ބަނގުލަދޭޝުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ހިޒް އެކްސެލެންސީ ޝައިޚް ޢަބްދުލްކަމާލް އާޒާދު ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ ވަޒީރު އާދަމް ނަޞީރު އިބްރާހީމްގެ އަރިހަށް އިޙްތިރާމުގެ ޒިޔާރަތެއް ކުރައްވައިފިއެވެ.
ދިވެހިބަހާއި ސަގާފަތާއި ތަރިކައާ ބެހޭ ވުޒާރާގައި މިއަދު ކުރިއަށް ދިޔަ މި ބައްދަލުކުރެއްވުމުގައި ވާހަކަފުޅުދައްކަވަމުން ބަންގްލަދޭޝް ސަފީރު ވަނީ މި ވުޒާރާއަށް ޒިޔާރަތްކޮށްލެއްވުމުގެ ފުރުޞަތެއް ލިބިވަޑައިގަތުމަކީ ވަރަށް އުފާފުޅުކުރައްވާ ކަމެއްކަމަށާއި، ދިވެހިރާއްޖެ ޤައުމެއްގެ ގޮތުގައި ކުރިއަށް އޮތް މުސްތަޤުބަލު ބިނާކުރުމަށް މި ވުޒާރާގެ މަސައްކަތްތަކަކީ މުހިންމު އަދި ކޮންމެހެން ބޭނުންތެރި މަސައްކަތްތަކަކަށް ވާނެކަމަށް ޤަބޫލުފުޅުކުރައްވާކަމަށް ވިދާޅުވެފައެވެ.
ސަފީރު ހިޒް އެކްސެލެންސީ ޝައިޚް ޢަބްދުލްކަލާމް އާޒާދު މި ވުޒާރާއަށް ޒިޔާރަތްކުރެއްވިކަމީ ވަރަށްއުފާފުޅު ކުރައްވާކަމެއްކަމަށް ފާހަގަކުރައްވަމުން ވަޒީރު އާދަމް ނަޞީރު އިބްރާހީމް ވިދާޅުވީ ޒަމާނުއްސުރެ ދިވެހިރާއްޖެއާ ބަންގްލަދޭޝްއާ ދެމެދު އޮތް ގުޅުމަކީ ބަދަހިގުޅުމެއްކަމަށާއި، ވިޔަފާރީގެ ދާއިރާގައި އޮތް ގުޅުމުގެ އިތުރުން ބަހާއި ސަގާފަތުގެ ގޮތުން ބަލާއިރު ވެސް އިހުޒަމާނުއްސުރެ ގުޅިފައިހުރި ގުޅުންތަކެއް އެބަހުރިކަމަށެވެ. ހަމަ އެހެންމެ ވަކިން ޚާއްޞަކޮށް ރައީސް ޑޮކްޓަރ މުޙައްމަދު މުޢިއްޒު ފަށްޓަވައިފައިވާ ދިވެހި ޤައުމިއްޔަތު އިޢާދަކުރުމުގެ މަޝްރޫޢާ ގުޅިގެން ދިވެހީންގެ ތަރިކަތައް ރައްކާތެރިކޮށް ދެމެހެއްޓުމުގެ ރޮނގުން ބަނގުލަދޭޝްގެ ޢިލްމީ އެހީތެރިކަމަށް އުންމީދުކުރައްވާކަމަށް ވިދާޅުވިއެވެ.
ވުޒާރާގެ މަސައްކަތްތަކާ ގުޅޭ ދާއިރާތަކުން ދެ ޤައުމުގެ ދެމެދުގައި އިތުރަށް ގުޅުން ބަދަހިކޮށް އެހީތެރިކަން ފޯރުކޮށްދެވޭނެ ގޮތްތަކާބެހޭގޮތުން މި ބައްދަލުކުރެއްވުމުގައި ދެބޭފުޅުން ވަނީ ފުޅާދާއިރާއެއްގައި މަޝްވަރާ ކުރައްވާފައެވެ. އެގޮތުން ވަޒީރު އާދަމް ނަޞީރު އިބްރާހީމް ވަނީ ބަންގްލަދޭޝަކީ ސަގާފާތާ ބެހޭ މުހިންމު އެތައް ޢިލްމެއް އޮތް ޤައުމެއްކަން ފާހަގަކުރައްވާފައެވެ. އަދި އެދާއިރާތަކުގައި މި ވުޒާރާގެ މުވައްޒަފުންނަށާއި މި ވުޒާރާގެ ދަށުން އަލަށް އުފެދިގެންދާ ދިރާސާ މަރުކަޒުގެ ދަރިވަރުންނަށް ޢިލްމު ފޯރުކޮށްދެވޭނެ ގޮތްތަކާބެހޭގޮތުން މަޝްވަރާކުރައްވާފައިވެއެވެ.
ސަފީރު ހިޒް އެކްސެލެންސީ ޝައިޚް ޢަބްދުލްކަލާމް އާޒާދު ވަނީ ވަޒީރު އެދިވަޑައިގެންނެވި ގޮތަށް ވުޒާރާއަށް ބޭނުންވާ ޢިލްމީ އަދި ފަންނީ އެހީތެރިކަން ފޯރުކޮށްދެއްވާނެކަމުގެ ޔަޤީންކަން ދެއްވާފައެވެ. އަދި އެމަނިކުފާނު ވަނީ މިހާރުވެސް ބަންގްލަދޭޝްއިން ރާއްޖެއަށް ތަފާތު ސްކޮލަރޝިޕްތަކުގެ ފުރުޞަތުތައް ފަހިކޮށްދެއްމުން ގެންދާކަމަށާއި، އެފަދަ އިތުރު ފުރުޞަތުތައް ރާއްޖެއަށް ފަހިކޮށްދެއްވުމަކީ އެމަނިކުފާނަށް ލިބިވަޑައިގަންނަވާނޭ ވަރަށްބޮޑު އުފާފުޅަކަށްވާނެކަމަށް ވިދާޅުވެފައެވެ.
މީގެ އިތުރަށް ބަންގްލަދޭޝްގެ ސަފީރު ވަނީ ވަޒީރު އާދަމް ނަޞީރު އިބްރާހީމް ދިވެހި ބަހާއި އަދަބިއްޔާތަށް ކުރައްވާފައިވާ އަދި ކުރައްވަމުން ގެންދަވާ ޚިދުމަތްތަކުގެ ވާހަކަ އަޑުއައްސަވާފައިވާކަމަށާއި، އެކަމާމެދު އުފާފުޅުކުރައްވާކަމަށާއި އަދި އެކަމުގައި ކުރިއަށް ވަޑައިގަތުމަށް ހިތްވަރު އަރުއްވާކަމަށް ވިދާޅުވެފައެވެ.
#ދައުލަތުގެޓީމު
1 ޖުމާދަލްއާޚިރާ 1445
14 ޑިސެންބަރު 2023
ދިވެހިބަހާއި ސަގާފަތާއި ތަރިކައާ ބެހޭ ވުޒާރާ
