ދިވެހިބަހުގެ ޤާނޫނަށް އިސްކަން ދިނުމަށް ސަރުކާރުގެ ހުރިހާ އިދާރާތަކަށް ދިވެހިބަހުގެ އެކެޑަމީގެ ރައީސް ޑރ. އަޝަރަފް ޢަބްދުއްރަޙީމް ގޮވާލައްވައިފިއެވެ. ދިވެހިބަހުގެ ދުވަހުގެ ރަސްމީ ޖަލްސާގައި ބައިވެރިވެވަޑައިގެން ދެއްކެވި ވަހަކަފުޅުގައި ޑރ. އަޝްރަފް މިފަދައިން ވިދާޅުވީ، ފަހަކަށް އައިސް ދިވެހި ދައުލަތުގެ އިދާރާތަކުން ދިވެހި ބަހަށް ދޭ ސަމާލުކަން ކުޑަ ވެފައިވާ ކަން ފާހަގަކުރައްވަމުންނެވެ.
ދިވެހިބަހުގެ އެކެޑަމީގެ ފަރާތުން ރާއްވަވައި އިސްލާމީ ޔުނިވާރސިޓީގެ ޖަލްސާކުރާ މާލަމުގައި ބޭއްވެވި މި ރަސްމިއްޔާތުގައި ޑރ. އަޝްރަފް އިތުރަށް ވިދާޅުވީ، ރަސްމީ ސިފައެއްގައި އިދާރީކަންތައްތަކުގައި ދިވެހިބަހަށް އިސްކަން ދިނުމަކީ ބަހަށް ގެނެވޭ ހެޔޮ ބަދަލަކަށް ވާނޭ ކަމުގައެވެ.
“މިހާރު އަޅުގަނޑު ދިވެހިބަހުގެ އެކެޑަމީގެ ހުރިހާ މުވައްޒަފުންނަށް ދަންނަވާފައި އޮންނާނެ ދިވެހިރާއްޖޭގެ ދިވެހި މުއައްސަސާއަކުން އިނގިރޭސި ބަހުން ފޮނުވާ އީ-މެއިލްތަކަށް ޖަވާބުދީގެން ނުވާނެއޭ. އޭގައި ހުރި ކަންތައްތައް ކޮށްދީގެންވެސް ނުވާނެއޭ. އޭގެ ބަދަލުގައި މި އަންގަނީ ދިވެހިރާއްޖޭގެ ދިވެހިބަހުގެ އެކެޑަމީއަށް މުއާމަލާތް ކުރަން ވާނީ ދިވެހިބަހުންނޭ.” ޑރ. އަޝްރަފް ވިދާޅުވިއެވެ.
މި ރަސްމިއްޔާތުގައި ވަނީ ދިވެހިބަހުގެ އެކެޑަމީގެ ފަރާތުން ލިޔެ ތައްޔާރުކޮށްފައިވާ ދެ ފޮތެއް ނެރެދެއްވާފައެވެ. އެއީ ދިވެހިބަހުގެ ލަފްޒުތައް ވަކިކޮށް ލިޔުމުގެ ގަވާއިދު ފޮތަކާއި، ތާނައިގައި ހުރި ނުކުތާޖެހި އަކުރުތައް ބޭނުންކުރާނެ ހަމަ ހިމެނޭ ފޮތެކެވެ. މި ފޮތްތަކުގެ ކޮޕީތައް ސަރުކާރުގެ ހުރިހާ ރަސްމީ އިދާރާތަކަށް އެކެޑަމީގެ ފަރާތުން ފޮނުއްވާނެ ކަމުގައި އެކެޑަމީ ރައީސް ޑރ. އަޝްރަފް ވަނީ ވިދާޅުވެފައެވެ.
މިރަސްމިއްޔާތު ޝަރަފުވެރިކޮށްދެއްވާފައިވަނީ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވަޒީރު އާދަމް ޝަރީފް އުމަރެވެ. އަދި އަރިހުގައި ދިވެހި ބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހީމް ވެސް ބައިވެރިވެވަޑައިގެންނެވިއެވެ. މީގެ އިތުރުން ދިވެހިބަހުގެ އެކެޑަމީގެ އިސްވެރިންނާއި މުވައްޒަފުންގެ އިތުރުން، ބަހުގެ މާހިރުންވެސް ވަނީ ބައިވެރިވެވަޑައިގެންފައެވެ.
ދިވެހިބަހުގެ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ވެސް އޭޕްރިލް މަހުގެ 14 ވަނަ ދުވަހެވެ.
