ވިހި ވަނަ ޤަރުނުގެ ދިވެހީން ދުށް ހުވަފެން ޙަޤީޤަތަކަށް ހައްދަވައިދެއްވީ އަދުގެ ރައީސް ޑރ. މުޙައްމަދު މުޢިއްޒު -ވަޒީރު އާދަމް ނަޞީރު އިބްރާހީމް
ވިހި ވަނަ ޤަރުނުގެ ދިވެހީން ދުށް ހުވަފެން ޙަޤީޤަތަކަށް ހައްދަވައިދެއްވީ އަދުގެ ރައީސް ޑރ. މުޙައްމަދު މުޢިއްޒު މިސަރުކާރާ އެކު ކަމުގައި ދިވެހި ބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ.
ވަޒީރު މިފަދައިން ވިދާޅުވީ ޖުމްހޫރީ ދުވަހުގެ މުނާސަބަތުގައި އާދިއްތަ ދުވަހުގެ ރޭ ދަރުބާރުގޭގައި ބޭއްވި ރަސްމީ ޖަލްސާގައި މަރުޙަބާއާއި ޝުކުރު ދެންނެވުމުގެ ގޮތުން ދެއްކެވި ވާހަކަފުޅުގައެވެ.
ވަޒީރުގެ ވާހަކަފުޅުގައި އިތުރަށް ވިދާޅުވީ، ޖުމްހޫރިއްޔަތެއްގައި ރައްޔިތުންނަށް ލިބޭ ޙަޤީޤީ ފައިދާ ބިނާ ވެގެން ދާނީ ވެރީންގެ އިޚްލާޞްތެރިކަމުގެ މައްޗަށްކަމަށެވެ. އެގޮތުން ބަލާއިރު، އަދުގެ ރައީސުލްޖުމްހޫރިއްޔާ ޑރ. މުޢިއްޒުގެ ހިތްޕުޅުގައި އޮތް ލޯބި މި ޤައުމަށް ހުށަހެޅުއްވީ ސާފުކަމާއި އިޚްލާޞްތެރިކަމާ އެކުގައި ކަމުގައްޔާއި، އެ އިޚްލާޞްތެރިކަން ދިވެހި ރައްޔިތުން ޤަބޫލު ކުރި ކަމުގައި ވިދާޅުވިއެވެ.
އަދި މި ހުވަފެން ޙަޤީޤަތަކަށް ހެއްދެވުމުގެ ޢަމަލީ މަސައްކަތްވެސް ރައީސް ވަނީ ފަށްޓަވާފައި ކަމުގައި ވިދާޅުވެ، 20 އަހަރު ދުވަހުގެ ސްޓްރެޓީޖިކް މާސްޓަރ ޕްލޭނަށް އަލިއަޅުއްވައިލައްވައިފައިވެއެވެ. އަދި މަސައްކަތަށް ރައްޔިތުންގެ ޚިޔާލާއި މަޝްވަރާ ދެއްވުމަށް އެދިވަޑައިގަންނަވާ ކަމުގައި ވެސް ވަޒީރު ވަނީ ވިދާޅުވެފައެވެ.
8 ޖުމާދަލްއޫލާ 1446
10 ނޮވެންބަރު 2024
