ރާއްޖެ އިސްލާމްވި ދުވަސް
2 ރަބީޢުލްއާޚިރާ
ދިވެހިރާއްޖެ އިސްލާމީ ހިދާޔަތު ލިބިގަތީ ހިޖުރައިން 548ވަނަ އަހަރުއެވެ. މީލާދުން 1153ވަނަ އަހަރުއެވެ. އެންމެ ފުރަތަމަ އިސްލާމްވެވަޑައިގަތީ އޭރުގެ ރަސްގެފާނު ތީމުގޭ މަހާ ކަލަމިންޖާއެވެ. އިސްލާމްވެވަޑައިގަތުމަށް ފަހު، އެ ރަދުންގެ ނަންފުޅަކީ އައްސުލްޠާނު ދަރްމަސް މުޙައްމަދު ބިން ޢަބްދުﷲއެވެ. ދިވެހީންގެ ދޫދޫމަތީން މަޝްހޫރު ނަންފުޅަކީ ދަރުމަވަންތަ ރަސްގެފާނެވެ.
ޝަހީދުންގެ ދުވަސް
1 ޝައުބާން
ދިވެހިރާއްޖެއަށް އިސްލާމީ ހިދާޔަތު ލިބުނުތާ 405 އަހަރު ފަހުން 1558ވަނަ އަހަރު ޕޯޗުގީޒުންގެ އަޅުވެތިކަމުގެ ދަށަށް ރާއްޖެ ދިޔައެވެ. މާތްވެގެންވާ އިސްލާމްދީނާއި ދިވެހި ފަސްގަނޑުގެ ދިފާޢުގައި ޕޯޗުގީޒުންނާ ހަނގުރާމަކުރައްވައި އޭރު ހުންނެވި ރަސްގެފާނު އައްސުލްޠާނު ޢަލީ ހަވަނަ (އަލިރަސްގެފާނު) ޝަހީދުވިއެވެ. ރާއްޖޭގައި ޝަހީދުންގެ ދުވަސް ފާހަގަކުރެވެނީ މި ޒިކުރާތައް އާކުރުމަށެވެ.
ޤައުމީ ދުވަސް
1 ރަބީޢުލް އައްވަލް
އަލިރަސްގެފާނު ޝަހީދުވެ ޕޯޗުގީޒުން މާލޭގެ މައްޗަށް ވެރިވެގަތްތާ 15 ވަރަކަށް އަހަރު ފަހުން މީލާދުން 1573ވަނަ އަހަރު ރާއްޖެ އަލުން މިނިވަންވިއެވެ. އެއީ އުތީމު މަހާރަދުން އައްސުލްޠާނުލްޣާޒީ މުޙައްމަދު ތަކުރުފާނުލްއަޢުޡަމް ސިރީ ސަވާދީއްތަ މަހާރަދުންނާއި އެ ރަދުންގެ އަޚުންނާއި ބައެއް އެކުވެރީން ކުރެއްވި ވަރުގަދަ ޤައުމީ ޖިހާދަކަށް ފަހުއެވެ. ޤައުމީ ދުވަސް ޚާއްޞަ ވަނީ މި ހާދިސާގެ ފިލާވަޅުތަކަށެވެ.
