މެލޭޝިޔާގައި ދިރިއުޅޭ ދިވެހީންނަށް ހާއްސަ ސަގާފީ ޕްރޮގްރާމްތައް ހިންގުމާ ގުޅޭ ގޮތުން މަޝްވަރާކުރައްވައިފި.

މެލޭޝިޔާގައި ހުންނަ ދިވެހި ހައިކޮމިޝަންގެ ފަރާތުން، ދިވެހިވަންތަ ގޮތްތަކާއި ދިވެހި ސަގާފަތް އިއާދަ ކުރެވޭނެ ފަދަ ޕްރޮގްރާމްތައް ހިންގުމާ ބެހޭ ގޮތުން ދިވެހިބަހާއި ސަގާފަތާއި ތަރިކައިގެ ވަޒީރު އާދަމް ނަޞީރު އިބްރާހީމާ މިއަދު މަޝްވަރާ ކުރައްވައިފިއެވެ. އޮންލައިންކޮށް ކުރިއަށް ދިޔަ މި ބައްދަލުވުމުގައި ދިވެހިރާއްޖެއިން މެލޭޝިޔާއަށް ކަނޑައަޅުއްވާފައި ހުންނަވާ ސަފީރު ޑރ. މަރިޔަމް ޝަބީނާ އަޙްމަދު ބައިވެރިވެވަޑައިގެންނެވިއެވެ.

މި ބައްދަލުކުރެއްވުމުގައި ވަޒީރު އާދަމް ނަޞީރު އިބްރާހީމް ވަނީ މެލޭޝިޔާގައި ދިރިއުޅޭ ދިވެހީންގެ އާބާދީއަށް، ވަކިން ހާއްސަކޮށް ޒުވާނުންނާއި ކުޑަކުދީން ދިވެހި ސަގާފަތުގެ ތެރޭގައި ގެންގުޅުމުގެ މުހިންމުކަން ފާހަގަކުރައްވާފައެވެ. އަދި މެލޭޝިޔާއަކީ ތާރީޚާއި ތަރިކަ ރައްކާކުރުމުގެ ރޮނގުން ކުރިއަރާފައިވާ ޤައުމެއްކަން ފާހަގަކުރައްވައި، ހައިކޮމިޝަން މެދުވެރިކޮށް ދިވެހީންނަށް މެލޭޝިޔާގައި މި ދާއިރާއިން ތަމްރީނާއި ސްޓަޑީ ޓުއަރގެ ފުރުސަތު ލިބޭނޭ ގޮތް ހަމަޖެހުމަކީ ރާއްޖެއަށް އޭގެ ހެޔޮ މަންފާ ކުރާނެ ކަމެއް ކަމުގައި ވަޒީރު ފާހަގަކުރެއްވިއެވެ. އަދި ރާއްޖޭގެ ތަރިކަ ރައްކާކުރާ ހާއްސަ މަރުކަޒެއްގެ މަސައްކަތް މިހާރު މި ވުޒާރާއިން ކުރަމުން ގެންދާ އިރު، އެމަރުކަޒުގެ މުހިންމު އެއް ބައި ކަމުގައި ވާ، ރެސްޓޮރޭޝަން ލެބްގެ މަސައްކަތަށް މެލޭޝިޔާގެ ޒަމާނީ ވަސީލަތްތައް ލިބޭނޭ ގޮތް ވުމަކީ މި މަސައްކަތަށް ލިބޭނޭ އިތުރު ކުރިއެރުމެއް ކަމުގައި ދެކެވަޑައިގަންނަވާ ކަމުގައި ވެސް ވަޒީރު ވިދާޅުވިއެވެ.

މި ބައްދަލުވުމުގައި މެލޭޝިޔާ އެމްބަސީން ކުރިއަށް ރާވާ ހަރަކާތްތަކުގައި ދިވެހި ސަގާފަތް ރަމްޒުވާނެ ގޮތަށް ކަންކަން ފަރުމާ ކުރުމަށް މި ވުޒާރާގެ އެހީތެރިކަމަށް ހައިކޮމިޝަނަރ ވަނީ އެދިވަޑައިގަނެފައެވެ. އަދި އަޟްޙާ ޢީދާއި މިނިވަން ދުވަހުގެ މުނާސަބާ ފާހަގަކުރުމަށް ރާވާ ހަރަކާތްތަކާއި ކުޅިވަރުތައް، ދިވެހިވަންތަ ގޮތަށް ރޭއްވެވުމަށް މިވުޒާރާގެ ފަންނީ އެހީ ބޭނުންފުޅުވާކަމަށް ހައިކޮމިޝަނަރ ފާހަގަކުރެއްވިއެވެ.

މި ބައްދަލުކުރެއްވުމުގައި މަލޭޝިޔާ ހައިކޮމިޝަނަރގެ އަރިހުގައި ޑެޕިޔުޓީ ހައި ކޮމިޝަނަރ އިބްރާހީމް ޝާޒް ޙަބީބާއި ކައުންސިލަރ އައިމިނިތު މުޙައްމަދު ބައިވެރިވެވަޑައިގެންނެވިއެވެ.

28 ޛުލްޤަޢިދާ 1445

5 ޖޫން 2024