ވަޒީރު އާދަމް ނަޞީރު އިބްރާހީމް މުލަކަތޮޅު ކައުންސިލާ ބައްދަލުކުރެއްވައިފި.
ވަޒީރު އާދަމް ނަޞީރު އިބްރާހީމް މުލަކަތޮޅު ކައުންސިލާ މިއަދު ބައްދަލުކުރައްވައިފިއެވެ. މި ބައްދަލުކުރެއްވުން ކުރިއަށް ދިޔައީ ދިވެހި ބަހާއި ސަގާފަތާއި ތަރިކައާ ބެހޭ ވުޒާރާގައެވެ.
މި ބައްދަލުކުރެއްވުމަކީ އެ އަތޮޅުގެ ރަށްތަށުގައި ހުރި މި ވުޒާރާއާ ގުޅުން ހުރި ދާއިރާތަކާ ގުޅޭ މައްސަލަތަކާއި ދަތިތައް ވަޒީރާ ހިއްސާކުރުމުގެ އިތުރުން، އަތޮޅުގެ އާސާރީ ސަގާފަތް ދިރުވައި އާލާ ކުރުމަށް ދެފަރާތް ގުޅިގެން ކުރެވެން ހުރި މަސައްކަތްތަކާ ބެހޭ ގޮތުން މަޝްވަރާ ކުރުމަށް ކުރިއަށް ގެންދެވުނު ބައްދަލުކުރެއްވުމެކެވެ.
އެގޮތުން، މ. ވޭވަށުގައި ހުރި 500 އަހަރުވީ ހިރިގަލުގެ މިސްކިތް ހިމާޔަތްކޮށް އެތަނުގެ އާސާރު ރައްކާތެރިކުރުމަކީ އެކައުންސިލުން ވަރަށް ބޮޑު އަހަންމިއްޔަތުކަމެއް ދޭ ކަމެއްކަމަށް ވާތީ، އެކަން ކުރުމަށް ވުޒާރާގެ އެހީތެރިކަމަށް ކައުންސިލުން ވަނީ އެދިވަޑައިގަންނަވާފައެވެ. އަދި އެއަތޮޅުގެ ހުރިހާ ރަށެއްގައި ހުރި އާސާރީ ތަންތަނަށް ރަސްމީ ޒިޔާރަތެއް ކުރެއްވުމަށް ކައުންސިލުން ވަނީ ވަޒީރަށް ދަޢުވަތު އަރުވާފައެވެ. އަދި މި ޒިޔާރަތުގައި މިތަންތަނާ ބެހޭ ފަހުގެ ދިރާސާތައް ކުރެއްވުމާއި އަދި އެދިރާސާތައް އަރުޝީފު ކުރެވޭނޭ ނިޒާމެއް އޮތުމުގެ މުހިންމުކަންވެސް ކައުންސިލުން ވަނީ ފާހަގަކުރައްވާފައެވެ.
މި ބައްދަލުކުރެއްވުމުގައި ވަޒީރު ވަނީ މުލަކަތޮޅަށް ވަޑައިގެންނެވުމަށް ކައުންސިލުން އެރުވި ދަޢުވަތު ޤަބޫލުފުޅުކުރައްވާފައެވެ. އަދި ތާރީޚާ ސަގާފަތް ހިމާޔަތް ކުރަން ކުރާ މަސައްކަތާއި ވިސްނާ ވިސްނުމުގައި، ދިވެހިރާއްޖެއަށް އެކަނި ޚާއްސަ ދަނޑުގޮވާމާއި، ކުޅިވަރާއި ކެއްކުން ފަދަ، ޠަބީޢީ ތަރިކަ ރައްކާ ކުރުމަށް އިސްކަން ދެއްވުމަށް ވަޒީރު އެދިވަޑައިގެންނެވިއެވެ.
މިމޭރުމުން ކުރެވޭ މަސައްކަތްތަކުގެ ތެރެއިން މަޑުއްވަރީގެ “ގުޅަމަތިހިފުން” ކުޅިވަރު ދިރުވަން ކުރެވުނު މަސައްކަތް ކައުންސިލުން ވަނީ ވަޒީރާ ޙިއްސާ ކުރައްވާފައެވެ. މިކުޅިވަރު މަދަރުސާ ކުދިންނަށް ދަސްކޮށްދީ ކުޅިވަރު ގެއްލުނަނުދީ ދިރުވަން މަސައްކަތް ކޮށްފައިވާކަން ކައުންސިލުން ފާހަގަކުރެއްވިއެވެ. އަދިމި ކުޅިވަރު އާކައިވް ކުރުމުގައި ވުޒާރާގެ އެހީތެރިކަން ބޭނުންވާނެ ކަމުގައި ވެސް ކައުންސިލުން ފާހަގަކުރެއްވިއެވެ.
މި ބައްދަލުވުމަށް ފަހު، ވުޒާރާގެ ފަރާތުން ވަނީ މުލަކަތޮޅު ކައުންސިލަށް ދިވެހި ޤައުމިއްޔަތު އިޢާދަ ކުރުމުގެ މަޝްރޫޢުގެ ތަޢާރަފެއް ދެއްވާފައެވެ.
މި ބައްދަލުކުރެއްވުމުގައި މ އަތޮޅު ކައުންސިލްގެ ނާއިބު ރައީސް އަޙްމަދު ނިޝާންގެ އިތުރުން، ކައުންސިލް މެންބަރުންނާއި ސެކެޓްރީ ޖެނެރަލް ބައިވެރިވެވަޑައިގެންނެވިއެވެ.
26 ޛުލްޤަޢިދާ 1445
3 ޖޫން 2024