ހުރަވީ ދުވަސް
3 ޖުމާދަލް އާޚިރާ
ޕޯޗުގީޒުންގެ އަޅުވެތިކަމުން ރާއްޖެ ސަލާމަތްވިތާ 179 އަހަރު ފަހުން މީލާދުން 1752ވަނަ އަހަރު އުތުރުކަރައިގެ މަލާބާރީން މާލެ އަރައި މާލެ އެ މީހުންގެ ބާރުގެ ދަށަށްގެނައެވެ. މާލޭގެ އެތަން މިތަނުގައި ހުޅުޖަހައި ދިވެހީންގެ ރަސްގެފާނު ހައްޔަރުކޮށްގެން މަލިކަށް ގެންގޮސް އަވަހާރަކޮށްލިއެވެ. ދެތިން މަހެއް ހައި ދުވަހުގެ ޙިކުމަތްތެރި ރޭވުންތަކަށް ފަހު ދެވުނު ކުއްލި ޖިހާދީ ޙަމަލާއެއްގައި މަލާބާރީން ބަލިކޮށް ރާއްޖެ އަލުން މިނިވަންކުރެއްވީ ދޮންބަންޑާރައިން އައްސުލްޠާނުލްޣާޒީ ޙަސަން ޢިއްޒުއްދީން ސިރީ ކުލަރަންމީބަ ކައްތިރި ބަވަނަ މަހާރަދުންނެވެ. ހުރަވީ ދުވަސް ނިސްބަތްވަނީ މި ރަދުންނަށެވެ.
- 1445 ވަނަ އަހަރުގެ ހުރަވީ ދުވަހުގެ ޚާއްޞަ މައުރަޒު
- ފޮޓޯ ގެލެރީ – ހުރަވީ ދުވަހުގެ ކުޑަކުދިންގެ ހަވީރު
- ފޮޓޯ ގެލެރީ – ހުރަވީ ދުވަހުގެ ޖަލްސާ
- 1445 ވަނަ އަހަރުގެ ހުރަވީ ދުވަހުގެ މުނާސަބަތުގައި ބާއްވާ ކުޑަކުދިންގެ ހަވީރު
- ދިވެހިން އެކަކު އަނެކަކުގެ އަބުރަށާއި ޢިއްޒަތަށް ޙުރުމަތްތެރިކޮށް ހިތުމަށް މަގުދައްކައިދޭން އެބަޖެހޭ –ރައީސުލްޖުމްހޫރިއްޔާ
ޖުމްހޫރީ ދުވަސް
ނޮވެމްބަރު 11
މީލާދުން 1943ވަނަ އަހަރުގެ އެޕްރީލް 7ވަނަ ދުވަހު ރާއްޖޭގެ އޭރުގެ ރަސްގެފާނު އައްސުލްޠާނު ޙަސަން ނޫރައްދީނާއި އެ ރަދުންގެ ބޮޑުވަޒީރު އިސްތިޢުފާ ދެއްވިއެވެ. އޭގެ ފަހުން ރާއްޖޭގެ ރަސްކަމަށް ދިވެހިރައްޔިތުން އިންތިޚާބު ކުރީ ޢަބްދުލްމަޖީދު ރަންނަބަނޑޭރި ކިލެގެފާނެވެ. ކިލެގެފާނު މާލެ ވަޑައިނުގެން މިޞްރުގައި 10ވަރަކަށް އަހަރު ހުންނަވައިފައި މާލެ ވަޑައިގަތް މަގުމަތީގައި ކޮޅުނބުގައި އަވަހާރަވިއެވެ. އޭގެ ފަހުން 1 ޖަނަވަރީ 1953ގައި ރާއްޖޭގައި ދެން އުފެދުނީ ޖުމްހޫރީ ވެރިކަމެކެވެ. ނަމަވެސް އޭގެ ފަހުން އަލުން ރަސްކަމެއް އުފެދި، އެ ރަސްކަމަށް ފަހު 11 ނޮވެންބަރު 1968ގައި ދެވަނަ ފަހަރަށް ޖުމްހޫރީވެރިކަމެއް އުފެދުނެވެ. ޖުމްހޫރީ ދުވަސް ނިސްބަތްވަނީ ދިވެހިރާއްޖެ ރަސްކަމަކުން ޖުމްހޫރިއްޔަތަކަށް ބަދަލުވި މި ތާރީޚީ ހާދިސާއަށެވެ.
