ދިވެހިބަހާއި ސަގާފަތާއި ތަރިކައާ ބެހޭ ވުޒާރާ ދިވެހި ސަރުކާރުން އުފެއްދެވީ 17 ނޮވެންބަރު 2023ގައެވެ. އޭގެ ކުރިން 21 ޖަނަވަރީ 2014އިން ފެށިގެން މިނިސްޓްރީ އޮފް ކަލްޗަރ އެންޑް ހެރިޓޭޖްގެ ނަމުގައި މި ވުޒާރާ ހިނގައިފައިވެއެވެ.
ދިވެހި ޤައުމިއްޔަތަށް ވަކިން ޚާއްޞަ އިސްކަމެއް ދެއްވައި އަލުން މި ވުޒާރާގެ ނަމާއި މަސްއޫލިއްޔަތުތައް އިޞްލާޙުކުރައްވައި އާ ނަމެއްގައި އުފެއްދެވީ ޢިއްޒަތްތެރި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. އެއީ އެމަނިކުފާނު ސަރުކާރު ހިންގެވުމުގެ ސިޔާސަތުތަކުގެ ތެރޭގައި ވަރަށް ބޮޑު އިސްކަމެއް ދެއްވައިފައިވާ ދިވެހި ޤައުމިއްޔަތު އިޢާދަކުރުމުގެ ޤައުމީ ނިޒާމުގެ އެންމެހައި ކަންކަން މި ވުޒާރާއާ މަތިކުރެއްވުމާއެކުގައެވެ. މި ދެންނެވި ނިޒާމު ފުރިހަމަ ކުރުމަށް ޓަކައި މި ވުޒާރާގެ ދަށުން ތަރުތީބުވާ މުއައްސަސާތަކުގެ ތެރޭގައި ދިވެހި ތަރިކަ ދިރާސާކުރާ ޤައުމީ މަރުކަޒާއި، ދިވެހި ޤައުމީ ތަރިކައިގެ ކޮލެޖު (ދިވެހި ޤައުމިއްޔަތުގެ އިސްވަރު) އާއި، ދިވެހި ޤައުމީ ޗާޕުޚާނާ ހިމެނެއެވެ. އޭގެ އިތުރަށް ދިވެހި ބަހުގެ އެކެޑެމީއާއި، ތަރިކަ ރައްކާތެރިކުރާ ޤައުމީ މަރުކަޒު ހިމެނިގެންވަނީ މި ވުޒާރާގެ ބެލެހެޓުންތެރިކަމުގެ ދަށުގައެވެ.