މި ވުޒާރާގެ ހުރިހާ މުވައްޒަފުންނަށް ޚާއްޞަކޮށް ރޯދައިގެ ރޫޙު-ހުނަރާއި އިތުރު ޤާބިލްކަމުގެ ނަމުގައި ތަމްރީނު ޕްރޮގްރާމެއް ބާއްވައިފިއެވެ.
މި ވުޒާރާގައި ރޭ ބޭއްވި މި ހަފުލާގައި ވުޒާރާގެ މުވައްޒަފުންނަށް ތަމްރީނު ޕްރޮގްރާމް ކުރިއަށް ގެންގޮސް ދެއްވާފައިވަނީ ކުރީގެ މާލީ ވަޒީރު ޑރ. މުޙައްމަދު ޝަފީޤުއެވެ.
މި ތަމްރީނު ޕްރޮގްރާމަކީ ދިވެހި ޤައުމިއްޔަތުގެ ދާއިރާގެ އިދާރީ މަސައްކަތްތަކާއި އަމަލީ މަސައްކަތްތައް ހަލުއިކުރުމާއި ފެންވަރު ރަނގަޅުކޮށް ޚިދުމަތްތެރީންގެ މެދުގައި ގުޅުންތައް ބަދަހިކުރުމަށް މި ވަގުތު ފެށިފައިވާ މަސައްކަތްތަކާ ބެހޭ ތަޢާރަފު ބައްދަލުވުމެކެވެ.
މި ތަމްރީނު ޕްރޮގްރާމްގައި ވާހަކަ ދައްކަވަމުން ޑރ. ޝަފީޤް ވަނީ އާންމު ދިރިއުޅުމުގައި އަދި ވަޒީފާގެ މާހައުލުގައި ގެންގުޅުން މުހިއްމު ސިފަތަކާއި ގުޅިގެން ވާހަކަދައްކަވާފައެވެ. އެގޮތުން އެކަކު އަނެކަކަށް އިޙްތިރާމް ކުރުމާއި ކެތްތެރިކަމާއެކު ކަންކަމާ ކުރިމަރިލެއްވެވުމަށް ޑރ. ޝަފީޤު ވިދާޅުވިއެވެ.
ޝަފީޤުވަނީ ކަންކަން ނިންމުމުގައި އޭގެ ސަބަބުން އެހެން މީހުންނަށް އަދި ތިމާއަށް ވެސް ފަހުން ދިމާވެދާނެ ދަތިތަކަށް ވިސްނުމަށް ވިދާޅުވެފައެވެ. އަދި ވަޒީފާގެ މާހައުލުގަޔާއި އާންމު ދިރިއުޅުމުގައި ކުރާ ކޮންމެ ކަމަކީ ރަނގަޅަށް ވިސްނުމަށްފަހު، ނިންމުންތައް ނިންމުމުގެ މުހިންމުކަމަށް އަލިއަޅުވާލައްވާފައެވެ. އަދި ހަމަ އެހެންމެ ކަންކަން ނިންމުމުގައި އަމިއްލަ މީހާއަށް ވިސްނާލުމުގެ މުހިއްމުކަން ފާހަގަ ކުރައްވާފައެވެ.
މި ހަފުލާގައި ވާހަކަ ދައްކަވަމުން ވަޒީރު އާދަމް ނަޞީރު އިބްރާހީމް ވިދާޅުވީ، ސަރުކާރުގެ މައިގަނޑު ސިޔާސަތަކީ ފާއިތުވި އަހަރަށް ވުރެ އެތައް ގުނައެއް ހަލުވިކޮށް މަސައްކަތްތައް ކުރިއަށް ގެންދެވުން ކަމަށެވެ. އެގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅުތަކުގެތެރޭން މި ވުޒާރާއާ ހަވާލުކުރައްވާފައިވާ މަސައްކަތްތައް، ތާވަލާއެއްގޮތަށް ކުރިއަށް ގެންދެވުމުގެ މަސައްކަތްތައް ކުރަމުން އަންނަ ކަމުގައި ވަޒީރު ވިދާޅުވިއެވެ.
އެގޮތުން މި ވުޒާރާއި ހަވާލުކުރެވިފައިވާ މަސައްކަތްތައް ވީހާވެސް ފުޅާކޮށް އަދި ކުލަ ގަދަކޮށް ފާހަގަ ކުރުމަށް މަސައްކަތް ކުރާ ކަމަށް ވަޒީރު ވިދާޅުވިއެވެ. އަދި މި ވުޒާރާއިން ކުރާ ބައެއް މަސައްކަތްތަކަކީ އެހެން ވުޒާރާތަކާ ގުޅިގެން ނުވަތަ ބައެއް ދާއިރާތަކުގެ ބޭފުޅުންނާއި ގުޅިގެން ކުރާ މަސައްކަތްތަކެއްކަން ފާހަގަ ކުރައްވާފައެވެ. އަދި މިފަދަ ހަރަކާތްތައް ކާމިޔާބު ކަމާއެކީ ކުރިއަށް ގެންދިއުމުގައި މުވައްޒަފުންގެ ގުޅުންތެރިކަމާއި އެހީތެރިކަން ވަރަށް ބޮޑަށް ބޭނުން ވާނެ ކަން ވަޒީރު ފާހަގަ ކުރެއްވި އެވެ.
މި ހަފްލާ ނިންމާލީ ބައިވެރީންނަށް ދެވުނު ޚާއްޞަ ތަރާވީހަކުންނެވެ.