1445 ވަނަ އަހަރުގެ ރޯދައާ ދިމާކޮށް ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ކުރިއަށް ގެންދާ ޚާއްޞަ ހަރަކާތްތަކުގެ ތެރޭގައި ހިމެނޭ “ރޯދަ ސާފު” ޕްރޮގްރާމުގެ ދަށުން މާލެ ސަރަހައްދު ސާފުކުރުން މިއަންނަ ހޮނިހިރު ދުވަހު އޮންނާނެއެވެ. މާލެ ސަރަހައްދު ސާފުކުރުމުގެ މި ހަރަކާތް ކުރިއަށް ގެންދިއުމަށް ހަމަޖެހިފައިވަނީ މާލެއާއި ހުޅުމާލެއާއި ވިލިމާލޭގައެވެ.
މާލެއާއި ވިލިމާލެ ބައިތަކަކަށް ބަހާލައި މި ހަރަކާތުގައި ބައިވެރިވާ ޓީމުތައް އެކި ބައިތައް ސާފުކުރާގޮތަށް ހަމަޖެހިފައިވާއިރު ހުޅުމާލޭގައި ސާފު ކުރުމުގެ ހަރަކާތް ކުރިއަށް ގެންދާނީ އެޗްޑީސީ އާއި ވެމްކޯ ގުޅިގެންނެވެ. “ރޯދަ ސާފު” ހަރަކާތުގައި ބައިވެރިވާ މުއައްސަސާތަކުގެތެރޭގައި މި ވުޒާރާގެ އިތުރުން، އެމްޑަބްލިއުއެސްއީ އާއި ކެޑޭޓް ކޯރ އާއި އެމްޕީއެލް އާއި ޤައުމީ ދިފާޢީ ބާރާއި ދިވެހި ފުލުހުންގެ ޚިދުމަތާއި އިސްލާމީ ކަންތައްތަކާ ބެހޭ ވުޒާރާ އާއި ދަތުރުފަތުރާއި މަދަނީ އުދުހުންތަކާ ބެހޭ ވުޒާރާ އާއި ފެމިލީ ކޯޓާއި މޯލްޑިވްސް ކަސްޓަމްސް ސަރވިސަސް އާއި ރީޖަނަލް އެއަރޕޯޓްސް އާއި އާރުޑީސީ އާއި ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއި އެމްޓީސީސީ އާއި ސްޓެލްކޯ އާއި މާލެ ސިޓީ ކައުންސިލު ވެސް ހިމެނެއެވެ.
9 މާރިޗު ވާ ހޮނިހިރު ދުވަހުގެ ހެނދުނު 6 ން މެންދުރު 12 ށް މި ހަރަކާތް ކުރިއަށް ގެންދިއުމަށް ހަމަޖެހިފައިވާއިރު، ހަރަކާތް ފެށުމުގެ ގޮތުން ބާއްވާ ރަސްމިއްޔާތު އެދުވަހު ހެނދުނު 6 ޖަހާއިރު މާލޭ ހެދިގޮނޑުދޮށް ސަރަހައްދުގައި އޮންނާނެއެވެ.ރަސްމިއްޔާތަށް ފަހު ސާފު ކުރުމުގެ ހަރަކާތުގައި ބައިވެރިވާ ޓީމުތަކުން އެ ޓީމަކަށް ކަނޑައެޅިފައިވާ ސަރަހައްދަށް ގޮސް ސާފުކުރުން ފެށޭނެއެވެ. ކޮންމެ ސަރަހައްދެއްވެސް ސާފު ކުރަމުންދާނީ އެ ސަރަހައްދަކަށް ކަނޑައެޅޭ ގްރޫޕް ލީޑަރެއްގެ ބެލުމުގެދަށުންނެވެ.
”ރޯދަ ސާފު” ހަރަކާތް ހިނގަމުންދާއިރު މި ވުޒާރާގެ ފަރާތުން ބައިވެރީންނަށް ބޯފެނާއި ބުއިމާއި ލުއި ކާނާ ފޯރުކޮށްދެމުން ގެންދާނެއެވެ. އަދި ދިމާވެދާނެ ކުއްލި ސިއްޙީ ކަންކަމުގައި ހަރަކާތްތެރިވާނެ ފުރަތަމަ އެހީގެ ޓީމެއް ވެސް ތައްޔާރުކުރެވިފައި އޮންނާނެއެވެ.
މި އަހަރުގެ ރޯދައާ ދިމާކޮށް ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ކުރިއަށްގެންދާ “ރޯދަ ސާފު” ހަރަކާތުގައި މިހާތަނަށް އައިއިރު ގިނަ އަދަދެއްގެ ރަށު ކައުންސިލުތަކުން ވެސް ވަނީ ބައިވެރިވެ، އެރަށްރަށުގައި ސާފު ކުރުމުގެ ހަރަކާތްތައް ކުރިއަށް ގެންގޮސްފައެވެ. “ރޯދަ ސާފު” ހަރަކާތަކީ ކުރިއަށް އޮތް ތަނުގައި ކޮންމެ ރޯދަ މަހަކާ ދިމާކޮށް ސިލްސިލާކޮށް ކުރިއަށް ގެންދިއުމަށް ހަމަޖެހިފައިވާ ހަރަކާތެކެވެ.
26 ޝަޢްބާން 1445
7 މާރިޗު 2024
