ފަޟީލަތުއްޝައިޚް އަލްއުސްތާޛު އަލްމަރްޙޫމް މުޙަންމަދު ޖަމީލު ދީދީ އަކީ ދިވެހި އަދަބީ ގުލްޝަނުގައި ހިމެނޭ މޮޅު އަދީބެކެވެ. އެމަނިކުފާނު ދުނިޔޭގެ އަލިކަން ދެކެވަޑައިގަތީ 01 މެއި 1915މ. ގައެވެ. އެމަނިކުފާނަކީ ދިވެހި ގައުމަށް ޢިލްމީ، ދީނީ، އަދި އަދަބީ ޚިދުމަތްތަކެއް ކޮށްދެއްވި ބޭފުޅެކެވެ.
އެމަނިކުފާނަކީ ސާދާ ދިރިއުޅުއްވުމެއް އުޅުއްވި، ވަޤުތަށް ކަމޭހިތްތެވި، މުރާލި ކަމުގެ ރީތި ނަމޫނާ އެކެވެ. ދީނަށް ޙުރުމަތްތެރިކޮށް ހިތްތެވުމާއި އިންސާނީ ރީތި ސިފަތަކަކީ ޙަޔާތުގެ ޝިޢާރު ކަމަށް ހެއްދެވި ބޭފުޅެކެވެ.
އައްޝައިޚުލްއުސްތާޛުލް އަލްމަރްޙޫމް މުޙަންމަދު ޖަމީލު ދީދީ އަކީ ދިވެހިންގެ މެދުގައި މަޝްހޫރު މިސާލެއްގައި ބުނެވޭ ފަދައިން ފަސްމީރު ކުރި ރުކެކެވެ. އިންސާނުން ފަޚުރުވެރިވާ އެތައް ސިފައެއް އެއްފަހަރާ އެއްކޮށްލައްވައިގެން ހުންނެވި އާދަޔާ ޚިލާފު ޝަޚުޞިއްޔަތެކެވެ. އަލްއުސްތާޛު މުޙައްމަދު ޖަމީލު ދީދީ އަކީ ކުޅަދާނަ އަދީބެކެވެ. ހަމައެހާމެ ކުޅަދާނަ ޝާޢިރެކެވެ. އެފަދަ ދެވަނައެއް ނެތް މުޞައްނިފެކެވެ. ފުންނާބުއުސް ޢާލިމެކެވެ. ލަވަ ކިޔުންތެރި އެކެވެ. މުފައްކިރެކެވެ. މުފައްސިރެކެވެ. މުދައްރިސެކެވެ. ވަރަށް މުރާލި އިދާރީ ހިންގުންތެރި އެކެވެ.