ދިވެހިބަހަށް އާރޯކަން ގެނައުމުގައި އެންމެ ތާޒާ ފެނެއް ވެއްސޭނީ ނޫސްވެރީންގެ ގަލަމުން ކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ. ވަޒީރު މިހެން ވިދާޅުވީ ރިވާޔާ ނިއުސް އިފްތިތާޙް ކުރުމަށް ރޭ ބޭއްވި ޙަފްލާ ޝަރަފުވެރި ކޮށްދެއްވައި ވާހަކަފުޅު ދައްކަވަމުންނެެވެ.

ރިވާޔާ ނިއުސް އިފްތިތާޙް ކޮށްދެއްވީ އެކަމަށްޓަކައި އެނޫހުގެ ފަރާތުން ރޭ ސޮލައިޓް ރެސްޓޯރެންޓްގައި ބޭއްވި ޚާއްސަ ޙަފްލާގައި ވަޒީރު އާދަމް ނަޞީރު އިބްރާހީމެވެ. މި ރަސްމިއްޔާތުގައި ވަޒީރުގެ އިތުރުން، މޯލްޑިވްސް ބްރޯޑްކާސްޓިންގ ކޮމިޝަންގެ މެންބަރު އަލްފާޟިލާ އާމިނަތު އަމީނާއާއި އިންފޮމޭޝަން ކޮމިޝަނަރސް އޮފީހުގެ ޑިރެކްޓަރ ޖެރެނަލް އަލްފާޟިލް ޙަސަން ޝާކިރު މުޙައްމަދުވެސް ބައިވެރިވެވަޑައިގެންނެވިއެވެ. އަދި ރިވާޔާ ނޫހުގެ ޗީފް އެޑިޓަރުން ކަމަށްވާ ޑރ އަޙްމަދު އަސްލަމް ޢަބްދުﷲ އަދި ޢާއިދާ ޢަބްދުލްޙަކީމާއި އެނޫހުގެ މުވައްޒަފުން ބައިވެރިވެވަޑައިގެންނެވިއެވެ.

މި ރަސްމިއްޔާތުގައި ބައިވެރިވެވަޑައިގެން ވަޒީރު ދެއްކެވި ވާހަކަފުޅުގައި އިތުރަށް ވިދާޅުވީ ނޫސްވެރީންގެ ޢިބާރާތްކުރުންތައް އަސަރުގަދަކޮށް، ފަސޭހައިން ދޭހަވާ ގޮތަށް، އަޚްލާޤީ ވަކި މިނެއްގައި ހުރުމުން، އަދަބީ ގޮތުންނާއި އިޖްތިމާޢީ ގޮތުން ހެޔޮ އަސަރު ކުރާނޭ ކަމަށެވެ.

އެ ނޫހުގެ ޗީފް އެޑިޓަރ ޑރ. އަޙްމަދު އަސްލަމް މި ޙަފްލާގައި ދެއްކެވި ވާހަކަފުޅުގައި ރިވާޔާ ނޫހަކީ އިންސާނީ ކަރާމާތް ނުގެއްލޭނެ ގޮތަކަށް ޚަބަރާއި މުނިފޫހިފިލުވުމުގެ މަޢުލޫމާތު މުޅި މުޖުތަމައަށް ފޯރުކޮށްދިނުމުގެ މަގުސަދުގައި ނެރުނު ނޫހެއް ކަމަށް ވިދާޅުވިއެވެ.

25 ޝައްވާލް 1445

4 މޭ 2024