ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ކ. ކާށިދޫ ކައުންސިލާ މިއަދު ބައްދަލު ކުރައްވައިފިއެވެ. މި ބައްދަލުުން އޮތީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާ ގައެވެ. މި ބައްދަލުވުމުގައި ވަޒީރުގެ އިތުރުން ވުޒާރާގެ ބައެއް އިސްވެރިންވެސް ބައިވެރިވެވަޑައިގެންނެވިއެވެ. ކާށިދޫ ކައުންސިލާ އެކު ބޭއްވުނު މި ބައްދަލުވުމުގައި އެކައުންސިލް ގެ ނާއިބު ރައީސާ އާއި ކައުންސިލް ގެ ބައެއް މެންބަރުންގެ އިތުރުން އެރަށު އަންހެނުންގެ ތަރައްޤީއަށް މަސައްކަތް ކުރާ ކޮމިޓީ ގެ ފަރާތުންވެސް ބައިވެރިވެލެއްވިއެވެ.
މި ބައްދަލުވުމުގައި ކާށިދޫ ކައުންސިލުން ވަނީ އެރަށުގައި ހުރި އާސާރީ ތަންތަނުގެ ޙާލަތާ ބެހޭ މަޢުލޫމާތު ވަޒީރާ ހިއްސާ ކޮށްފައެވެ. އަދި ރަށުގައި ކުރިއަށްދާ މި ވުޒާރާގެ މަސައްކަތްތަކާ ގުޅޭގޮތުން މަޝްވަރާ ކުރެވިފައިވެއެވެ. އަދިއޭގެ އިތުރަށް ކާށިދޫ އާސާރީ ތަންތަނުގެ އާ ތަޞައްވުރާ ގުޅޭގޮތުން ވުޒާރާއާ އެކު މަޝްވަރާ ކުރެވުނެވެ.
ވަޒީރު އާދަމް ނަޞީރު އިބްރާހީމް މި ބައްދަލުވުމުގައި ދެއްކެވި ވާހަކަފުޅުގައި ވިދާޅުވީ ކާށިދޫ އަކީ ދިވެހިރާއްޖޭގެ އާސާރީ ތަރިކަތަކުގެ ނިސްބަތުން ބަލާއިރު މުހިންމު އަދި މުއްސަނދި ރަށެއްކަމަށެވެ. ކާށިދޫ ކުރުހިންނަ ތަރާގަނޑަކީ ރާއްޖޭގެ އެންމެ މުހިންމު އެއް އާސާރީ ތަން ކަމަށާއި އެފަދަ ތަންތަން ޒަމާންތަކަށް ދެމިގެންދާ ގޮތަށް ޙިމާޔަތްކޮށް ރައްކާތެރި ކުރުމުގައި މި ވުޒާރާގެ ވިސްނުމަކީ އެންމެ ފަހުގެ ޒަމާނީ ވަޞީލަތްތަކުގެ އެހީގައި އެމަސައްކަތް ކުރުން ކަމަށް އެމަނިކުފާނު ވިދާޅުވިއެވެ. އެގޮތުން ކުރަން ހުރި ކަންކަން ދެނެގަތުމަށްޓަކައި ބޭރުގެ ތަޖުރިބާކާރު އެކި ފަރާތްތަކާ އެކު މަޝްވަރާ ކުރައްވަން ހަމަޖެހިފައިވާ ކަމަށްވެސް ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ ދުނިޔޭގެ އެހެން ޤައުމުތަކެކޭ އެއްފަދައިން ރާއްޖެއަށް ޒިޔާރަތް ކުރާ ފަތުރުވެރިންގެ ވެސް ބޮޑު އިންސައްތައަކީ އާދަކާދަތަކާއި ސަގާފަތް ދެކެލުމަށް ޒިޔާރަތް ކުރާ ބައެއްކަމަށެވެ. އަދި ރައީސް ޑރ. މުޢިއްޒު ގެ ސަރުކާރުން ހުޅުލޭ ބައިނަލްއަޤްވާމީ އެއަރޕޯޓް ތަރައްޤީކޮށް ނިމުމުން ރާއްޖެ ޒިޔާރަތް ކުރާ ފަތުރުވެރިންގެ ޢަދަދު އެތައް ގުނައެއް އިތުރުވެގެން ދާނެ ކަމަށާއި، އެއާއެކު ރަށްފުށު ފަތުރުވެރިކަން ފުޅާވެގެން ދާނެކަމަށް ޤަބޫލުފުޅު ކުރެއްވޭ ކަމަށް ވަޒީރު ވިދާޅުވިއެވެ.އެއާއެކު އާސާރީ ތަންތަނަށް ޒިޔާރަތް ކުރާ ފަތުރުވެރިން އިތުރުވެގެން ދާއިރު އެފަދަ ތަންތަނުގެ އަޞްލު ނުގެއްލޭ ގޮތަށް ޒަމާނީ ވަޞީލަތްތަކުގެ އެހީގައި ފަތުރުވެރިންނަށް އެތަންތަން ދެއްކޭނެ ގޮތްގޮތް މިހާރު ރާވަންޖެހޭ ކަމަށް ވަޒީރު ވިދާޅުވިއެވެ. އަދި ދިވެހި ޤައުމިއްޔަތުގެ މައިގަނޑު އެއް ވިސްނުމަކީ ކޮންމެ ރަށެއްވެސް އެރަށެއްގެ އަޞްލުތަކާ އެއްގޮތަށް ބުނެދެވޭނެ މާނަވީ އަދި މާއްދީ ތަރިކަ ޙިމާޔަތްކޮށް ރައްކާތެރިކުރުން ކަމަށް ވަޒީރު ވިދާޅުވިއެވެ.
ކާށިދޫގައި އޮންނަ ކުރުހިންނަ ތަރާގަނޑަކީ ރަށުގައި މީހުން އުޅޭ ހިސާބާ ގާތްގަނޑަކަށް 1300 ފޫޓު ދުރުގައި އޮންނަ ސަރަޙައްދެކެވެ. އެތަން ސައިންޓިފިކް ގޮތުން ކޮނެ ބެލުމުގެ މަސައްކަތް 1996 އިން 1998 އަށް ކޮށްފައިވެއެވެ. އޭރު ކުރެވުނު ދިރާސާތަކުން އެނގުނީ އެ ތަނަކީ މީލާދީން ގާތްގަނޑަކަށް ހަތަރުވަނަ ޤަރުނުންފެށިގެން ދިހަވަނަ ޤަރުނާ ހަމައަށް ބޭނުންކުރި ތަނެއްކަމެވެ. އަދި އެތަނުން ފެނުނު އިންސާނުންގެ ކަށި ނޯރވޭއަށް ގެންގޮސް ދިރާސާ ކުރުމުން އެނގުނީ އެކަށިގަނޑަކީ މީލާދީން 9 ވަނަ ޤަރުނާއި 10 ވަނަ ޤަރުނާ ދެމެދު މަރުވެފައިވާ މީހެއްގެ ކަށިކަމެކެވެ.
