިކައާ ގުޅުންހުރި ކަންކަމާ ގުޅޭގޮތުން ޢާއްމުން ހޭލުންތެރިކުރުވުމަށާއި ތަރިކަ ރައްކާތެރިކޮށް ދެމެހެއްޓުމަށް މި ވުޒާރާއިން ހިންގާ މަޝްރޫޢުތަކަށް މުވާސަލާތީ ޚިދުމަތާއި ފަންނީ އެހީތެރިކަން ފޯރުކޮށްދިނުން ހިމެނެއެވެ.
މީގެއިތުރުން، މި ވުޒާރާގެ މުވާސަލާތީ ކަންކަން ހަރުދަނާކުރުމަށް އިންފޮމޭޝަން ޓެކްނޮލޮޖީއާ ގުޅުންހުރި މައްސަލަތައް ރަނގަޅުކުރުމަށް ކޮންސަލްޓަންސީގެ ޚިދުމަތް ފޯރުކޮށްދިނުމާއި ކުޑަކުދީންނާއި ޒުވާނުންނާއި ހާއްސަ އެހީއަށް ބޭނުންވާ ފަރާތްތަކާއި އަންހެނުންނަށް އަމާޒުކޮށް އެފަރާތްތަކަށް ފުރުޞަތުތައް ފަހިވެގެންދާނެގޮތަށް ހާއްސަ މަސައްކަތްތައް ކުރުން ހިމެނެއެވެ.
ދިވެހިބަހާއި ސަގާފަތާއި ތަރިކައާ ބެހޭ ވުޒާރާގައި އޮތް ސޮއިކުރުމުގެ ރަސްމިއްޔާތުގައި މި ވުޒާރާގެ ފަރާތުން ފަހުމުނާމާގައި ސޮއިކުރެއްވީ ވުޒާރާގެ ވަޒީރު އާދަމް ނަޞީރު އިބްރާހީމެވެ. ރާއްޖެ އޮންލައިންގެ ފަރާތުން ސޮއި ކުރެއްވީ އެކުންފުނީގެ ސީސީއޯ މުޙައްމަދު ޖިނާޙް އިބްރާހީމް އެވެ.
24 ޝަޢްބާން 1445
5 މާރިޗު 2024
