އަރިޑް ސައިންޓިފިކް ޕްލެޓްފޯމްގެ މުއައްސިސާ ވަޒީރު އާދަމް ނަޞީރު އިބްރާހީމް ބައްދަލުކުރައްވައިފި
އަރިޑް ސައިންޓިފިކް ޕްލެޓްފޯމްގެ މުއައްސިސް އަދި ސީއީއޯ ޑރ. ސައިފް އައްސުވައިދީއާ ވަޒީރު އާދަމް ނަޞީރު އިބްރާހީމް މިއަދު ބައްދަލުކުރައްވައިފިއެވެ. ވުޒާރާގެ ގިނަ މަސައްކަތްތަކާ ބެހޭ ގޮތުން މަޝްވަރާ ކުރެވުނު މި ބައްދަލުކުރެއްވުން އޮތީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާގައެވެ.
އަރިޑް ސައިންޓިފިކް ޕްލެޓްފޯމަކީ ސައިންޓިފިކް ރިސަރޗް ގެ ދާއިރާ ކުރިއަރުވައި ތަރައްގީ ކުރުމަށް މަސައްކަތްކުރާ ރިސަރޗަރުންގެ ޓީމެއްގެ މައްޗަށް އެކުލެވޭ ޕްލެޓްފޯމެކެވެ. އެ ޓީމުގައި 80އަށް ވުރެ ގިނަ ރިސަރޗަރުން ހިމެނޭއިރު މިހާތަނަށް އެކި ދާއިރާތަކުން 670އަށް ވުރެ ގިނަ ސައިންޓިފިކް ހަރަކާތް ހިންގާފައިވެއެވެ.
މިއަދުގެ ބައްދަލުކުރެއްވުމުގައި ޑރ. ސައިފް އައްސުވައިދީ ވަނީ އަރިޑް ސައިންޓިފިކް ޕްލެޓްފޯމްގެ މަސައްކަތްތަކުގެ ތައާރަފެއް ވަޒީރާ ހިއްސާ ކުރައްވާފައެވެ. އަދި އަރިޑް ސައިންޓިފިކް ޕްލެޓްފޯމުން ރާއްޖޭގައި ސައިންޓިފިކް ދިރާސާވެރީންގެ ކޮންފެރެންސެއް ބާއްވައި، ރާއްޖެއާއި ރާއްޖޭގެ ސަގާފަތާ ބެހޭ ގޮތުން ދިރާސާކޮށް އެކަންކަމާ ބެހޭ ގޮތުން އަރަބި ބަހުން ފޮތްލިޔެ ޝާއިޢުކުރުމުގެ ޝައުގުވެރިކަން ފާޅުކުރައްވާފައިވެއެވެ. ދިވެހިރާއްޖެއާ ބެހޭ ގޮތުން ޢަރަބި ބަހުން މި ފަދަ ޝާޢިއުކުރުމެއް ފަހުގެ ތާރީޚުގައި ލިޔެފައި ނެތްކަން ފާހަގަ ކުރައްވަމުން ޑރ. ސައިފް އައްސުވައިދީ ވިދާޅުވީ އެފަދަ ފޮތްތަކުގެ އަލީގައި، މެދުއިރުމަތިން ރާއްޖެއަށް ޒިޔާރަތްކުރާ ފަރާތްތަކަށް ފަސޭހަކަމާއެކު ރާއްޖެއާ ބެހޭ ސާފު މަޢުލޫމާތު ލިބިގެންދާނެ ކަމަށެެވެ.
މި ބައްދަލުކުރެއްވުމުގައި އަރިޑް ސައިންޓިފިކް ޕްލެޓްފޯމްގެ ތަޖުރިބާގެ އެހީގައި، ރާއްޖެގައި ރިސަރޗް ކަލްޗަރ އެއް ނެތުމުން ދިމާވާ ގޮންޖެހުންތައް ހައްލުކުރެވިދާނެ ގޮތްތަކާ ބެހޭ ގޮތުން މަޝްވަރާކުރައްވާފައިވެއެވެ. މީގެ ތެރޭގައި ރިސަރޗް ކަލްޗަރ ދިވެހީންގެ ތެރެޔައް ގެނެސް ރިސަރޗް ގެ މަސައްކަތްތައް ފުޅާކުރުމަށް އެހީތެރިވެވިދާނެ ގޮތްތަކާ ބެހޭ ގޮތުން މަޝްވަރާ ކުރެވުނެވެ.
ވަޒީރު އާދަމް ނަޞީރު އިބްރާހީމް ވަނީ ދިވެހިރާއްޖޭގެ ސަގާފަތާއި ތަރިކައާއި ތާރީޚް ދިރާސާ ކުރުމުގެ މަސައްކަތަށް ހާއްސަ ކުރެވޭ ރިސަރޗް އިންސިޓިޓިއުޓްގެ މަސައްކަތްތަކާ ބެހޭ ގޮތުން ޑރ. ސައިފް އައްސުވައިދީއާ މައުލޫމާތު ހިއްސާ ކުރައްވާފައެވެ. އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކަށައަޅުއްވާފައިވާ ވިޒިޓަރ އިކޮނޮމީ ސިޔާސަތާއެކު ރާއްޖޭގެ ސަގާފީ ފަތުރުވެރިކަން ފުޅާކުރެވިދާނެ ގޮތްތަކާ ބެހޭ ގޮތުން ވެސް ދެބޭފުޅުން ވަނީ މަޝްވަރާ ކުރައްވާފައެވެ.
14 ޛުލްޤަޢިދާ 1445
22 މޭ 2024
