ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އއ. ތޮއްޑޫގެ މަގުތައް ޒަމާނީ ފެންވަރަށް ހައްދަވަން ނިންމަވައި، އެމަސައްކަތުގެ ޢަމަލީ މަސައްކަތް ފެށްޓެވިއިރު، ރައްޔިތުންނަށް ވެސް ރައީސަށާއި ސަރުކާރަށް މަގެއް ހައްދަވައިދެއްވުމުގެ ފުރުޞަތު އެބަ އޮތްކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ. ވަޒީރު މިހެން ވިދާޅުވީ، އއ ތޮއްޑޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ ޢަމަލީ މަސައްކަތް ފެށުމަށް ތޮއްޑޫ ސްކޫލްގައި މިއަދު ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ. ވަޒީރު އިތުރަށް ވިދާޅުވީ އެ މަގަކީ ތަރައްޤީއާ ކުރިއެރުމުގެ މަގުކަމަށެވެ. ރައީސްގެ ތަޞައްވުރު ޙަޤީޤަތަކަށް ހެދުމާ ދިމާޔަށް ގެންދެވޭނޭ ގޮތަށް ފުރުޞަތު ފަހި ކޮށްދެއްވުމުގެ މަގުކަމަށެވެ.

”ރައީސް ޑރ. މުޙައްމަދު މުޢިއްޒުގެ އަރިހުގައި އެންމެ މަޤުބޫލު ކަންކަމަކީ ވަޢުދު ފުއްދުން. ޚިދުމަތުގެ އަވަސްކަން. ޚިދުމަތުގެ ފެންވަރު. ރައްޔިތުން އެދޭ ގޮތަށް ރައްޔިތުންގެ އުންމީދުތައް ދުވަހުން ދުވަހަށް ޙާޞިލުކޮށްދެއްވުން] ވަޒީރު ވިދާޅުވިއެވެ.

މިރަސްމިއްޔާތުގައި ވާހަކަފުޅު ދައްކަވަމުން ވަޒީރު އިތުރަށް ވިދާޅުވީ، ތޮއްޑޫގެ ތަރައްޤީ ލަސްނުކޮށް، މި ސަރުކާރަށް މިވީ 5 މަސް ތެރޭގައި ތަރައްޤީއާ ގުޅުން ހުރި، މިފަދަ މުހިންމު މަސައްކަތެއް ރަށުގައި ކުރިއަށް ގެންދަވަން ނިންމެވި ކަމަށްޓަކައިތޮއްޑޫއަށް އުފަން ދަރިއެއްގެ ހައްސިއްޔަތުން އުފާފުޅު ކުރައްވާ ކަމަށާއި، އެކަމަށްޓަކައިރައީސަށް ޝުކުރު ދަންނަވާ ކަމަށެވެ. އަދި 730 ދުވަސް ތެރޭ މިމަޝްރޫޢު ނިންމުމަށް އާރްޑީސީ އިން މިސްރާބު ހިފާފައިވާކަމީ މި ސަރުކާރުގެ ބާރު ސްޕީޑް ދައްކުވައިދޭ ކަމެއް ކަމަށާއި، މި ސްޕީޑަށް ރައްޔިތުން މަރްޙަބާ ކިޔުމަށް އެދިވަޑައިގަންނަވާ ކަމުގައި ވިދާޅުވިއެވެ.

މިރަސްމިއްޔާތުގައި ރޯޑް ޑިވެލޮޕްމެންޓް ކޯޕަރޭޝަންގެ މެނޭޖިންގް ޑިރެކްޓަރ ބްރިގޭޑިއަރ ޖެނެރަލް ރިޓަޔަރޑް ޢަލީ ޒާހިރު ދެއްކެވި ވާހަކަފުޅުގައި ވަނީ މަސައްކަތް ނުހުއްޓި ނިންމޭނެ ކަމުގެ ޔަޤީންކަން ދެއްވާ ކަމުގައި ވިދާޅުވެފައެވެ. އަދި ތޮއްޑުއަކީ ފަތުރުވެރިކަމުގެ ރަށަކަށް ވާއިރު، މި މަސައްކަތުގެ ޢަމަލީ މަސައްކަތުގެ ސަބަބުން ރަށުގެ ފަތުރުވެރިކަމަށް ދަތި ނުވާނޭ ގޮތަށް މަސައްކަތް ކުރިއަށް ގެންދެވުމަށް ކުންފުނީގެ މުވައްޒަފުންނަށް އިލްތިމާސްކުރެއްވިއެވެ.

މިއީ ޑިޒައިން އެންޑް ބިލްޑް އުސޫލުގެ ދަށުން ހިންގަން ނިންމާފައިވާ މަޝްރޫޢުއެކެވެ. މި މަޝްރޫޢުގެ ދަށުން ތޮއްޑޫގައި 2.5 ކިލޯމީޓަރުގެ 4 މަގު ޒަމާނީ ފެންވަރަށް ހެދުމަށް ނިންމައި މިއަދު ވަނީ އަމަލީ މަސައްކަތް ފަށާފައެވެ. އަދި ތޮއްޑޫގެ މަގުތަކުގެ ފެންހިންދާ ނިޒާމް ޤާއިމްކޮށް މަގުތަކުގައި މަގުބައްތި ހަރުކޮށްޒީނަތްތެރިކުރުން ވެސް މި މަޝްރޫޢުގެ ތެރޭގައި ހިމެނެއެވެ.

8 ޝައްވާލް 1445

17 އެޕުރީލު 2024