ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ކޮޅުމަޑުލު ވިލުފުށީ ކައުންސިލާ މިއަދު ބައްދަލު ކުރައްވައިފިއެވެ. މި ބައްދަލުވުން އޮތީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާގައެވެ. މި ބައްދަލުވުމުގައި ވަޒީރުގެ އިތުރުން ވުޒާރާގެ ބައެއް އިސްވެރިންވެސް ބައިވެރިވެ ވަޑައިގެންނެވިއެވެ. ވިލުފުށީ ކައުންސިލާއެކު ބޭއްވުނު މި ބައްދަލުވުމުގައި އެކައުންސިލުގެ ރައީސާއި ކައުންސިލުގެ ބައެއް މެންބަރުން ބައިވެރިވެވަޑައިގެންނެވިއެވެ.
މި ބައްދަލުވުމުގައި ވިލުފުށީ ކައުންސިލުން ވަނީ އެ ރަށުގައި ހުރި އާސާރީ ތަންތަނުގެ ޙާލަތާ ބެހޭ މަޢުލޫމާތު ވަޒީރާ ހިއްސާ ކޮށްފައެވެ. ވަކިން ޚާއްޞަކޮށް ވިލުފުށީގައި ހުރި 100 އަހަރަށްވުރެ ގިނަދުވަސްވެފައިވާ އާސާރީ މިސްކިތުގެ މަރާމާތުގެ ކަންކަން ކުރިއަށް ގެންދިއުމަށް ދިމާވެފައިވާ ގޮންޖެހުންތަކާއި މަސައްކަތް ކުރިއަށް ގެންދާނެ ގޮތާބެހޭގޮތުން މަޝްވަރާ ކުރައްވާފައިވެއެވެ.
މިބައްދަލުވުމުގައި ވާހަކަފުޅު ދައްކަވަމުން ވަޒީރު ވިދާޅުވީ، ވިލުފުށީ އާސާރީ މ ިސްކިތަކީ 100 އަހަރަށްވުރެ ގިނަދުވަސްވެފައިވާ މިސްކިތަކަށް ވާތީ އެއީ ރާއްޖޭގެ މާއްދީ ތަރިކައިގެ ނިސްބަތުގައި މުހިންމު ބިނާއެއްކަމަށް ދެކެވަޑައިގަންނަވާކަމަށެވެ. އަދި އެފަދަ ބިނާތައް ރާއްޖެއަށް ޒިޔާރަތްކުރާ ފަތުރުވެރިންނަށް ފެންނާނެ ގޮތަށް އިންތިޒާމު ކުރުމަކީ މުހިންމުކަމެއްކަމަށް އެމަނިކުފާނު ވިދާޅުވިއެވެ.
ވަޒީރު އިތުރަށް ވިދާޅުވީ، މި ވުޒާރާގެ ކަމާ ގުޅުންހުރި އެސް.އޯ.ޕީތައް އެކުލަވައިލެވުމުން، ކައުންސިލާ ގުޅިގެން ވިޒިޓަރ އެކޮނޮމީ ސިޔާސަތުގެދަށުން އެފަދަ ތަންތަނަށް ދެމެހެއްޓެނިވި އާމްދަނީއެއް ލިބޭނެ މަގު ހޯއްދެވުމަށް އިސްކަން ދެއްވާނެކަމަށެވެ. އަދި އެކަމަކީ ރާއްޖޭގެ އާސާރީ ތަންތަން ހިމާޔަތްކުރުމަށް ކުރެވޭ މަސައްކަތުގައި ވަރަށް މުހިންމުކަމެއް ދެއްވާނެ ކަމެއްކަމަށެވެ.
މި ބައްދަލުވުމުގައި ވިލުފުށީ ކައުންސިލުގެ ފަރާތުން ވަނީ އެކައުންސިލުގެ މުވައްޒަފުންނަށް އަމާޒުކޮށް ދިވެހިބަހަށް އަހުލުވެރިކުރުވުމުގެ ޕްރޮގްރާމެއް ހިންގުމަށް މި ވުޒާއާއެކު މަޝްވަރާކޮށްފައެވެ. އަދި ވިލުފުށީ ސްކޫލަށް 75 އަހަރު ފުރުމުގެ މުނާސަބަތު ކުލަގަދަގޮތެއްގައި ފާހަގަކުރުމަށް ރާވަމުންދާ ޙަރަކާތްތަކާ ބެހޭ މަޢުލޫމާތުވެސް ވަނީ ހިއްސާކޮށްފައެވެ.
19 ޝަޢުބާން 1445
29 ފެބްރުއަރީ 2024
