ދިވެހިރާއްޖެއަކީ ދިވެހީން އެތަނެއްގެ މިނިވަންކަމާއި އިސްތިޤުލާލު ދިފާޢުކޮށް ރައްކާތެރިކުރަމުން އަންނަ، ދިވެހީންގެ މިލްކުވެރި ސަރަހައްދެވެ. މިއީ ޤާނޫނީ ގޮތުން ކަނޑައެޅިފައިވާ އިމެކެވެ.
ދިވެހިރާއްޖެ އޮންނަނީ މާސިންގާ ކަނޑެއްގައެވެ. މި ކަނޑުގެ ތާރީޚަށް ބަލާއިރު، އެރްތެރިއަން ބާރުތައް ކުރިއަރައި ދިޔަ ދުވަސްވަރު މި ކަނޑަށް އެރްތެރިއަން ސީއޭ ކިޔުނެވެ. އަނެއް ދުވަސްވަރެއްގައި އީސްޓަން ސީއޭ ކިޔުނެވެ. އަދި ވެސްޓަން ސީ ވެސް ކިޔިފައިވެއެވެ. އިންޑިއަން އޯޝަންގެ ނަމުން ނަން ކިޔޭންފެށީ 16 ޤަރުނުގެ ކުރީ ކޮޅުގައެވެ. މީލާދުން 1515ގައެވެ. ދިވެހިރާއްޖެ އޮންނަނީ މި މާސިންގާ ކަނޑުގައި އޮޅުދޫކަރައިގެ ހުޅަނގުން 670 ކިލޯމީޓަރު (410 ނމ) ދުރުގައި، އުތުރުކަރައިގެ ދެކުނުން 590 ކިލޯމީޓަރު ދުރުގައެވެ.
މިހާރު ދިވެހިރާއްޖޭގެ އެންމެ ދިގު ގޮތަކީ ތިލަދުންމަތީ ތުރާކުނު އުތުރު ބޭރުން ފެށިގެން، އައްޑު އަތޮޅު ގަމު ދެކުނު ބޭރަށެވެ. އެންމެ ފުޅާ ގޮތަކީ ތިލަދުންމަތީ މާމަކުނުދޫ ހުޅަނގު ބޭރުން ފެށިގެން ފެލިދެއަތޮޅު ފޮއްތެޔޮމުލީގެ އިރުމަތީ ބޭރަށެވެ. އެންމެ ފުޅާ ދިމާޔަކީ ފެލިދެއަތޮޅު ފޮއްތެޔޮމުލީ އިރުމަތީ ބޭރުން އަރިއަތޮޅު ހުކުރުއެޅީ ހުޅަނގު ބޭރަށެވެ. ރާއްޖޭގެ ބޮޑު މިނަކީ 90,000 އަކަކިލޯ މީޓަރެވެ. އޭގެ ތެރެއިން ބޮޑު ބަޔަކީ ކަނޑެވެ. ހިކިފަސްތާނގެ ބޮޑުމިނަކީ 298 މޭލުކަމަށް އިހުގެ ލިޔުންތަކުން ފެނެއެވެ. ނަމަވެސް ފަހަކަށް އައިސް ރާއްޖޭގެ ރަށްރަށް ހިއްކާން ފެށުމުން މި ނިސްބަތަށް ބޮޑެތި ބަދަލުތައް އައިސްފައިވާނެކަމަށް ބެލެވެއެވެ.
ދިވެހިރާއްޖޭގެ އުތުރުން ޢަރުޟުން 8.20ގައި އެއިޓް ޑިގްރީ ޗެނަލް ކިޔާ ކަނޑެއް އޮވެއެވެ. މި ކަނޑުގެ އުތުރުން ޖެހިފައި އޮންނަނީ މަލިކުގެ ފަރުތަކުން އެކުލެވިފައިވާ ބޭރުދުންޏެވެ. މަލިކާއި އިހަވަންދިއްޕޮޅާ ދެމެދު އޮންނަނީ 70 މޭލެވެ. މި ދެމެދުގެ ކައިރިކަން އަންގައިދޭން އިހުގެ ދަތުރުވެރީން ބުނެއުޅެނީ ތިލަދުންމަތީ ކެލައިން ފުރާފައި ކައްކާން އުދާ ބޮނޑިބަތްތެލި ހިހޫނުވަނީސް މަލިކު ފަޅަށްވަދެވޭކަމަށެވެ.
