ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް މިއަދު ދ.ކުޑަހުވަދޫ ކައުންސިލާ ބައްދަލު ކުރައްވައިފިއެވެ. މި ބައްދަލު ކުރެއްވުން އޮތީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާގައެވެ. މި ބައްދަލުވުމުގައި ވަޒީރުގެ އިތުރުން މި ވުޒާރާގެ ގިނަ އިސްވެރީން ބައިވެރިވެވަޑައިގެންނެވިއެވެ. އަދި ކުޑަހުވަދޫ ކައުންސިލް ގެ ފަރާތުން އެކައުންސިލް ގެ މެންބަރު އަލްފާޟިލާ ޢާއިޝަތު ނަޝީދާ އާއި ކައުންސިލް މެންބަރު އަލްފާޟިލާ ޝަރީޢާ މުޢީދު ބައިވެރިވެވަޑައިގަތެވެ.
މި ބައްދަލު ކުރެއްވުމުގައި ކުދަހުވަދޫ ކައުންސިލުން ވަނީ ކުޑަހުވަދޫގައި ހުންނަ އާސަރީ ހުކުރު މިސްކިތުގެ ހާލަތާ ބެހޭ ތަފްސީލީ މައުލޫމާތު ހިއްސާ ކޮށްފައެވެ. އެގޮތުން، ފާއިތުވި ރަމަޟާން މަހަށް އެ މިސްކިތް މަރާމާތު ކުރުމުގެ މަސައްކަތް ކުރަމުން ދިޔައިރު، މިސްކިތުގެ މަތިވަޑާން ގަނޑުގައި ވަރަށް ބޮޑަށް ކަތުރުފަނި އަޅައި ވަޑާންގަނޑަށް ބޮޑެތި ގެއްލުން ލިބިފައިވާކަން ފާހަގަކޮށްފައިވެއެވެ.އަދި އެ މިސްކިތަކީ، އެ ރަށުގެ ގިނަ ރައްޔިތުންތަކެއް ނަމާދު ކުރަމުން އައިމިސްކިތަކަށް ވެފައި، މިހާރު މިސްކިތް ހުރި ހާލަތުން އެތަނުގައި ނަމާދު ނުކުރެވޭތީރައްޔިތުންގެ ކަންބޮޑުވުންތައް ކައުންސިލަށް ލިބޭކަން ފާހަގަކޮށް މިކަމަށް ޙައްލެއް ހޯދުމަށް މި ވުޒާރާގެ ކަމާ ބެހޭ ފަރާތްތަކުގެ ލަފަޔާއެކު މަސައްކަތް ކުރުމަށްމަޝްވަރާ ކުރެވުނެވެ.
ވަޒީރު ދާދި ފަހުން ކުޑަހުވަދުއަށް ކުރެއްވި ދަތުރުފުޅުގައި އެ މިސްކިތުގެ ހާލަތު ބައްލަވައިލެއްވި ކަމަށާއި، ވަޒީރުގެ އެ ދަތުރުފުޅުގައި ކުޑަހުވަދޫ ހުކުރު މިސްކިތާ ބެހޭ ގޮތުން މައިގަނޑު ދެ ކަމެއް އެރަށު ކައުންސިލުން ފާހަގަކޮށްފައިވާ ކަމަށް ވިދާޅުވިއެވެ. އޭގެތެރެއިން އެއް ކަމަކީ، މިސްކިތުގައި މިހާރު ހުރި ތޮށިގަނޑު ނައްޓާލައި، ކުރިން އެ މިސްކިތް ހުރި އަސްލު ގޮތަށް އިޢާދަކުރުން ކަމަށާއި، އަނެއް ކަމަކަށް އެ މިސްކިތުގެ ކަތުރުފަނީގެ މައްސަލަ ފާހަގަކޮށްފައިވާ ކަމަށް ވަޒީރު ވިދާޅުވިއެވެ.
ކުޑަހުވަދޫ އަސާރީ ހުކުރު މިސްކިތަކީ ހިރިގަލުން ހަދައި، މަތިވަޑާންގަނޑު ލާފެންކޮށް ލިޔެފައިވާ މިސްކިތެކެވެ. އެ މިސްކިތުގެ ތާރީޚް ބުނާގޮތުގައި، އެ މިސްކިތަކީ އެ ރަށުގެ މީހުން އިސްލާމް ވުމަށް ފަހުގައި ބިނާ ކުރެވުނު މިސްކިތެވެ. ދެއްވަދޫ ރަސްގެފާނުގެ ރަސްކަމުގައި އެ މިސްކިތް އަލުން ބިނާ ކުރެއްވުމަށް ފަހު، އެންމެ ފަހުން މަރާމާތު ކުރެވުނީ އައްސުލްޠާން މުޙައްމަދު ޝަމްސުއްދީން (ތިންވަނަ) ގެ ރަސްކަމުގައި ހިޖުރައިން 1326 ވަނަ އަހަރުއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފަށްޓަވާފައިވާ ދިވެހިޤައުމިއްޔަތު އިޢާދަކުރުމުގެ މަޝްރޫޢުގެ ތެރޭގައި ހިމެނޭ ސަގާފީ މަރުކަޒުތައް އުފެއްދުމާއި، ތަރިކައިން އާމްދަނީ ލިބޭނެ ގޮތް ތަޢާރަފްކުރުމުގެ ވިސްނުމުގެ ތެރެއިން ކުޑަހުވަދޫގެ ހުކުރު މިސްކިތް ތަރައްޤީކުރުމުގެ މަސައްކަތް ކުރިއަށް ގެންދިއުމަށް މަސައްކަތްޕުޅު ކުރައްވާނެކަމަށް ވަޒީރު ވަނީ ވިދާޅުވެފައެވެ. އަދި ކުޑަހުވަދޫ އާސާރީ ހުކުރު މިސްކިތަކީ އެ ވިސްނުމުގައި ވަރަށް ރަނގަޅަށް ތަރައްޤީކުރެވިދާނެ ތަނެއްކަން ވަޒީރު ފާހަގަކުރެއްވިއެވެ. އަދި އެކަން ކުރުމަށް ހުރި ގޮންޖެހުންތަކަކީ ކޮބައިތޯ ބައްލަވައި އެކަންކަމަށް ހައްލު ހޯއްދަވައިދެއްވުމަށް މަސައްކަތްޕުޅު ކުރައްވާނެކަމަށް ވެސް މި ބައްދަލު ކުރެއްވުމުގައި ވަޒީރު ވިދާޅުވިއެވެ.
ބައްދަލުވުމަށް ފަހު މި ވުޒާރާގެ ސްޓޭޓް މިނިސްޓަރ މުޙައްމަދު ޝަހުރުއްޛިޔާދު ވަނީ މި ވުޒާރާއިން ކުރިއަށް ގެންދާ ދިވެހި ޤައުމިއްޔަތު އިޢާދަކުރުމުގެ މަޝްރޫޢުގެ ތަޢާރަފް ސެޝަނެއް ނަންގަވައިދެއްވާފައެވެ.
23 ޝައްވާލް 1445
2 މޭ 2024
