ނައިފަރުގެ މަޝްހޫރު ލިޔުންތެރިޔާ އަލްފާޟިލް މުޙައްމަދު އިސްމާޢީލް ފުޅު ލިޔުއްވާފައިވާ “ނައިފަރު އަދި ރަށްފުށުގެ ބައެއް އާދަކާދަ” ފޮތް، ދިވެހި ބަހާއި ސަގާފަތާއި ތަރިކައާ ބެހޭ ވަޒީރަށް މިއަދު ތަޢާރަފުކޮށް އަރުވައިފިއެވެ. މި ވުޒާރާގައި މިއަދު ބޭއްވި ޚާއްޞަ ބައްދަލުވުމެއްގައި ވަޒީރު އާދަމް ނަޞީރު އިބްރާހީމަށް މި ފޮތް ތަޢާރަފުކޮށް އެރުވީ ފޮތުގެ މުޞައްނިފް އަލްފާޟިލް މުޙައްމަދު އިސްމާޢީލް ފުޅެވެ.
ފޮތް ތަޢާރަފުކޮށް އެރުވުމަށް ބޭއްވި ބައްދަލުވުމުގައި ވަޒީރުގެ އިތުރުން، މި ވުޒާރާއިން ކުރިއަށް ގެންދާ ޤައުމިއްޔަތު މަޝްރޫޢުގެ ވިލަރެސްވެރީން ވެސް ބައިވެރިވެފައި ވެއެވެ. މި ބައްދަލުވުމުގައި އަލްފާޟިލް މުޙައްމަދު އިސްމާޢީލް ފުޅު ވަނީ ފޮތާބެހޭ މަޢުލޫމާތު ހިމެނޭ ޕްރެޒެންޓޭޝަން ސެޝަނެއް ކުރިއަށް ގެންގޮސްދެއްވާފައެވެ.
މި ފޮތަކީ ނައިފަރުގެ ތާރިޚާ ބެހޭ ގިނަގުނަ މަޢުލޫމާތު ހިމެނޭ، އަދި ނައިފަރަށް ނިސްބަތްވާ ތަފާތު އެކި ދާއިރާތަކުގެ ޚިދުމަތްތެރީންނާއި ހުނަރުވެރި ބޭފުޅުންގެ މަޢުލޫމާތު ހިމެނޭ ފޮތެކެވެ. އަދި ނައިފަރު ރައްޔިތުންގެ ދިރިއުޅުމުގެ އާދަކާދައާއި ނައިފަރުގެ އިޤްތިޞާދީ ހާލަތު އޮތްގޮތް ދައްކުވައިދޭ ފޮތެކެވެ.
ބައްދަލުވުމަށް ފަހު ކުރިއަށް ގެންދެވުނު މަޢުލޫމާތު ސެޝަނުގައި މި ފޮތް ލިޔުއްވުމުގައި މުޙައްމަދު އިސްމާޢިލް ކުރެއްވި ތަޖުރިބާއާއި ދިމާވި ދަތި ކަންތައްތަކާއި ގޮންޖެހުންތައް ހިއްސާކުރެއްވިއެވެ. އަދި ސެޝަނަށް ފަހު ވިލަރެސްވެރީންގެ ސުވާލުތަކަށް ޖަވާބު ދެއްވައި، ނައިފަރުގެ މާޒީން ތަޖުރިބާކުރެއްވި ބައެއް ކަންކަން ވަނީ ހިއްސާކުރައްވައިފައެވެ.
މުޙައްމަދު އިސްމާޢީލް ފުޅު ލިޔުއްވާފައިވާ މަޝްހޫރު ފޮތްތަކުގެ ތެރޭގައި ކެންސަރު ބަލި އަދި ހަކުރު ބައްޔާ ބެހޭ ގޮތުން ލިޔުއްވައިފައިވާ ދެ ފޮތް ފާހަގަ ކުރެވެއެވެ. އަދި މިހާތަނަށް އޭނާ ވަނީ ތަފާތު 19 ފޮތް ލިޔުއްވާފައެވެ.
28 ޝައްވާލް 1445
7 މޭ 2024
