ދިވެހި ޤައުމިއްޔަތު މަޝްރޫޢުގެ ވިލަރެސްވެރީންނަށް ޚާއްޞަކޮށް ނޫސްވެރިކަމުގެ ތަމްރީން ކޯހެއް ފަށައިފި.

ދިވެހި ޤައުމިއްޔަތު މަޝްރޫޢުގެ ވިލަރެސްވެރީންނަށް އަމާޒުކޮށް، ނޫސްވެރިކަމުގެ ކުރު ތަމްރީނު ޕްރޮގްރާމެއް މިއަދު ފަށައިފިއެވެ. މި ޖޫން މަހުގެ 2 އިން 12 ގެ ނިޔަލަށް ކުރިއަށް ގެންދާ، ޖުމްލަ 24 ގަޑިއިރުގެ މި ކޯހުގައި ކިޔަވައިދެއްވާނީ ނޫސްވެރިކަމުގެ ދާއިރާގައި ރާއްޖޭގައި ތިއްބެވި އެންމެ ތަޖުރިބާކާރު ބޭފުޅުންނެވެ. މި ހުރިހައި ބޭފުޅުންނަކީ ވެސް ނޫސްވެރިކަމުގައި 25 އަހަރަށްވުރެ ގިނަ ދުވަހު ޚިދުމަތް ކުރައްވައި، ނޫސްވެރިކަން ނުވަތަ ލިޔުންތެރިކަމުގެ ރޮނގުން ޤައުމީ އިނާމު ލިބިވަޑައިގެންފައިވާ ބޭފުޅުންނެވެ. މި ތަމްރީން ޕްރޮގްރާމް ކުރިއަށް ދާނީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާގައެވެ.

މި ކޯހުގައި ކިޔަވައިދެއްވާ ބޭފުޅުންގެ ތެރޭގައި ހިމެނިވަޑައިގަންނަވަނީ “އަދިވެސް އޮންލައިން”ގެ ސީ.އީ.އޯ އަދި ޗީފް އެޑިޓަރު އަދި ހަވީރު އޮންލައިނާއި “ހުވާސް”ގެ ކުރީގެ އެޑިޓަރު މުޙައްމަދު ޝަހީބާއި “ދައުރު” އޮންލައިންގެ ޗީފް އެޑިޓަރު މޫސާ ލަޠީފާއި “ވަން އޮންލައިން”ގެ ސީ.އީ.އޯ އަދި ޗީފް އެޑިޓަރު ސިނާން ޢަލީ އާއި “މިރާރ އޮންލައިން”ގެ ޗީފް އެޑިޓަރު މުންޑޫ އާދަމް ޙަލީމާއި “ސަން މީޑިއާ”ގެ ސީ.އީ.އޯ މުޙައްމަދު އާސިފު (މޮންދު) އާއި ވީނިއުސްގެ ކުރީގެ އެޑިޓަރު ޢިމާދު ލަޠީފާއި ދިވެހި ބަހުގެ އުސްތާޒެއް ކަމަށްވާ، ޤައުމީ އަރުޝީފުގެ ޑިރެކްޓަރ ޖެނެރަލް ފަރެސް މުޙައްމަދު ޢާމިރެވެ.

ދިވެހިބަހުގެ ވަޒީރު އާދަމް ނަޞީރު އިބްރާހީމް އިއްޔެ ވަނީ އެބޭފުޅުންނާ ބައްދަލު ކުރައްވައި، ކޯސް ކުރިއަށް ގެންދާނެ ގޮތާއި ކޯހުގައި ހިމެނޭ ބައިތަކާ ބެހޭ ގޮތުން މަޝްވަރާ ކުރައްވާފައެވެ. އެ ބައްދަލުވުމުގައި އެބޭފުޅުންނާ ގުޅިގެން މި ވުޒާރާއިން މިފަދަ ކޯހެއް ހިންގުމަކީ މި ވުޒާރާއިން ނޫސްވެރިކަމުގެ ދާއިރާއާއި އެ ދާއިރާގެ އިސްބޭފުޅުންނަށް ދެއްވި ވަރަށް ޚާއްޞަ އިސްކަމެއް ކަމުގައި ދެކެވަޑައިގަންނަވާ ކަމަށް އެބޭފުޅުން ވިދާޅުވިއެވެ.

މި ކޯހުގައި ކިޔަވައިދޭ މައިގަނޑު ބައިތަކުގެ ތެރޭގައި ޚަބަރު ދެނެގަންނާނެ ގޮތާއި، ޚަބަރު އެކުލަވައިލައި ލިޔާނެ ގޮތާއި، އިންޓަވިއުކުރާނެ ގޮތާއި ފީޗަރ ރިޕޯޓް ލިޔާނެ ގޮތްތައް ހިމެނެއެވެ. އަދި ނޫސްވެރިކަމުގެ އަޚުލާޤާ ބެހޭ ގޮތުންނާއި ކާމިޔާބު ނޫސްވެރިއަކަށް ވުމުގެ ޢަޒުމާއި ހިތްވަރުގެ މައްޗަށާއި ތަރުޖަމާ ކުރުމުގެ ފަންނުގެ މައްޗަށާއި ނޫސްވެރިކަމުގެ ބަހުގެ ހަމައިގެ މައްޗަށާއި ނިއުސްރޫމް މެނޭޖްމަންޓުގެ މައްޗަށާއި ފޮޓޯ އަދި ވީޑިއޯ ޖާނަލިޒަމްގެ މައްޗަށާއި މީޑިއާގެ ތަފާތު ވައްތަރުތަކުގެ މައްޗަށާއި ފޭކް ނިއުސްގެ މައްޗަށްވެސް މި ތަމްރީން ޕްރޮގްރާމްގައި ބައްލަވާނެއެވެ.

ޤައުމިއްޔަތު މަޝްރޫޢުގެ ދަށުން ތަމްރީން ކުރެވިގެންދާ މި ވިލަރެސްވެރީންނަކީ ދިވެހިވަންތަކަމުގެ ޢިލްމުތައް ދިރާސާކޮށް މަޢުލޫމާތު އެއްކޮށް، އެ މަޢުލޫމާތު ރައްކާކުރުމުގެ ޤައުމީ މަސައްކަތް ކުރާނެ ފަރާތްތައްކަމުން އެފަރާތްތަކަށް ނޫސްވެރިކަމުގެ ދައުރު ވިސްނިފައި އޮތުމާއި މިދާއިރާގެ ތަޖުރިބާއަކީ މުހިންމުކަމަކަށް ވާނެއެވެ.

24 ޛުލްޤަޢިދާ 1445

2 ޖޫން 2024