ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ މަސައްކަތްތަކާ ގުޅޭ ގޮތުން ނޫސްވެރީންނާ މައުލޫމާތު ހިއްސާކުރައްވައިފި.
ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ ފާއިތުވި 6މަސް ދުވަހުގެ މަސައްކަތްތަކާއި ކުރިއަށް ރާވާފައިވާ މުހިންމު މަސައްކަތްތަކާ ގުޅޭ ގޮތުން ނޫސްވެރީންނާ މަޢުލޫމާތު ހިއްސާކުރައްވައިފިއެވެ. ދިވެހިރާއްޖޭގެ އަޑުގެ ސެނެކޯ މާލަމުގައި މިއަދު ބޭއްވި ނޫސްވެރީންގެ ބައްދަލުވުމުގައި ނޫސްވެރީންނާ މަޢުލޫމާތު ހިއްސާ ކުރެއްވީ ވަޒީރު އާދަމް ނަސީރު އިބްރާހީމެވެ. ވަޒީރުގެ އަރިހުގައި ވަޒީރުގެ ދެ ނައިބުން ކަމަށްވާ އަޙްމަދު އަނޫޝް އަދި ވަދީފާ ޙަސަންގެ އިތުރުން ވުޒާރާގެ ޑިރެކްޓަރ ޖެނެރަލް ޢާތިކާ އިބްރާހީމް ބައިވެރިވެވަޑައިގެންނެވިއެވެ.
ނޫސްވެރީންގެ މި ބައްދަލުވުމުގައި ދިވެހިބަހާއި ސަގާފަތާއި ތަރިކައާ ބެހޭ ދާއިރާއިން ކުރަމުންދާ މަސައްކަތްތަކާއި ދިވެހި ޤައުމިއްޔަތު އިއާދަކުރުމަށް މި ސަރުކާރުން ކުރަމުންދާ މަސައްކަތްތަކުގެ އަދާހަމަ ހިއްސާ ކުރެއްވުމުގެ އިތުރުން 1445 ވަނަ އަހަރުގެ އަޟްޙާ ޢީދާއި މި އަހަރުގެ މިނިވަން ދުވަހަށް ވަމުންދާ ތައްޔާރީތަކާ ގުޅޭ ގޮތުން މަޢުލޫމާތު ޙިއްސާ ކުރެއްވިއެވެ. އަދި, “ޕޮއެޓްރީ ތެރަޕީ” އާއި “އިންޓަރެކްޓިވް މިއުޒިއަމް” އާ ގުޅޭ މަސައްކަތްތަކުގެ ތަފްސީލުތައް ވެސް ވަޒީރުވަނީ ހިއްސާ ކުރައްވާފައެވެ.
މިއަދުގެ ނޫސްވެރީންގެ ބައްދަލުވުމުގައި މިި ވުޒާރާގެ ޑިރެކްޓަރ ޖެނެރަލް އަލްފާޟިލާ ޢާތިކާ އިބްރާހީމް ވިދާޅުވީ, މި ވުޒާރާއާ ގުޅިގެން އަޟްޙާ ޢީދު ފާހަގަ ކުރުމަށް ޝައުގުވެރިވާ ރަށްރަށުން އެކަމަށްއެދި ޕްރޮޕޯސަލް ހުށަހެޅުމުގެ ފުރުސަތު 25 އެޕްރީލްގައި ހުޅުވައިލެވި, ޖުމްލަ 26 ރަށަކުން ލިބުނު ޕްރޮޕޯސަލްތައް ބަލައި މާކްސް ދިނުމަށް ވުޒާރާއިން އެކުލަވައިލި ޚާއްޞަ ކޮމިޓީއަކުން މިހާރު ޢީދުގެ ހަރަކާތްތަކެއް ބާއްވާނެ 3 ރަށެއް ކަނޑައަޅާފައިވާ ކަމަށެވެ. އަދި އެންމެ ލަސްވެގެން މާދަމާ މިރަށްތައް އިޢުލާން ކުރައްވާނެ ކަމުގައި ޢާތިކާ ވިދާޅުވިއެވެ.
އަދި މިއަހަރުގެ މިނިވަން ދުވަސް ފާހަގަކުރުމަށް ކުރިއަށް ގެންދިއުމަށް ރާވާފައިވާ ހަރަކާތްތަކާ ބެހޭ މައުލޫމާތު ވެސް ވަނީ ހިއްސާ ކުރައްވާފައެވެ. އޭގެތެރޭގައި މިނިވަން ދުވަހުގެ ރަސްމީ ޖަލްސާ, ރައީސުލްޖުމްހޫރިއްޔާގެ ޚިޠާބު, ދިދަ ނެގުން, ހެވިކަމާއި ކުޅިވަރު, ފުޅަނދުބުރު, ކާނިވާ, މިނިވަން ދުވަހުގެ ހާއްސަ ދުވުން, ސާގާފީ ޝޯ އާއި ކާބޯތަކެތީގެ މައުރަޒު, ކުޑަކުދީންގެ ހަވީރު, ފިޔަވަތީގައި ތިބޭ ކުދީންނަށް ހާއްސަ ހަވީރު, އިސްރަށްވެހީންގެ ބައްދަލުވުން އަދި ސްޓޭޖް ޝޯތައް ހިމެނެއެވެ. މިނިވަން ދުވަހުގެ ރަސްމީ ޖަލްސާގައި ދައުލަތަށް 35 އަހަރަށްވުރެ ގިނަ ދުވަހު ޚިދުމަތް ކުރެއްވި ފަރާތްތަކަށް އިނާމު ދެއްވުން ވެސް އޮންނާނެއެވެ.
ރައީސް ޑރ މުޙައްމަދު މުޢިއްޒުގެ ސަރުކާރުގެ ލަނޑުދަނޑިތައް ހާސިލް ކުރެވެމުންދާ މިންވަރާއި، ދީނާއި, ޤައުމާއި ރައްޔިތުންގެ ލާބައާއި މަންފާއަށް ކުރެވެމުންދާ މަސައްކަތްތަކުގެ ސާފު އަދި ތެދު މައުލޫމާތު ގެނެސްދިނުމުގެ މަގުސަދުގައި ވުޒާރާތަކުން ކޮންމެ މަހަކު އެއް ފަހަރު ނޫސްވެރީންގެ ބައްދަލުވުމެއް ބޭއްވުމަށް ވަނީ ނިންމާފައެވެ.
17 ޛުލްޤަޢިދާ 1445
25 މޭ 2024