މިނިވަން ދުވަސް
26 ޖުލައި
މަލާބާރީންގެ އަޅުވެތިކަމުން ރާއްޖެ ސަލާމަތްވިތާ 135 އަހަރު ފަހުން މީލާދުން 1887ގައި އިނގިރޭސީންގެ ޙިމާޔަތޭ ކިޔުނު އެބަސްވުމެއްގެ ދަށަށް ރާއްޖެ ދިޔައެވެ. މި ކަމުގެ ސަބަބުން އިނގިރޭސި ދައުލަތް ފިޔަވައި ބޭރުގެ އެއްވެސް ދައުލަތަކާ އެއްވެސް މުޢާމަލާތެއްކުރުން ދިވެހި ދައުލަތަށް މަނާވިއެވެ. އިނގިރޭސީންގެ ކިބައިން ރާއްޖެ މިނިވަންވީ 26 ޖުލައި 1965ގައެވެ. ދިވެހިރާއްޖޭގެ މިނިވަން ދުވަސް ނިސްބަތްވަނީ މި ހާދިސާއަށެވެ.
ނަޞްރުގެ ދުވަސް
3 ނޮވެމްބަރު
އިނގިރޭސި އިސްތިޢުމާރުގެ ނުފޫޒުން ރާއްޖެ މިނިވަންވިތާ 23 އަހަރު ފަހުން 1988ވަނަ އަހަރު ދިވެހީންގެ ބަޔަކާއި ބޭރުގެ ހަނގުރާމަވެރި ޓެރަރިސްޓު ޖަމާޢަތަކާ ގުޅިގެން ރާއްޖެއަށް ޢުދުވާނީ ޙަމަލާއެއްދިނެވެ. މި ހަނގުރާމައިގައި ބޭރުން އައި މީހުންކުރެ އަތުލެވުނު މީހުންނަކީ ސްރީލަންކާގެ ޤާނޫނީ ސަރުކާރާ ދެކޮޅަށް އެ ދުވަސްވަރު ހަނގުރާމަކުރަމުން ދިޔަ ޖަމާޢަތެއްގައި ހިމެނޭ ބައެކެވެ. އެއީ ޓެމިލް އީލާމެވެ. ދިވެހި ސިފައިންގެ ހަމަލާތައް އަމާޒުވިތާ ގާތްގަނޑަކަށް 10ވަރަކަށް ގަޑި އިރުގެ ތެރޭގައި ދުޝްމަނުން ބަލިކޮށްލެވިއްޖެއެވެ. މި ދުވަސް ފާހަގަކުރެވެނީ ނަޞްރުގެ ދުވަހުގެ ގޮތުގައެވެ.
ދިވެހިބަހުގެ ދުވަސް
14 އެޕްރީލް
ދިވެހި ޤައުމުގެ އެންމެ އިސް ފާހަގައަކީ ދިވެހި ބަހެވެ. ދިވެހީންނަށް ދިވެހީންނޭ ކިޔެނީ ދިވެހިބަހުގެ ސަބަބުންނެވެ. ދިވެހީން ވަކި ޤައުމަކަށް ވީ ވެސް ދިވެހިބަހުގެ ސަބަބުންނެވެ. ދިވެހިބަހަށް ޚިދުމަތްކުރެއްވި އަދީބުންކުރެ އެންމެ އުފެއްދުންތެރި އަދީބަކީ އަދި ދިވެހި އަދަބުގެ ފަތިހުގެ ތަރިއަކީ ފަޟީލަތުއްޝައިޚު ޙުސައިން ޞަލާޙުއްދީނެވެ. އެމަނިކުފާނަކީ ދައުލަތުން ދެއްވި މުސާރަފުޅަކާ ނުލައި އަމިއްލަފުޅަށް މަދަރުސާއެއް ހިންގަވައި ދިވެހިއަދަބަށް އެތައް ރޮނގަކުން ޚިދުމަތްކުރައްވައިފައިވާ ބަހުގެ އިސް އެދުރެކެވެ. ކޮންމެ އަހަރަކު ވެސް އެޕްރީލު 14ވަނަ ދުވަސް ދިވެހިބަހުގެ ދުވަހުގެ ގޮތުގައި ފާހަގަކުރެވެނީ އެމަނިކުފާނުގެ ޚިދުމަތުން އިލްހާމު ލިބިގަނެ ދިވެހިބަހަށް ދިރުން ގެންނައުމަށް ޓަކައެވެ.
