ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިލާ އިންޓަރނޭޝަނަލް ހައި ސްކޫލުން އަތޮޅު ތެރެއަށް ކުރާ ސަގާފީ ދަތުރުގައި މިއަހަރު ބައިވެރިވާ 30 ދަރިވަރުންނާ މިއަދު އެ ސްކޫލުގައި ބައްދަލު ކުރައްވައިފިއެވެ.
ދިވެހިބަހާއި ސަގާފަތާއި ތާރީޚާއި ތަރިކަ ދިރާސާކޮށް މަޢުލޫމާތު އެއްކޮށް ތަޖުރިބާ ކުރުމުގެ ފުރުޞަތު ދަރިވަރުންނަށް ވިލާ ހައި ސްކޫލުން ތަނަވަސް ކޮށްދެއްވާ ކަމީ ވަޒީރުގެ ހިތްޕުޅަށް ވަރަށް ބޮޑު ހަމަޖެހުމެއް ލިބިވަޑައިގަންނަވާ ކަމެއް ކަމުގައި އެމަނިކުފާނު ވިދާޅުވިއެވެ.
“އަޅުގަނޑު މިއަދު މި ސްކޫލަށް މިއައީ ތިޔަކުދިންނާ ބައްދަލުކޮށްލަން ވަރަށް ބޭނުންވެގެން. ތިޔަ ކުދިން ލ. އަތޮޅަށް ކުރުމަށް ހަމަޖެހިފައިވާ ސަގާފީ ދަތުރުން ތިޔަ ކުދިންނަށް ކުރާނޭ ފައިދާ، މަންފާ ވަޒަން ކުރެވޭތީ. ތިޔަ ކުދިންގެ މަސައްކަތްތަކަށް ހިތްވަރު ދޭން ބޭނުންވާތީ.” ވަޒީރު އާދަމް ނަޞީރު އިބްރާހީމް ދަރިވަރުންނާ މުޚާޠަބު ކުރައްވާ ވިދާޅުވިއެވެ.
މި ބައްދަލުވުމުގައި ޤައުމިއްޔަތަކީ ކޮބައިކަމާއި، ދިވެހިންނާއި ޤައުމާއި ދިވެހިރާއްޖެ އަކީ ކޮބައިކަން ދަރިވަރުންނަށް ވަޒިރު އޮޅުން ފިލުއްވައިދެއްވިއެވެ. ދިވެހިބަހާއި ސަގާފަތާއި ތަރިކަ ބަލައި ދިރާސާކޮށް ދިވެހިރާއްޖެ ދަސްކުރުމަށް ވަޒީރު އާދަމް ނަޞީރު އިބްރާހީމް ދަރިވަރުންނަށް ބާރު އެޅުއްވިއެވެ. އަދި މި ދާއިރާތަކުން މަޢުލޫމާތު އެއްކޮށް ދިރާސާ ކުރުމުގައި ނަޒަރު ހިންގަންވީ ގޮތްތަކާއި ހަމަތައް ވަޒީރު ދަރިވަރުންނާ ހިއްސާ ކުރެއްވިއެވެ.
ވަޒީރު އާދަމް ނަޞީރު އިބްރާހީމް މި ބައްދަލުވުމުގައި ވާހަކަފުޅު ދައްކަވަމުން ވިލާ އިންޓަރނޭޝަނަލް ހައި ސްކޫލަށް ޝުކުރު އަދާކުރެއްވިއެވެ.
“ދަރިވަރުންގެ ހިތްތަކުގައި ޤައުމިއްޔަތު ދިރުވައި އާލާ ކުރުމަށް މި ޙަރަކާތުން ކުރާނެ ހެޔޮ އަސަރު އަޅުގަނޑަށް ވިސްނޭ. ވިލާ އިންޓަރނޭޝަނަލް ހައި ސްކޫލަށް އަޅުގަނޑު ޝުކުރު ދަންނަވަން” ވަޒީރު ވިދާޅުވިއެވެ.
މިއީ ދިވެހިބަހާއި ބަހުރުވަތަކާއި ރާއްޖޭގެ ސަގާފަތާއި ތަރިކަ އަދި ރަށްރަށާއި އަތޮޅުތަކުގެ ޖޯގުރަފީ، ދަރިވަރުންގެ ފެންވަރުގައި ދިރާސާކޮށް ދެނެގަތުމަށް ދިވެހި ތަޢުލީމީ ނިޒާމުގައި އިންތިޒާމުވެ ހިންގާ އެންމެ ދުވަސްވީ ޙަރަކާތްކަމަށް ވިލާ އިންޓަރނޭޝަނަލް ހައި ސްކޫލުން މަޢުލޫމާތުދެއްވައެވެ.
ވިލާ އިންޓަރނޭޝަނަލް ހައި ސްކޫލުގެ ސަގާފީ ދަތުރު މިއަރު ކުރުމަށް ހަމަޖެހިފައިވަނީ 2024 ފެބުރުއަރީ 04 ން 10 އަށް ހައްދުންމަތީ އަތޮޅަށެވެ. ހައްދުންމަތީގެ ހުރިހާ ރަށަކަށް ދަތުރުގައި ބައިވެރިވާ 30 ދަރިވަރުން ޒިޔާރަތް ކުރުމަށް ހަމަޖެހިފައިވާ ކަމަށް ވިލާ އިންޓަރނޭޝާނަލް ހައި ސްކޫލުން މަޢުލޫމާތު ދެއްވަ އެވެ.
31 ޖެނުއަރީ 2024
