ބަތަލުންގެ ޒިކުރާ އާކުރުމަކީ ދިވެހި ފަސްގަނޑަށް އޮތް ލޯބި އާލާވާކަމެއްކަމަށް ރައީސުލްޖުމްހޫރިއްޔާގެ ނައިބު ވިދާޅުވެއްޖެ
އަލިރަސްގެފާނުފަދަ ޤައުމީ ބަތަލުންގެ ޒިކުރާ އެންމެހާ ދިވެހިން އައު ކުރުމަކީ ދިވެހި ފަސްގަނޑަށް އޮތް ލޯބި އާލާވާކަމެއްކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ 1445 ވަނަ އަހަރުގެ ޝަހީދުންގެ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.
ޝަހީދުންގެ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ވިދާޅުވީ ޝަހީދުންގެ ދުވަސް އެ ބޭފުޅަކަށް ހާއްސަވާ އަލިރަސްގެފާނު، އިސްލާމް ދީނާއި ދިވެހި ޤައުމުގެ ދިފާއުގައި ޕޯޗުގީޒުންނާ ދެކޮޅަށް ކުރެއްވި ޖިހާދަކީ އިބުރަތުން ފުރިގެންވާ ޖިހާދެއްކަމަށެވެ. އަދި ގިނަ ދުވަސްތަކެއްގެ މެދުކެނޑުމަކަށްފަހު ރާއްޖޭގައި ޝަހީދުންގެ ދުވަސް ކުލަގަދަގޮތެއްގައި ފާހަގަކުރެވި އަލިރަސްގެފާނުގެ ޒިކުރާ އައު ކުރެވިގެންދާކަމީ އުފާތަކެއް ގެނުވާކަމެއްކަންވެސް އެމަނިކުފާނު ފާހަގަކުރެއްވިއެވެ.
“އަލިރަސްގެފާނުގެ ގުރުބާނީ އަޅުގަނޑުމެން ތާއަބަދަށް ހަނދުމަކުރުމަކީ މި ޤައުމާއި އިސްލާމީ ވަޙްދަތު ޙިމާޔަތްކުރުމަށްޓަކައި ކޮންމެހެން ކުރަންޖެހޭ ކަމެއް. ޝަހީދުންގެ ދުވަހަށް ދޭންޖެހޭ ޚާއްޞަ ދަރަޖަ ދެއްވައިގެން ޤައުމީ ދުވަހެއްގެ ގޮތުގައި މިދުވަސް ފާހަގަކުރައްވަން ފެށްޓެވިކަމަށްޓަކައި ރައީސް ޑރ. މުޢިއްޒަށް ޚާއްޞަ ޝުކުރެއް ދަންނަވަން” ނައިބު ރައީސް ވިދާޅުވިއެވެ.
ނައިބު ރައީސް ވިދާޅުވީ ޤައުމީ ބަޠަލުންގެ ޖިހާދުން ފިލާވަޅާއި ޢިބުރަތް ޙާޞިލުކުރަންޖެހޭކަމަށާއި، އަދި ކޮންމެ ދިވެހި ދަރިޔަކު ވަފާތެރިކަމާއި އަމާނަތްތެރިކަމާއެކު ދިނާއި ޤައުމަށް ޚިދުމަތް ކުރުމަކީ ލިބޭ އުފަލަކަށް ހަދަންޖެހޭކަމަށެވެ. ނައިބު ރައީސްގެ ވާހަކަފުޅުގައި މިއަދުގެ ޅަދަރިންނަކީ މާދަމާގެ މުސްތަޤުބަލަށްވާއިރު، އެ ކުދިންގެ ހިތްތަކުގައި ޤައުމަށް އޮތް ލޯބި އާލާކުރުމަކީ ޤައުމުގެ ސިޔާދަތާއި މިނިވަންކަމަށް ކޮށްދެވޭނެ އެންމެ މަތިވެރި ޚިދުމަތްކަންވެސް ފާހަގަކުރެއްވިއެވެ.
ދިވެހިބަހާއި ސަގާފަތާއި ތަރިކައާ ބެހޭ ވުޒާރާ
4 ޝަޢުބާން 1445
14 ފެބްރުއަރީ 2024
