1445 ވަނަ އަހަރުގެ ހުރަވީ ދުވަހުގެ ރަސްމީ ޖަލްސާ 16 ޑިސެންބަރު ވާ ހޮނިހިރުދުވަހުގެރޭ ބޭއްވުމަށް ހަމަޖެހިއްޖެ
1445 ވަނަ އަހަރުގެ ހުރަވީ ދުވަހުގެ ރަސްމީ ޖަލްސާ، 16 ޑިސެންބަރު ވާ ހޮނިހިރުދުވަހުގެރޭ ބޭއްވުމަށް ހަމަޖެހިއްޖެއެވެ. ހުރަވީ ދުވަހުގެ ރަސްމީ ޖަލްސާއަކީ، ދިވެހިރާއްޖޭގެ މިނިވަންކަމުގެ ދިފާޢުގައި ދޮންބަންޑާރައިން ކުރެއްވި ޖިހާދުގެ ހަނދާނަށް ޚާއްޞަކޮށް، ދިވެހިރާއްޖޭގެ މިނިވަންކަމާއި އިސްތިޤްލާލު ދެމެހެއްޓުމުގެ މުހިންމުކަމަށް އަލިއަޅުވާލައި، ޤައުމީ ބަޠަލުންނަށް ޝުކުރު އަދާކޮށް ޒިކުރާ އައު ކުރުމަށް ބާއްވާ ޖަލްސާއެކެވެ. މިއަހަރުގެ ހުރަވީ ދުވަހުގެ ރަސްމީ ޖަލްސާ އިންތިޒާމުކޮށް ކުރިއަށް ގެންދަނީ، ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިންނެވެ.
މި އަހަރުގެ ހުރަވީ ދުވަހުގެ ރަސްމީ ޖަލްސާ ބޭއްވުމަށް ހަމަޖެހިފައިވަނީ ޒުވާނުންގެ މަރުކަޒު (ސޯޝަލް ސެންޓަރު) ގައެވެ. މިޖަލްސާގައި ދިވެހިރާއްޖޭގެ ރައީސުލްޖުމްހޫރިއްޔާއާއި ދައުލަތަށް ގިނަދުވަހު ޚިދުމަތް ކުރައްވާފައިވާ ޢިއްޒަތްތެރީންނާއި، ދައުލަތާއި ސަރުކާރުގެ އިސް މަޤާމުތަކުގައި ތިއްބެވި ބޭބޭފުޅުންގެ ބައިވެރިވެވަޑައިގަތުމަށް ހަމަޖެހިފައިވެއެވެ. މީގެ އިތުރުން ދަޢުވަތު އެރުވިގެން ވަޑައިގަންނަވާ ފަރާތްތަކާއި ސްކޫލުތަކުގެ ދަރިވަރުން ވެސް ބައިވެރިވުމަށްވަނީ ހަމަޖެހިފައެވެ. އަދި މިޖަލްސާ ޓީވީ އާއި ރޭޑިއޯ އިން ވަގުތުން ދުރަށް ފޮނުވުމަށް ވަނީ ހަމަޖެހިފައެވެ.
ހުރަވީ ދުވަހާ ގުޅުވައިގެން ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ކުރިއަށް ގެންދާ ޙަރަކާތްތަކުގެ ތެރޭގައި، ދުވަހުގެ ރަސްމީ ޖަލްސާގެ އިތުރުން ހުރަވީ ދުވަހުގެ ޚާއްޞަ އެސެމްބްލީ އަކާއި، ކުޑަކުދިންގެ ހަވީރެއްގެ އިތުރުން “ދޮންބަންޑާރައިންގެ ހަނދާނީ މައުރަޒު” ގެ ނަމުގައި ޤައުމީ ދާރުލްއާސާރުގައި ޑިސެންބަރު 17 އިން 21 އަށް ކުރިއަށް ގެންދިއުމަށް ހަމަޖެހިފައިވާ މައުރަޒެއް ހިމެނެއެވެ.
1445 ވަނަ އަހަރުގެ ހުރަވީ ދުވަހުގެ މުނާސަބަތުގައި މި ވުޒާރާއިން ކުރިއަށްގެންދާ “ހުރަވީ ދުވަހާ ގުޅޭ ޚާއްޞަ ޙަރަކާތްތައް”
ތިރީގައި މިދަންނަވާލަނީ 1445 ވަނަ އަހަރުގެ ހުރަވީ ދުވަހާ ގުޅުވައިގެން މި ވުޒާރާއިން ކުރިއަށްގެންދާ ޚާއްޞަ ޙަރަކާތްތަކުގެ ކުރު ޚުލާޞާއެކެވެ.
ޑިސެމްބަރ 14: ހުރަވީ ދުވަހުގެ ޚާއްޞަ އެސެމްބްލީ
ހުރަވީ ދުވަހުގެ މުނާސަބަތުގައި މާލެއާއި ރަށްރަށުގެ ސަރުކާރު އޮފީސްތަކާއި ސްކޫލުތަކުން އިންތިޒާމުކޮށްގެން ޚާއްޞަ އެސެމްބްލީއެއް ބޭއްވުން.
ޑިސެމްބަރ 15: ކުޑަކުދިންގެ ހަވީރު (ހުޅުމާލެ، ސެންޓްރަލް ޕާކް)
ކުޑަކުދިންނަށް ޚާއްޞަކޮށްގެން ބާއްވާ ހަވީރެއް، ސެންޓްރަލް ޕާކުގައި ތަފާތު ޙަރަކާތްތަކާއި، ކުޅިވަރުތަކާއި، ސަގާފީ ޝޯތައް ކުރިއަށް ގެންދިއުން
ޑިސެމްބަރ 16: ހުރަވީ ކުއިޒް (ޓީވީ/ރޭޑިއޯ)
ޤައުމީ ބަޠަލުންނާއި، ތާރީޚީ ހާދިސާތަކާއި، ހުރަވީ ދުވަހުގެ މުހިންމުކަމާ ބެހޭގޮތުން ދަރިވަރުންނަށް ލިބިފައިވާ މަޢުލޫމާތު ވަޒަންކުރުމަށް ދަރިވަރުން ބައިވެރިކޮށްގެން ކުއިޒް ސެޝަނެއް ކުރިއަށް ގެންދިއުން.
ޑިސެމްބަރ 16: ރަސްމީ ޖަލްސާ (ސޯޝަލް ސެންޓަރު)
ދިވެހިރާއްޖޭގައި މިނިވަންކަމާއި އެއްބައިވަންތަކަން ދެމެހެއްޓުމުގެ މުހިންމުކަމަށް އަލިއަޅުވާލައި، ޤައުމީ ބަޠަލުންނަށް ޝުކުރު އަދާކުރުން.
ޑިސެމްބަރ 17-21: “ދޮންބަންޑާރައިންގެ ހަނދާނީ މައުރަޒު” (ޤައުމީ ދާރުލްއާސާރު)
ދޮންބަންޑާރައިންގެ ޝަޚްޞިއްޔަތާއި ދޮންބަންޑާރައިންގެ ޖިހާދުގެ ޒިކުރާ އާކުރުމަށް ހުރިހާ ޢުމުރުފުރައަކަށް ހުޅުވާލައިގެން މައުރަޒެއް ކުރިއަށް ގެންދިއުން.
ދިވެހިބަހާއި ސަގާފަތާއި ތަރިކައާ ބެހޭ ވުޒާރާ