ޤައުމީ އެއްބައިވަންތަކަމުގެ ދުވަސް
26 ޑިސެމްބަރު
އަސޭކަރައިގެ ކައިރިން ކަނޑުގެ އަޑިއަށް ރެކްޓަރު މިންގަނޑުން 9.1 އާއި 9.3އާ ދެމެދުގެ ބާރުގަދަ ބިންހެލުމެއް 2004ވަނަ އަހަރުގެ ޑިސެންބަރު މަހު 26ވީ އާދީއްތަ ދުވަހުއަށެވެ. މި ބިންހެލުމާ ގުޅިގެން އުފެދުނު ސުނާމީގެ ރާޅު ރާއްޖެއަށް ފޯރައި ބޮޑެތި ގެއްލުންތައް ވިއެވެ. 82 މީހުން މަރުވެ 26 މީހަކު ވީ ގޮތެއް ނޭނގި ގެއްލިފައިވެއެވެ. މި ކަމާގުޅިގެން މީހުންނާ އެހީތެރިވުމުގައި ދިވެހީން ދެއްކީ އެއްބައިވަންތަކަމާއި އަޚްވަންތަކަމުގެ މަރަށް މަތިވެރި ނަމޫނާއެވެ. ޤައުމީ އެއްބައިވަންތަކަމުގެ ދުވަސް ފާހަގަކުރެވެނީ މި ކަމުގެ ހަނދާނުގައެވެ.
ދިވެހި ޤައުމިއްޔަތު ދިރުވާ އާލާކުރުމުގެ ދުވަސް
6 މާރިޗު
ޤައުމިއްޔަތަކީ ޤައުމެއްގެ އަސްލުތަކާ ސަލާމަތް ދިފާޢުކުރުމަށް ޓަކައި އެ ޤައުމެއްގެ ބަޔަކު ކުރާ ވަކާލާތެކެވެ. ކޮންމެ ޤައުމެއްގެ ވެސް ދެމި އޮތުން ބިނާވެފައި އޮންނަނީ އެ ބަޔަކާއި އެ ބަޔަކު ދިރިއުޅޭ ތަނަކާ ދެމެދު އުފެދޭ ހަރުދަނާ ބަދަހި ގުޅުމެއްގެ މައްޗަށެވެ. މި ގުޅުން ވާން ޖެހޭނީ ބުއްދީގެ ހަމަތަކުން މިންކުރެވޭ ގުޅުމަކަށެވެ. އެ ފަދަ ހަމަތަކެއްގެ ބިންގާ މަތީގައި އުފެދޭ ޤައުމީ ޝުޢޫރު ޤައުމުގައި އިޙްތިރާމާއި ޤަދަރު އާލާކުރާނެއެވެ. ޞުލްޙައާއި ލޯބި ދިރުވާނެއެވެ. ދީނާއި އަޚްލާޤު ނަގަހައްޓާނެއެވެ. ދިރިއުޅޭ ވަޒަނާއި ބިމާއި ފަސްގަނޑު ސަލާމަތްކުރާނެއެވެ. ތަހުޒީބު ޙަޟާރަތެއް ޤާއިމުކުރާނެއެވެ. 6 މާރިޗުގައި ފާހަގަކުރެވޭ ދިވެހި ޤައުމިއްޔަތު ދިރުވައި އާލާކުރުމުގެ ދުވަސް އެއީ މި ފަދަ ހުރިހައިކަމަކަށް ޓަކައި ފާހަގަކުރެވޭ ދުވަހެވެ.