އުފެއްދުންތެރިކަމާއި އާ އީޖާދުތައް އުފަންވަނީ އަމިއްލައަށް ކަންކަން ހައްލުކުރަން އެނގޭ ދަރިވަރުންތަކެއް ބިނާކުރެވިގެން –ވަޒީރު އާދަމް ނަޞީރު އިބްރާހީމް
އުފެއްދުންތެރިކަމާއި އާ އީޖާދުތައް އުފަންވަނީ އަމިއްލައަށް ކަންކަން ހައްލުކުރަން އެނގޭ ދަރިވަރުންތަކެއް ބިނާކުރެވިގެންކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ. ވަޒީރު މިހެން ވިދާޅުވީ ދިވެހި ފުލުހުންގެ ޚިދުމަތުގެ ކްރައިމް ޕްރިވެންޝަން އެންޑް ޕަބްލިކް އެފެއާޒުން ކުރިއަށް ގެންދާ ފުރާވަރު ކޭންޕުގެ 102 ވަނަ ކޭންޕު ނިންމުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
ތަޢުލީމު ދިނުމުގެ އެންމެ މުހިންމު އެއް ބޭނުމަކީ އަމިއްލައަށް ކަންކަން ހައްލުކުރަން އެނގުން ކަމަށާއި އެ ކަމުގެ ކުޅަދާނަކަން ލިބިފައިވާ ގައުމެއް ބިނާކުރުންކަމަށް ވެސް ވަޒީރުގެ ވާހަކަފުޅުގައި ވިދާޅުވިއެވެ. ވަޒީރު ވިދާޅުވީ ދިވެހި ފުލުހުންގެ ޚިދުމަތުން ހިންގަވާ ފުރާވަރު ކޭންޕަކީ މި ރޮނގުން ވަރަށް މުހިންމު ހުނަރުތައް ދަސްކޮށްދޭ ކޭންޕެއް ކަމަށާއި އޭގެ ތެރޭގައި ވިސްނުމުގެ ހުނަރާއި މަސައްކަތު ހުނަރު ހިމެނޭކަން ފާހަގަކުރެއްވޭކަމަށެވެ.
ވަޒީރުގެ ވާހަކަފުޅުގައި އިތުރަށް ވިދާޅުވީ ފުރާވަރު ކުދީން ދަސްކުރަން ޖެހޭ އެއް ކަމަކީ ކޮންމެ ކުއްޖަކު ވެސް އެ ކުއްޖެއްގެ އަމިއްލަ ޒިންމާތައް އަމިއްލައަށް އުފުލުންކަމަށާއި އެއީ އަމިއްލަ ނަފުސަށްޓަކައި އުފުލަން ޖެހޭ ޒިންމާއާއި އަމިއްލަ އާއިލާއަށްޓަކައި އުފުލަން ޖެހޭ ޒިންމާއާއި އަމިއްލަ ޤައުމާއި ވަޠަނަށްޓަކައި އުފުލަން ޖެހޭ ޒިންމާތައް ކަމަށެވެ. މި ފަދަ ހަރުދަނާ ބަޔަކަށް ޤައުމެއް ވަނީ ދެވޭ ތަރުބިއްޔަތާއި ތަޢުލީމުންކަމަށާއި ރާއްޖޭގެ އަދުގެ ޢިއްޒަތްތެރި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތުގެ ތެރޭގައި ހިމެނޭ ޤައުމު ބިނާކުރުމަކީ ނުވަތަ ސިކުނޑި ބިނާކުރުމަކީ މިއީކަމަށް ވަޒީރު ވިދާޅުވިއެވެ.
އެކަން އިތުރަށް ތަފްޞީލިކޮށްދެއްވައި އެމަނިކުފާނު ވިދާޅުވީ އެއީ އަމިއްލަ ބުއްދީގެ ތަރާދުން ހެޔޮނުބައި ކިރާލައި ޒިންމާދާރު ގޮތެއްގައި ވިސްނުމާއި އަމަލުތައް ބައްޓަންކުރަން އެނގުމާއި އަމިއްލަ ދީނާއި އަމިއްލަ ޤައުމާއި ވަޠަނަށްޓަކައި ސާބިތުވެ ހުރުމާއި އުފެއްދުންތެރިކަމާއި ވިސްނުންތެރިކަން ހުރުމާއެކު މުރާލީ މަސައްކަތްތެރި ތޫނުފިލި ބަޔަކަށްވުންކަމަށެވެ.
މިފެބުރުވަރީ މަހުގެ 15 އިން 17 އަށް ޢިމާދުއްދީން ސްކޫލުގައި ކުރިއަށް ގެންދިޔަ ފުރާވަރު ކޭންޕުގައި އެ ސްކޫލުގެ ގްރޭޑް 7 އިން 9 އަށް ތަޢުލީމު ހާސިލުކުރަމުންދާ 110 ދަރިވަރުން ބައިވެރިވިއެވެ. ފުރާވަރު ކޭމްޕް ގެ ނިމުން ފާހަގަކުރުމަށް ބޭއްވި މި ރަސްމިއްޔާތުގައި ކޭންޕުގައި ބައިވެރިވި ދަރިވަރުންނަށާއި އެކި ގޮތްގޮތުން އެހީތެރިވެދެއްވި ފަރާތްތަކަށް ސެޓުފިކެޓާއި ހަނދާނީލިއުން ހަވާލުކޮށްފައިވެއެވެ. މި ރަސްމިއްޔާތު އޮތީ އިއްޔެ ޢިމާދުއްދީން ސްކޫލު ހޯލުގައެވެ.
8 ޝަޢުބާން 1445
18 ފެބުރުވަރީ 2024
ދިވެހިބަހާއި ސަގާފަތާއި ތަރިކައާ ބެހޭ ވުޒާރާ
