ވަޒީރު ށ އަތޮޅު މަރޮށީ ކައުންސިލާ ބައްދަލު ކުރައްވައިފި
ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ށ. މަރޮށީ ކައުންސިލާ މިއަދު ބައްދަލު ކުރައްވައިފިއެވެ. މި ބައްދަލުވުމުގައި މަރޮށީ ކައުންސިލުން ވަނީ އެރަށުގައި ހުރި އާސާރީ ތަންތަނުގެ ޙާލަތާ ބެހޭ މަޢުލޫމާތު ވަޒީރާ ހިއްސާ ކޮށްފައެވެ. އަދި އޭގެއިތުރަށް މަރޮށީގެ އާސާރީ ތަންތަނުގެ އާ ތަޞައްވުރާ ގުޅޭގޮތުން ވުޒާރާއާ އެކު މަޝްވަރާ ކުރެވުނެވެ.
މަރޮށީގެ ޙިމާޔަތްކުރެވިފައިވާ މަޝްހޫރު ކާނިގަހާ ބެހޭގޮތުން މި ބައްދަލުވުމުގައިވާހަކަފުޅުދައްކަވަމުން ވަޒީރު އާދަމް ނަޞީރު އިބްރާހީމް ވިދާޅުވީ މަރޮށީ ކާނިގަހަކީ ރާއްޖޭގެ މިނިވަންކަމުގެ ކާނިގަސްކަމަށާއި، ޤައުމީދުވަހުގެ ކާނިގަސްކަމުގައެވެ. އެހެންކަމުން އެ ތާރީޚު ފަތުރުވެރިންނަށް ދައްކައިދެވޭނެ ގޮތަކަށް ތަން ފަރުމާކުރަންޖެހޭނެ ކަމުގައި ވަޒީރު ވިދާޅުވިއެވެ. އަދި ރާއްޖޭގައި މިހެން ހުރި ހުރިހާތަނެއް،އެތަންތަން މެދުވެރިކޮށް އާމުދަނީ ލިބޭނެގޮތަށް، އަދި އެއާމުދަނީން އެތަންތަން ރައްކާތެރިކުރެވި އަދި އެ ލިބޭ އާމުދަނީ އެ ރަށަކަށް ނުވަތަ ކައުންސިލަކަށް ލިބޭނެ ގޮތަށް މަޝްރޫޢުތައް ބައްޓަންކުރުމަށްޓަކައި، އެކަމަށް ބޭނުންވާ ކޮންސަލްޓެންޓުން ހޯދުމުގެ މަސައްކަތް ކުރައްވަމުން ގެންދަވާ ކަމަށް ވަޒީރު ވިދާޅުވިއެވެ. އަދި ރަށުގެ މާއްދީ ތަރިކައިގެ އިތުރުން މާނަވީ ތަރިކަތައްވެސް ދެނެގަނެ، އެފަދަ ތަރިކަތައް މިހާރުން ފެށިގެން ރައްކާތެރިކޮށްދެއްވަން ފެށްޓެވުމަށް ވަޒީރުވަނީ އެދިވަޑައިގަންނަވާފައެވެ.
ދިވެހިބަހާއި ސަގާފަތާއި ތަރިކައާ ބެހޭ ވުޒާރާ
25 ރަޖަބު 1445
6 ފެބްރުއަރީ 2024
