މި އަހަރުގެ ޤައުމީ ކުޑަކުދީންގެ ދުވަހުގެ މުނާސަބަތުގައި އިޖްތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން “އުފާ ފެސްޓިވަލް” ގެ ނަމުގައި ބާއްވާ ކުޑަކުދީންގެ ހަވީރުގައި ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ބައިވެރިވެއްޖެއެވެ. މިއީ ޢާއިލާއާ އެކު އުފާވެރި ވަގުތުކޮޅެއް ހޭދަކޮށްލެވޭ ގޮތަށް ރާވާފައިވާ ފެސްޓިވަލެކެވެ. ފެސްޓިވަލުގައި މުނިފޫހިފިލުވުގެ ގިނަ ހަރަކާތްތަކާއި އެކި ކުޅިވަރު ހަރަކާތްތައް ހިމެނޭ ގިނަ ސްޓޯލްތަކެއް ހިމަނާފައި ވެއެވެ.
އެގޮތުން ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ވެސް ވަނީ މި ފެސްޓިވަލުގައި ބައިވެރިވެ މި ވުޒާރާގެ ސްޓޯލެއް ބަހައްޓައިފައެވެ. މި ވުޒާރާގެ ސްޓޯލަށް ޒިޔާރަތް ކުރާ ކުޑަކުދީންނަށް ދިވެހި ބައެއް ސަގާފީ ކުޅިވަރުތައް ދައްކާލުމާއި ކުޅިވަރުގައި ބައިވެރިވެލުމުގެ ފުރުސަތު ލިބޭ ގޮތަށް ވަނީ އިންތިޒާމު ކުރެވިފައެވެ. އަދި މި ވުޒާރާގެ ސްޓޯލްގައި ދިވެހީންގެ ސަގާފީ ބައެއް އެއްޗެތި ފެންނާނެ ގޮތަށް ބެހެއްޓިފައި ހުންނާނެއެވެ. އަދި އެތަކެއްޗާ ބެހޭ ލުއި މަޢުލޫމާތު ލިބެން ހުންނާނެއެވެ. މީގެ އިތުރުން، ސްޓޯލަށް ޒިޔާރަތް ކުރާ ކުޑަކުދީންނަށް ތަފާތު ހަދިޔާ ދިނުމާއި ދިވެހި ބަހާއި ސަގާފަތާ ގުޅޭ ލުއި މަޢުލޫމާތު ލިބޭ ހަރަކާތްތައް ކުރިއަށް ދާނެއެވެ.
މި ފެސްޓިވަލުގައި ބޭއްވުމަށް ހަމަޖެހިފައިވާ ހަރަކާތްތަކުގެ ތެރޭގައި ކުޑަކުދީންގެ ދުވަހުގެ ކޭކު ފެޅުމާއި ތަފާތު ގޭމުތަކާއި ބޮޑުބެރު ހަރަކާތްތަކާއި ފެންކުޅީގެ ހަރަކާތްތަކާއި ހަވާ އެރުވުމުގެ އިތުރުން ތަފާތު ގިނަ ހަރަކާތްތައް ހިމެނެއެވެ.
މި ފެސްޓިވަލްގެ ހުޅުވުމުގެ ރަސްމިއްޔާތު އޮތީ މިއަދު ހަވީރު 3:45 ގައެވެ. އިޖުތިމާޢީ އަދި ޢާއިލީ ތަރައްޤީއާބެހޭ ވުޒާރާއިން ހާމަކޮށްފައިވާ ގޮތުގައި މި ފެސްޓިވަލް ކުރިއަށްދާނީ މިއަދު 16:00 އިން ފެށިގެން މާދަމާރޭ 22:00 ގެ ނިޔަލަށް ހުޅުމާލޭ ސެންޓްރަލް ޕާކުގައެވެ.
2 ޛުލްޤަޢިދާ 1445
10 މޭ 2024
