ދިވެހިބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހިމް މެރިޓައިމް އޭޝިއާ ހެރިޓޭޖް މަޝްރޫޢުގެ ލީޑަރ ޕްރޮފެސަރ މައިކަލް ފީނާއާ ބައްދަލު ކުރައްވައިފިއެވެ.މެރިޓައިމް އޭޝިއާ ހެރިޓޭޖަކީ އޭޝިއާ ސަރަހައްދުގެ ޤައުމުތަކުގެ މާއްދީ ތަރިކަތައް ޑިޖިޓަލައިޒް ކުރުމުގެ މަސައްކަތުގައި ފުޅާ ދާއިރާއެއްގައި ހަރަކާތްތެރިވަމުން އަންނަ އޯގަނައިޒޭޝަނެކެވެ.
ދިވެހިބަހާއި ސަގާފަތާއި ތަރިކައާ ބެހޭ ވުޒާރާގައި މިއަދު ކުރިއަށްދިޔަ މި ބައްދަލުވުމުގައި ޕްރޮފެސަރ މައިކަލް ފީނާ ވަނީ އެ އޯގަނައިޒޭޝަން އުފެދިގެން އައި ގޮތާއި އެ އޯގަނައިޒޭޝަނުން ކުރިއަށް ގެންދާ މަޝްރޫޢުތަކާ ބެހޭ މަޢުލޫމާތު ވަޒީރާ ހިއްސާ ކުރައްވައިފައެވެ.
ޕްރޮފެސަރ މައިކަލް ފީނާ ގެ ބެއްލެވުމުގެދަށުން މެރިޓައިމް އޭޝިއާ ހެރިޓޭޖް ގެ ފަރާތުން ވަނީ ޖަޕާނުގެ ކިޔޯޓޯ ޔުނިވަރސިޓީއާ ގުޅިގެން ދިވެހިރާއްޖޭގެ ގަދީމީ އާސާރީ ބިނާތަކާއި ބައެއް އާސާރީ އެއްޗެތި ޑިޖިޓަލައިޒް ކުރުމުގެ މަޝްރޫޢެއް ކުރިއަށް ގެންގޮސްފައެވެ. މިއަދުގެ މި ބައްދަލުވުމުގައި ވަނީ އެ މަޝްރޫޢާ ބެހޭ ގޮތުން ތައްޔާރުކުރައްވާފައިވާ ތަފްސީލު ޕްރެޒެންޓޭޝަނެއް ހުށަހަޅުއްވައިދެއްވާފައެވެ.
މި ޕްރެޒެންޓޭޝަންގައި ޕްރޮފެސަރ މައިކަލް ފީނާ ވަނީ ދިވެހިރާއްޖޭގެ އާސަރީ ތަންތަނާއި ތަކެތި ޑިޖިޓަލައިޒްކޮށް ތުރީޑީ ކުރުމުގެ މަސައްކަތް ކުރިއަށް ގެންދެވި ގޮތާ ބެހޭ މަޢުލޫމާތު ހިއްސާކުރައްވައިފައެވެ. އެގޮތުން، ރާއްޖޭގައި ހުރި އާސާރީ ތަރިކަތަށްހޯދައި، އެތަކެތި ސާފުކޮށް، ފޮޓޯނަގައި، ސްކޭންކޮށް އެ ޑާޓާ ކިޔޯޓޯ ޔުނިވަރސިޓީއަށްފޮނުއްވަވަމުން ގެންދެވިކަމަށާއި އޭގެފަހުން ކިޔޯޓޯ ޔުނިވަރސިޓީން އެ ޑާޓާތައްސާފުކޮށް، އެނަލައިޒްކޮށް އެއިން ފައިނަލް ޑިޖިޓަލް ސްކޭން ނަންގަވާކަމަށް ޕްރޮފެސަރވިދާޅުވިއެވެ.
ޕްރޮފެސަރ ގެ ވާހަކަފުޅުގައި ރާއްޖޭގެ މާއްދީ ތަރިކަ ޑިޖިޓަލައިޒް ކުރުމަށް ކުރެއްވުނު މަސައްކަތްޕުޅުގައި ފާހަގަކުރެއްވުނު ބައެއް މުހިންމު ކަންކަން ފާހަގަކުރައްވާފައިވެއެވެ. އެގޮތުން، ރާއްޖޭގެ ތަރިކަތައް ނެތިދިއުމަށް ދިމާވާ ބައެއް ސަބަބުތައް ފާހަގަކުރައްވަމުން އޭނާ ވިދާޅުވީ 2004 ވަނަ އަހަރުގެ ސުނާމީގެ ސަބަބުން ދިވެހިރާއްޖޭގެ ގިނަ އާސާރީ ބިނާތަކަކަށް ގެއްލުން ލިބިފައިވާކަމަށެވެ. އަދި ރަށްގިރުމާއި ތަރައްޤީއަށް ކުރާ ބައެއް މަސައްކަތްތަކާއި މީހުންނަށް ނޭނގި ކުރެވޭ ކަންކަމުގެ ސަބަބުން ލިބޭ ގެއްލުންތައް ވެސް ފާހަގަކުރެއްވިފައިވާކަމަށް ވިދާޅުވިއެވެ.
ރާއްޖޭގެ އާސާރީ ތަރިކަތައް ޑިޖިޓަލައިޒް ކުރުމަށް ކުރިއަށް ގެންދާ މަޝްރޫޢުގެ އެންމެ މުހިންމު އެއްބޭނުމަކީ، އެކި ސަބަބުތައް މެދުވެރިވެގެން އާސާރީ ބިނާތައްނެތިދިޔަކަމަށްވިޔަސް، އެތަކެތި ވުޖޫދުގައި ހުރިކަމުގެ ހެކި ޑިޖިޓަލް ލައިބްރަރީތަކުގައި ފެންނަން ހުރުން ކަމަށް ޕްރޮފެސަރ މައިކަލް ފީނާ ވިދާޅުވިއެވެ.
ކުރިއަށް އޮތް ތަނުގައި ދިވެހިބަހާއި ސަގާފަތާއި ތަރިކައާ ބެހޭ ވުޒާރާއާއި މެރިޓައިމް އޭޝިއާ ހެރިޓޭޖް ގުޅިގެން ދިވެހިރާއްޖޭގައި ކުރިއަށް ގެންދެވިދާނެ ސަގާފީ ތަރިކައާ ގުޅުންހުރި މަޝްރޫޢުތަކާ ބެހޭ ގޮތުން މި ބައްދަލުވުމުގައި ވަނީ މަޝްވަރާ ކުރައްވާފައެވެ.
25 ޝަޢްބާން 1445
6 މާރިޗު 2024
