ދައުލަތަކީ ބެލެހެއްޓުންތެރިކަމުގެ ނިޒާމަކަށް ކިޔޭ ނަމެކެވެ. ދައުލަތެއް އުފެދެނީ ދެ އަސާސެއްގެ މަތީގައެވެ. ފުރަތަމަ އަސާސަކީ މީހުންނެވެ. ޤައުމެވެ. ދެވަނަ އަސާސަކީ ތަނެވެ. ރާއްޖެއެވެ. ބަޔަކަށް ދައުލަތެއް ލިބުމަށް ޓަކައި އެ ބަޔަކުގެ ބާރުގެ ދަށުގައި ބަލަހައްޓައި، ދަމަހައްޓާ ބިމެއް ނުވަތަ ރާއްޖެއެއް އޮންނާން ޖެހެއެވެ. އެ ބިމާއި އެ މީހުންގެ ސަލާމަތްކަށަވަރުކުރާން އުފައްދާ ނިޒާމަކީ ދައުލަތެވެ. އެހެންކަމުން ދިވެހީންގެ ދައުލަތަކީ ދިވެހިރާއްޖެއާއި ދިވެހީންގެ ސަލާމަތް ބަލަހައްޓައި ދެމެހެއްޓުމުގެ ނިޒާމެވެ.
ޤާނޫނު އަސާސީ ބުނާ ގޮތުން ދިވެހި ދައުލަތުގެ ނަމަކީ ދިވެހިރާއްޖޭގެ ޖުމްހޫރިއްޔާއެވެ. މިއީ ފުރިހަމަ މިނިވަންކަން ލިބިގެންވާ، އިސްލާމީ އުސޫލުތަކުގެ މައްޗަށް ބިނާކުރެވިފައިވާ، އަމިއްލަވެރިކަންކުރާ، ދިމިޤުރާޠީ، ޖުމްހޫރީ އަދި ޔުނިޓަރީ ދައުލަތެކެވެ.
ދިވެހި ދައުލަތަކީ ވަރަށް އެވޭލާ ޤަދީމީ ދައުލަތެކެވެ. ފަހުގެ ހޯދުންތަކުން އެނގޭ ގޮތުގައި ދިވެހިރާއްޖޭގައި މީހުން އުޅޭތާ ހަތަރުހާހެއްހައި އަހަރުވެދާނެއެވެ. ސަލާމްލެއްވި ޢީސާގެފާނުގެ ތިންސަތޭކަ އަހަރު ކުރީން ވެސް ރާއްޖޭގައި ދައުލަތެއް އޮތްކަން ތާރީޚީ ލިޔުންތަކުން އެނގެއެވެ. ޢީސަވީ މީލާދުގެ ތިން ސަތޭކަ އަހަރުކުރިން ރޯމަނުންގެ ރަސްގެފާނު އަރިހަށް ދިވެހީން ވެދުމާ ދިޔަކަން ތާރީޚުން އެނގެއެވެ. ވެދުމައިގެން ރަސްކަލެއްގެ ދަރުބާރަށް ދެވޭނީ ރަސްކަލެއްގެ ފަރާތްޕުޅުންނެވެ. އެއީ ދައުލަތަކުން ދައުލަތަކާ ކުރާ އެންމެ މަތީފެންވަރުގެ އެއް މުޢާމަލާތެވެ.
ތާރީޚުން ފެންނަ ކޮންމެ އާ މަޢުލޫމާތަކުން ވެސް އެނގެނީ ރާއްޖެއަކީ އަބަދު ވެސް އަމިއްލަވެރިކަމެއްކުރާ މިނިވަން ދައުލަތެއް އޮތް ރާއްޖެއެއްކަމެވެ.