ވަޒީރު އާދަމް ނަޞީރު އިބްރާހީމް 93 ވަނަ ޓްރެފިކް މޮނިޓަރސް ޕްރޮގްރާމް ނިންމުމުގެ ރަސްމިއްޔާތު ޝަރަފުވެރިކޮށްދެއްވައިފި
ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް 93 ވަނަ ޓްރެފިކް މޮނިޓަރސް ޕްރޮގްރާމް ނިންމުމުގެ ރަސްމިއްޔާތު ޝަރަފުވެރިކޮށްދެއްވައިފިއެވެ. މި ރަސްމިއްޔާތު އޮތީ ހުޅުމާލޭ ދެވަނަ ފިޔަވަހީގައި ހުންނަ ޞަލާޙުއްދީން ސްކޫލުގައެވެ.93 ވަނަ ޓްރެފިކް މޮނިޓަރސް ޕްރޮގްރާމްގައި ބައިވެރިވެފައިވަނީ ރެހެންދި ސްކޫލާއި ޣާޒީ ސްކޫލުގެ ގުރޭޑު 7،6 އަދި 8 ގެ ދަރިވަރުންނެވެ.
މި ރަސްމިއްޔާތު ޝަރަފުވެރިކޮށްދެއްވައި ވަޒީރު އާދަމް ނަޞީރު އިބްރާހީމް ދެއްކެވި ވާހަކަފުޅުގައި ވިދާޅުވީ ޓްރެފިކް މޮނިޓަރުންނަށް ނުވަތަ ދަރިވަރުންނަށް އެ ކުރިމަތިލެވެނީ ވަރަށް ޚާއްޞަ އަދި މާތް މަޤުސަދެއް އޮތް މަސައްކަތަކަށްކަމަށް ވިދާޅުވެފައެވެ. އަދި އެ މަޤުސަދު މާތްވެގެންދަނީ، ދުނިޔެމަތީގައިވާ އެންމެމާތް ކަމަކީ މީސްތަކުންނަށް ހެޔޮ ރަނގަޅު މަގު ދެއްކުން ކަމަށާއި، އަދި މައްސަލަތަކަށް ޙައްލު ހޯދުން ކަމަށްވާތީކަމަށް ވަޒީރު ވިދާޅުވިއެވެ.
މީގެ އިތުރުން ވަޒީރު ވަނީ ފަޟީލަތުލްއުސްތާޛު އައްޝައިޚް އަލްމަރްޙޫމް ޙުސައިން ޞަލާޙުއްދީނާއި އައްސުލްޠާނުލްޣާޒީ މުޙައްމަދު ތަކުރުފާނާއި އައްސުލްޠާނާ ރެހެންދި ޚަދީޖާ ފަަދަ ބޭބޭފުޅުންގެ ޙަޔާތްޕުޅުން މިސާލު ނަންގަވައި، އެބޭފުޅުން ތުއްޕުޅުއިރު ޢިލްމުހޯއްދަވައި، ބޮޑުފުޅުވެގެން ޤައުމަށް ޚިދުމަތް ކޮށްދެއްވައި އެބޭފުޅުން ޤައުމުގެ ހަރުދަނާ ބޭފުޅުންނަށް ވީގޮތުގެ މިސާލު ދަރިވަރުންނަށް ވިދާޅުވެދެއްވާފައެވެ. އަދި ވަޒީރު ވަނީ މި ޕްރޮގްރާމުގައި ތަމްރީނުވި ދަރިވަރުން ވެސް އެފަދަ ބޭފުޅުންގެ ފިޔަވަޅުފުޅުމަތީ ހިނގައި އެފަދަ ހަރުދަނާ ޒުވާނުންނަށްވުމަށް އިލްތިމާސް ކުރައްވައިފައެވެ.
93 ވަނަ ޓްރެފިކް މޮނިޓަރސް ޕްރޮގްރާމްގެ ދަރިވަރުންނަކީ އެހެން މީހުންނަށް މަގުދައްކައި ރަނގަޅު ކުރުމަށް މަސައްކަތް ކުރާފަދައިން، އެ ދަރިވަރުން އަމިއްލައަށްވެސް ރަނގަޅު މަގު އިޚްތިޔާރު ކުރާ، ޤާނޫނާއި، ޤަވާޢިދާއި، އުޞޫލުތަކަށް އަދި ވަކީން ޚާއްޞަކޮށް އިސްލާމް ދީނުގެ ކަންކަމަށް ހޭލުންތެރި އަދި ކިޔަމަންވާ ބަޔަކަށްވުމަށްވެސް ވަޒީރު ވަނީ ދަރިވަރުންނަށް އިލްތިމާސް ކުރައްވައިފައެވެ.
ވަޒީރު އާދަމް ނަޞީރު އިބްރާހީމް ވަނީ 93 ވަނަ ޓްރެފިކް މޮނިޓަރސް ޕްރޮގްރާމްގައި ބައިވެރިވި ދަރިވަރުންނަށް ސެޓްފިކެޓް ޙަވާލުކޮށްދެއްވައިފައެވެ.
ދިވެހިބަހާއި ސަގާފަތާއި ތަރިކައާ ބެހޭ ވުޒާރާ
16 ޝަޢްބާން 1445
26 ފެބުރުވަރީ 2024
