1445 ވަނަ އަހަރުގެ ހުރަވީ ދުވަހުގެ މުނާސަބަތުގައި ބާއްވާ ކުޑަކުދިންގެ ހަވީރު
1445 ވަނަ އަހަރުގެ ހުރަވީ ދުވަހުގެ މުނާސަބަތުގައި ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން އިންތިޒާމުކޮށްގެން ބާއްވާ ޚާއްޞަ ކުޑަކުދިންގެ ހަވީރު ފެށިއްޖެއެވެ. މި ކުޑަކުދިންގެ ހަވީރު ކުރިއަށް ދާނީ މިއަދު ހަވީރު 4 އިން 6 އަށް ހުޅުމާލޭ ސެންޓްރަލް ޕާކުގައެވެ. މި ޙަރަކާތުގައި ޝަރަފުވެރި މެހެމާނެއްގެ ގޮތުން ބައިވެރިވެވަޑއިގަންނަވަނީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ ވަޒީރު އާދަމް ނަޞީރު އިބްރާހީމެވެ.
މިއަދު ކުރިއަށްދާ މިހަވީރުގައި ކުޑަކުދިންނަށް ބައިވެރިވެވޭ ގޮތަށް ތަފާތު ގިނަ ޙަރަކާތްތަކެއް ކުރިއަށްދާނެއެވެ. އޭގެ ތެރޭގައި ކުރެހުމާއި ކުލަޖެއްސުމާއި ކުޑަކުދިންނަށް ދިވެހި ތާރީޚާއި ކުޅިވަރު ދައްކައިދޭ ޙަރަކާތްތަކާއި ދިވެހި މަސައްކަތްތެރިކަން ދައްކައިދޭ ޙަރަކާތްތަކާއި ކުޑަކުދިންނަށް ތަފާތު ބާވަތްތަކުގެ ހަދިޔާ ބެހުންވެސް ކުރިއަށްދާނެއެވެ. މީގެއިތުރުން މިއަދުގެ ހަވީރުގައި ދިވެހިރާއްޖޭގެ ޤައުމީ ދިފާޢީ ބާރާއި ދިވެހި ފުލުހުންގެ ފަރާތުންވެސް ކުޑަކުދިންނަށް ބައިވެރިވެވޭ ޙަރަކާތްތައް ކުރިއަށް ގެންދާނެއެވެ. އަދި މީގެއިތުރުން ހަވީރުގައި ބައިވެރިވާ ފަރާތްތަކަށް ކެންޓީނުގެ ޚިދުމަތާއި ފުރަތަމަ އެހީގެ ޚިދުމަތް ލިބޭނެ އިންތިޒާމުވެސް ވަނީ ހަމަޖައްސާފައެވެ.
ހުރަވީ ދުވަހާ ގުޅުވައިގެން ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ކުރިއަށް ގެންދާ ޚާއްޞަ ޙަރަކާތްތަކުގެ ތެރޭގައި، ހުރަވީ ދުވަހުގެ ރަސްމީ ޖަލްސާ ބޭއްވުމަށްވެސް ވަނީ ހަމަޖެހިފައެވެ. މި ޖަލްސާ އޮންނާނީ ޑިސެންބަރު 16 ވާ ހޮނިހިރު ދުވަހުގެ ރޭ ސޯޝަލް ސެންޓަރުގައެވެ. މީގެއިތުރުން “ދޮންބަންޑާރައިންގެ ހަނދާނީ މައުރަޒު” ގެ ނަމުގައި ދޮންބަންޑާރައިންގެ ޝަޚްޞިއްޔަތާއި ދޮންބަންޑާރައިންގެ ޖިހާދުގެ ޒިކުރާ އާކުރުމުގެ މަޤުޞަދުގައި މައުރަޒެއް ކުރިއަށް ގެންދިއުމަށް ވަނީ ހަމަޖެހިފައެވެ. މި މައުރަޒު ކުރިއަށްދާނީ ޤައުމީ ދާރުލްއާސާރުގައި ޑިސެންބަރު 17 އިން 21 ށެވެ.
ހުރަވީ ދުވަހަކީ ދޮންބަންޑާރައިން ހޮޅީންގެ އަތްދަށުން ދިވެހިރާއްޖެ މިނިވަން ކުރެއްވި ދުވަހެވެ. ހުރަވީ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ޖުމާދަލްއާޚިރާ މަހުގެ 3 ވަނަ ދުވަހެވެ.
ދިވެހިބަހާއި ސަގާފަތާއި ތަރިކައާ ބެހޭ ވުޒާރާ
15 ޑިސެންބަރު 2023
