1445 ވަނަ އަހަރުގެ ހުރަވީ ދުވަހުގެ ޚާއްޞަ މައުރަޒު
1445 ވަނަ އަހަރުގެ ހުރަވީ ދުވަހުގެ މުނާސަބަތުގައި ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ކުރިއަށްގެންދާ “ދޮންބާޑަރައިންގެ ހަނދާނީ މައުރަޒު” މިއަދު ފެށޭނެއެވެ. މި މައުރަޒަކީ ދިވެހިރާއްޖޭގެ މިނިވަންކަމުގެ ދިފާޢުގައި ދޮންބަންޑާރައިން ކުރެއްވި ޖިހާދާއި އެމަނިކުފާނުގެ ޝަޚްޞިއްޔަތުގެ ހަނދާނަށް ޚާއްޞަކޮށް، ކުރިއަށް ގެންދާ ޚާއްޞަ މައުރަޒެކެވެ. މިއަހަރުގެ ހުރަވީ ދުވަހުގެ ރަސްމީ ޙަރަކާތްތައް އިންތިޒާމުކޮށް ކުރިއަށް ގެންދަނީ، ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިންނެވެ.
މި މައުރަޒު ރަސްމީކޮށް ހުޅުވުމަށް ހަމަޖެހިފައިވަނީ މިއަދު ހަވީރު 4:30 ގައެވެ. މި މައުރަޒު ރަސްމީކޮށް ހުޅުއްވައިދެއްވާނީ ރައީސުލްޖުމްހޫރިއްޔާގެ ޑރ. މުޙައްމަދު މުޢިއްޒުގެ އަނބިކަނބަލުން މެޑަމް ސާޖިދާ މުޙައްމަދެވެ. މި ރަސްމިއްޔާތުގައި މައުރަޒުގައި ބެހެއްޓިފައިވާ އެއްޗެތިކޮޅާ ބެހޭ މަޢުލޫމާތު ދިނުން ވެސް އޮންނާނެއެވެ. މި މައުރަޒު ކުރިއަށް ގެންދިއުމަށް ހަމަޖެހިފައިވަނީ މިއަދުން ފެށިގެން މި މަހުގެ 21 ވަނަ ދުވަހުގެ ނިޔަލަށެވެ. މައުރަޒު ހުޅުވިފައި ހުންނާނީ ހެނދުނު 10:00 އިން އިރުއޮއްސި 6:00 އަށެވެ.
މައުރަޒުގައި ބެހެއްޓޭނެ އެއްޗެތިކޮޅުތަކުގެ ތެރޭގައި އައްސުލްޠާނުލްޣާޒީ ޙަސަން ޢިއްޒުއްދީން (ދޮންބަންޑާރައިން) ގެ ފަގުޑިކޮޅާއި، ދޮންބަންޑާރައިން ގެ ލޮންސިކޮޅު ހިމެނެއެވެ. މީގެ އިތުރުންވެސް ހުރަވީ ދުވަހުގެ ހަނދާނާ ގުޅުންހުރި އެއްޗެތިކޮޅު ބެހެއްޓިފައި ހުންނާނެއެވެ.
ހުރަވީ ދުވަހާ ގުޅުވައިގެން ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ކުރިއަށް ގެންދިޔަ ޙަރަކާތްތަކުގެ ތެރޭގައި، ދުވަހުގެ ރަސްމީ ޖަލްސާގެ އިތުރުން ހުރަވީ ދުވަހުގެ ޚާއްޞަ ކުޑަކުދިންގެ ހަވީރެއް ކުރިއަށް ގެންގޮސްފައިވެއެވެ.
ހުރަވީ ދުވަހަކީ ދޮންބަންޑާރައިން ހޮޅީންގެ އަތްދަށުން ދިވެހިރާއްޖެ މިނިވަން ކުރެއްވި ދުވަހެވެ. ހުރަވީ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ޖުމާދަލްއާޚިރާ މަހުގެ 3 ވަނަ ދުވަހެވެ.
ދިވެހިބަހާއި ސަގާފަތާއި ތަރިކައާ ބެހޭ ވުޒާރާ
