ސީނުކަރައިން  ރާއްޖެއަށް ކަނޑައަޅުއްވާފައި ހުންނަވާ ސަފީރު ހަރ އެކްސެލެންސީ ވަން ލީ ޝިން ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމްގެ އަރިހަށް އިޙްތިރާމުގެ ޒިޔާރަތެއް ކުރައްވައިފިއެވެ. މި ބައްދަލުކުރެއްވުމުގައި މި ވުޒާރާއާ ސީނުކަރައާ ދެމެދު ފަހުމުނާމާއެއް އެކުލަވައިލައި، ދެ ޤައުމުގެ ކަލާސިކީ ލިޔުންތައް ތަރުޖަމާކޮށް ޗާޕުކުރުމާ ގުޅޭ ގޮތުން މަޝްވަރާކުރެވުނެވެ. މި ބައްދަލުވުމުގައި ދާރުލްއާސާރުގެ އިމާރާތް މަރާމާތުކުރުމާއި އާސާރު ތަރައްޤީކުރުމާ ބެހޭ ކަންކަމުގައި ސީނުކަރައިން ފުރިހަމައަށް އެއްބާރުލުމާއި އެހީތެރިކަން ދެއްވާނެކަމަށް ސަފީރު ވިދާޅުވިއެވެ. ވަޒީރު އާދަމް ނަޞީރު އިބްރާހީމްގެ ވާހަކަފުޅުގައި ރައީސް ޑރ. މުޙައްމަދު މުޢިއްޒުގެ ސަގާފީ ތަރިކައާ ބެހޭ ތަޞައްވުރުގެ ހޭލުންތެރިކަމާއެކު ދާރުލްއާސާރަށް ޒިޔާރަތްކުރާ މަދަރުސާކުދީންނާއި އާންމު އިތުރުވަމުންދާކަން ފާހަގަކުރެއްވިއެވެ. މި ބައްދަލުވުން ނިންމަވާލައްވަމުން ދެ ބޭފުޅުންވެސް ދެ ޤައުމުގެ މެދުގައި އޮތް ގުޅުން އިތުރަށް ބަދަހި ކުރުމާ ގުޅޭ ގޮތުން ވަނީ ވާހަކަފުޅު ދައްކަވާފައެވެ.

ދިވެހިބަހާއި ސަގާފަތާއި ތަރިކައާ ބެހޭ ވުޒާރާ

13 ރަޖަބު 1445

25 ޖަނަވަރީ 2024