ދިވެހި ޅެމުން ނަފްސާނީ ފަރުވާދެވޭތޯ ބެލުމުގެ ދިރާސާއެއް ކުރުމަށް ވަނީ ނިންމާފައި: ވަޒީރު
ދިވެހި ޅެންވެރިކަން ބޭނުންކޮށްގެން ނަފްސާނީ ބަލިތަކަށް ހާއްސަ ފަރާތްތަކަށް ފަރުވާ ދެވޭނެ ގޮތެއް އޮތްތޯ ބެލުމުގެ މަސައްކަތް ކުރަމުންދާ ކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ.
މިއަހަރުގެ ޅެންވެރީންގެ ދުވަހުގެ މުނާސަބަތުގައި ގދ. ތިނަދޫގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން ވަޒީރު އާދަމް ނަޞީރު އިބްރާހީމް ވިދާޅުވީ، ޅެންވެރިކަމަކީ ހަމައެކަނި މުނިފޫހިފިލުވުމަށް ބޭނުންކުރާ އެއްޗެއް ނޫން ކަމަށާއި، އެއީ އެއަށްވުރެ މާ ބާރުގަދަ ހަތިޔާރެއް ކަަމަށެވެ.
އެގޮތުން ވަޒީރު ފާހަގަކުރެއްވީ، ދުނިޔޭގެ ތަރައްޤީވެ ކުރިއަރާފައިވާ ޤައުމުތަކުގައިވެސް ޅެންވެރިކަމަކީ މީހާގެ ނަފްސާނީ މައްސަލަތަކަށްވެސް ފަރުވާދޭ ވަޞީލަތަކަށްވެފައި އޮންނަ ކަމަށާއި، ބޭސްވެރިކަމެއްގެ ގޮތުގައިވެސް ޅެން ބޭނުން ކުރަމުންދާ ކަމަށެވެ.
“ޅެމަކީ ޞިއްޙީ ފަރުވާދެވޭ ވަޞީލަަތެއް. މިއީ ވަރަށް ކުރީއްސުރެ ދުނިޔޭގައި ހިނގަމުން އަންނަ ކަމެއް، ކުރަމުން އަންނަ ކަމެއް. ސަލާމްލެއްވި ޢީސާގެފާނުގެ 100 އަހަރު ކުރިންވެސް ޅެމުން ޞިއްޙީ ފަރުވާދޭ ކަމަށްވޭ. އެކަމާ ބެހޭގޮތުން ހެދިފައިހުރި ދިރާސާތައް އެބަހުރި. އެދިރާސާތަކުން އެނގޭގޮތުގައި ސަލާމްލެއްވި ޢީސާގެފާނުގެ 100 އަހަރުކުރިން ނަފްސާނީ ކަންކަމަށް ޅެންވެރިކަން ބޭނުންކޮށްގެން ފަރުވާދީފައި އެބަހުރި. މާޔޫސްކަން އުފެދޭ މީހުންނަށް، އަދި އެކި އެކި ބަލިތައް ތަޙައްމަލުކުރާ މީހުންނަށް، އެވޭން ކުޑަކުރުމަށްޓަކައި ފަރުވާކޮށްފައި އެބަހުރި.” ވަޒީރު ވިދާޅުވިއެވެ.
ވަޒީރު ވިދާޅުވީ ރާއްޖޭގައިވެސް ޅެން ބޭނުންކޮށްގެން ނަފްސާނީ ބަލިތަކަށް ފަރުވާދެވޭނެ ގޮތެއް އޮތްތޯ ދިރާސާކުރުމަށް ނިންމާފައިވާ ކަމަށާއި، އެކަން ކާމިޔާބު ވެއްޖެނަމަ ދިވެހި ޅެމަށް އަނެއްކާވެސް އެހެން ދަރަޖައެއް ލިބުނީ ކަމަށެވެ.
ވަޒީރު އިތުރަށް ވިދާޅުވީ، މިއީ ކުރެވިދާނެ ކަމެއްކަން މިހާތަނަށް މިކަމުގައި އެހީތެރިވި ފަރާތްތަކުން ބުނެފައިވާ ކަމަށާއި، އުއްމީދަކީ މާ ލަހެއްނުވެ މިކަން ޙަޤީޤަތަކަށްހެދުން ކަމަށެވެ.
“މިކަން އަޅުގަނޑުމެންގެ ވުޒާރާއިން އެބަކުރަން. މިއީ ޅެން ބޭނުންކޮށްގެން ކުރެވިދާނެ ކަމެއްތޯ ބެލުމުގެ މަސައްކަތް. ފަރުވާ ފެށުނީއެއްނޫން. އެ ބެލުމުގެ މަސައްކަތް ކަމާބެހޭ ފަރާތްތަކާއެކު ވާހަކަދައްކައިގެން މިކަމާބެހޭ ދިރާސާތައްކޮށްގެން ދިވެހި ޅެން ބޭނުންކޮށްގެން ނަފްސާނީ މިދެންނެވި ޙާލަތްތަކަށް ފަރުވާދެވޭނެ ގޮތްތަކެއް ބަލައި އެކަން ތަޢާރަފުކުރެވޭތޯ މަސައްކަތް އެބަކުރަން. އެކަން ކާމިޔާބު ކުރެވިއްޖިއްޔާ ދިވެހި ޅެމަށް އަނެެއްކާވެސް އެހެން ދަރަޖައެއް އެލިބުނީ.” ވަޒީރު ވިދާޅުވިއެވެ.
ޅެންވެރީންގެ ދުވަސް ފާހަގަކުރުމަށް ގދ. ތިނަދޫގައި ބޭއްވި ރަސްމިއްޔާތުގައި މިއަހަރުގެ ޅެންވެރިކަމުގެ ދުވަހުގެ ޝަރަފުވެރިޔާ އަލްފާޟިލް ޢަބްދުﷲ ޢަފީފުގެ ޅެންފޮތް “އަލިދޯދި” ވަޒީރު އާދަމް ނަޞީރު އިބްރާހީމް ވަނީ ނެރެދެއްވާފައެވެ. އަދި ޢަފީފުގެ ހަޔާތްޕުޅާއި ޚިދުމަތުގެ މައްޗަށް އެކުލެވޭ ރިޕޯޓެއްވެސް މި ޖަލްސާގައި ދައްކާފައިވެއެވެ.
މީގެއިތުރުންވެސް ޅެންވެރީންގެ ފޮތްތައް ނެރުމާއި، ޅެންވެރީންގެ ވާހަކަދެއްކެވުމާއި އެހެނިހެން ތަފާތު ޙަރަކާތްތައް މި ޖަލްސާގައި ވަނީ ގެނެސްދީފައެވެ.
