ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ހދ.ކުމުންދޫ ކައުންސިލާ މިއަދު ބައްދަލު ކުރައްވައިފިއެވެ. މި ބައްދަލުުވުން އޮތީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާގައެވެ. މި ބައްދަލުވުމުގައި ވަޒީރުގެ އިތުރުން ވުޒާރާގެ ބައެއް އިސްވެރިންވެސް ބައިވެރިވެ ވަޑައިގެންނެވިއެވެ. ކުމުންދޫ ކައުންސިލާއެކު ބޭއްވުނު މި ބައްދަލުވުމުގައި އެކައުންސިލުގެ ރައީސާއި ކައުންސިލުގެ ބައެއް މެންބަރުންގެ އިތުރުން އެކައުންސިލުގެ ބައެއް އިސްވެރީން ބައިވެރިވެވަޑައިގެންނެވިއެވެ.
މި ބައްދަލުވުމުގައި ކުމުންދޫ ކައުންސިލުން ވަނީ ޤައުމީ ފެންވަރުގައި ފާހަގަކުރާ ދުވަސްތައް ފާހަގަކުރުމުގެ ކަންކަން މި ވުޒާރާގެ ފަރާތުން ކުރަމުންދާގޮތް ރަނގަޅުކަމަށް ފާހަގަކުރައްވައި އެކަމުގެ ސަބަބުން އެފަދަ މުނާސަބަތުތަކަށް ދެވޭ ސަމާލުކަން އިތުރުވަމުންދާތަން ފެންނަކަން ފާހަގަކޮށްފައެވެ. އަދި ކުމުންދޫ ކައުންސިލުގެ ފަރާތުން ޤައުމީ މުނާސަބަތުތައް ފާހަގަކުރުމަށް ކުރިއަށްގެންދާ ހަރަކާތްތަކާ ބެހޭ މަޢުލޫމާތު ހިއްސާކޮށް، ކުރިއަށް އޮތް ތަނުގައި ޢީދުފަދަ މުނާސަބަތުތައް ކުލަދަގަކޮށް ފާހަގަކުރުމާ ބެހޭ ގޮތުން މަޝްވަރާ ކުރައްވާފައިވެއެވެ. ކުމުންދޫގެ އާސާރީ ތަންތަނާއި ދިވެހިބަހުގެ މުހިންމުކަމާ ބެހޭ ހޭލުންތެރިކުރުވުމުގެ ޕްރޮގްރާމުތަކެއް ވި ވުޒާރާއާއި ގުޅިގެން ރަށު ފެންވަރުގައި ކުރިއަށް ގެންދިއުމާ ބެހޭ ގޮތުން ވެސް މި ބައްދަލުވުމުގައި މަޝްވަރާކުރެވިފައިވެއެވެ.
ވަޒީރު އާދަމް ނަޞީރު އިބްރާހީމް މި ބައްދަލުވުމުގައި ދެއްކެވި ވާހަކަފުޅުގައި ވިދާޅުވީ ރަށްރަށުގައި ހުރި އާސާރީ ތަންތަނާއި ރަށްރަށަށް ޚާއްޞަ ކަންކަން ދެނެގަނެ އެކަންކަން ދިރުވައި އާލާކޮށް އެފަދަ ކަންކަމުން ރަށްރަށަށް މަންފާލިބޭނެގޮތްތައް ހޯދައި ބެލުން އެއީ މިހާރު ސަމާލުކަން ދޭން ޖެހިފައި އޮތް ކަމެއްކަމަށް ދެކެވަޑައިގަންނަވާކަމަށެވެ. ރަށްރަށުގެ މާއްދީ ތަރިކައާ އެއްވަރަށް މާނަވީ ތަރިކައަށް ވެސް ސަމާލުކަން ދޭންޖެހޭކަން ފާހަގަކުރައްވަމުން ވަޒީރު ވިދާޅުވީ ރަށުގެ މައުނަވީ ތަރިކަ ރައްކާތެރިކުރުމަށްޓަކައި ރަށުގައި ތިއްބެވި ދުވަސްވީ ފަރާތްތަކުގެ ވާހަކަތައް ރެކޯޑްކޮށް ޑޮކިއުމެންޓް ކުރުމަކީ މިހާރަށް ވަރަށް ބޭނުންތެރިކަން ބޮޑުވެފައި އޮތް ކަމެއްކަމަށެވެ. އަދި މިފަދަ މަސައްކަތްތަކުގައި މަދަރުސާތަކުގެ ދަރިވަރުން ޝާމިލުކުރުވުމަކީ ވެސް މިހިންމުކަމެއްކަމަށް ވަޒީރު ވިދާޅުވިއެވެ. ކުރިއަށްއޮތްނުގައިމިފަދަ ކަންކަމުގެ ފަންނިއްޔާތާ ގުޅޭގޮތުން ތަފްޞީލުކޮށް ވާހަކަދެއްކުމަށްޓަކައި އޮންލައިން ބައްދަލުވުންތައް އިންތިޒާމުކޮށް ބާއްވަވާނެކަމަށް ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ ރާއްޖެއަށް ޒިޔާރަތް ކުރާ ފަތުރުވެރިންގެ އެންމެ ބޮޑު ޝަކުވާއަކަށްވަނީ ދިވެހިންގެ މާޒީއާއި ދިވެހިން ވަޒަންވެރިވިގޮތް އަދި ދިވެހިން ކުޑަ ކުޑަ ރަށެއްގައި އެތައްހާސް އަހަރެއްވަންދެން ދިރިއުޅުނު ގޮތް އެނގޭނެގޮތެއް ނެތުންކަމުގައެވެ. އަދި ރަށެއް ކިތަންމެ ކުޑަޔަސް ފަތުރުވެރިކަމަށް އެ ރަށް ކުޑަނޫންކަމުގައި ވެސް ވަޒީރު ވިދާޅުވިއެވެ.
ދިވެހިބަހާއި ސަގާފަތާއި ތަރިކައާ ބެހޭ ވުޒާރާ
26 ޝަޢްބާން 1445
7 މާރިޗު 2024
