ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ކުރިއަށް ގެންދާ ދިވެހި ޤައުމިއްޔަތު އިޢާދަކުރުމުގެ މަޝްރޫޢުގެ ފުރަތަމަ ޕައިލޮޓް ޕްރޮގްރާމް، “އަޖުމަފިޔަވަހި”، ދިވެހިރާއްޖޭގެ ޤައުމީ ދިފާޢީ ބާރާ އެކު ކުރިއަށް ގެންދިޔުމުގެ ފުރަތަމަ މަޝްވަރާ ބައްދަލުވުން ގެންގޮސްފިއެވެ.
މިއަދު މެންދުރު މި ވުޒާރާގައި ކުރިއަށް ދިޔަ މަޝްވަރާ ބައްދަލުވުމުގައި މި ވުޒާރާގެ ފަރާތުން ބައިވެރިވެވަޑައިގެންނެވީ ވަޒީރު އާދަމް ނަޞީރު އިބްރާހީމާއި ސްޓޭޓް މިނިސްޓަރ މުޙައްމަދު ޝަޚުރުއްޛިޔާދުގެ އިތުރުން ވަޒީރުގެ ނާއިބު އާމިނަތު އިބްރާހީމާއި ވަޒީރުގެ ނާއިބު މޭޖަރ ރިޓަޔަރޑް ޢަބްދުﷲ ޢަލީ އެވެ. އަދި ޤައުމީ ދިފާޢީ ބާރުގެ ފަރާތުން ބައިވެރިވެވަޑައިގެންނެވީ ބްރިގޭޑިއަރ ޢަބްދުﷲ އިބްރާހީމާއި ކާނަލް ޢަލީ މަނިކު އަދި ކެޕްޓަން ހުޝާމެވެ.
މި ބައްދަލުކުރެއްވުމުގައި ވަޒީރު ދެއްކެވި ވާހަކަފުޅުގައި ދިވެހި ޤައުމިއްޔަތު އިޢާދަ ކުރުމުގެ ޕްރޮގްރާމްގެ ދަށުން މުއައްސަސާތަކުގައި ހިންގޭ އެންމެ ފުރަތަމަ ޕްރޮގްރާމް ހިންގޭ މުއައްސަސާއަކީ ޤައުމީ ދިފާޢީ ބާރުކަން ފާހަގަކުރައްވައި، ޤައުމިއްޔަތު މަޝްރޫޢުގައި އެ މުއައްސަސާގެ މުހިންމުކަން ފާހަގަކުރެއްވިއެވެ. އަދި ޤައުމިއްޔަތު މަޝްރޫޢުގެ ފުރިހަމަ މަފްހޫމް އެއިދާރާގެ ހުރިހައި ފަންތިއެއްގެ ބޭފުޅުންނަށް އެނގިވަޑައިގަތުމުގެ މުހިންމުކަން ވަޒީރު ފާހަގަކުރެއްވިއެވެ.
މިކަން ޙާސިލްކުރުމަށްޓަކައި ވީހާ ވެސް ގިނަ އޮފިސަރުންނާއި އޮފިޝަލުންނަށް ޤައުމިއްޔަތުގެ ބަހާތަކާ ބެހޭ މަޢުލޫމާތު ސެޝަންތަކާއި، މަޝްރޫޢާ ގުޅޭ އިތުރު ހަރަކާތްތައް ހިންގުމަށް ކުރަން ހުރި މަސައްކަތްތަކާ ބެހޭ ގޮތުން، ދެ މުއައްސަސާގެ މެދުގައި މިއަދު ވަނީ ގިނަ މަޝްވަރާތަކެއް ކުރެވިފައެވެ. އަދި މި މަޝްވަރާތަކުގެ އަލީގައި، މި ހިނގާ މޭ މަހުގެ ތެރޭގައި ދިވެހިރާއްޖޭގެ ޤައުމީ ދިފާޢީ ބާރާ އެކު މި ޕްރޮގްރާމް ފެށުމަށް ވާން ޖެހޭ ތައްޔާރީތައް ވަނީ ފެށިފައެވެ.
26 ޝައްވާލް 1445
5 މޭ 2024
