ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޢިއުލާނު ކުރައްވާފައިވާ ޣާޒީ ބަންޑާރައިންގެ އަސަރުތަކުގެ އަސްލު ނުގެއްލޭ ގޮތަށް ހިމާޔަތްކުރުމަށާއި، މާއްދީ އެހެން ތަރިކަތައް ހިމާޔަތްކޮށް ދެމެހެއްޓުމާއި، ތަރިކައިން އާމުދަނީ ހޯދުމުގެ ސިޔާސަތުގެ ދަށުން ހއ. އުތީމު ތަކަންދޫ ބާރަށް ހިމެނޭހެން ތަރައްޤީކުރެވޭ މަޝްރޫޢަކީ ރާއްޖޭގައި ތަރިކައިގެ ދާއިރާއިން މިހާތަނަށް ހިންގޭ އެންމެ ބިޔަ މަޝްރޫޢުކަމުގައި ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ.
ހއ.ކެލާ ރަށްވެހި އާސާރު ތަރައްޤީކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތަށް ފަހު، ވުޒާރާގެ މަޝްރޫޢުތަކާ ބެހޭ ގޮތުން މީޑިޔާއިން ދެންނެވި ސުވާލަކަށް ޖަވާބު ދެއްވަމުން ވަޒީރު ވިދާޅުވީ ދިވެހިރާއްޖޭގެ ތާރީޚުގައި މިހާތަނަށް ހިންގާފައި ނުވާ ފަދަ ތަފާތު މަޝްރޫޢަކަށް މި މަޝްރޫޢު ވެގެންދާނެ ކަމަށެވެ. މިކަމާ ބެހޭ އިތުރު ތަފުސީލު ހިއްސާކުރައްވަމުން ވަޒީރު ވިދާޅުވީ މި މަޝްރޫޢުގެ ތެރޭގައި އިޤްތިޞާދީ ބަޔަކާއި، އިއާދަކުރުމުގެ ބަޔަކާއި، ޒަމާނީ ޓެކްނޯލޮޖީގެ ބަޔަކާއި، ދިވެހީންގެ ދިރިއުޅުމުގެ ބައެއްގެ ގޮތުގައި ތަރިކަ އަލުން ހިމެނުން އެކުލެވިގެންވާނެއެވެ. އެގޮތުން ރައީސްގެ މި މަޝްރޫޢުގެ ތެރެއިން ތިން މަޤުސަދެއް ހާސިލްވާނެ ކަމުގައި ވަޒީރު ފާހަގަ ކުރެއްވިއެވެ. އަދި މި މަސައްކަތުގެ އަދާހަމަ ގޮތުގައި ވިދާޅުވެފައިވަނީ މި މަސައްކަތުގެ ކޮންސެޕްޓް ޑިޒައިން ކުރުމުގެ މަސައްކަތް ކުރެވެމުންދާ ކަމަށެވެ.
މި މަޝްރޫޢުގެ ދަށުން އަމަލީ މަސައްކަތްތަކަށް ބޭނުންވާ މަޢުލޫމާތު އެއްކުރުމަށްޓަކައި 2025 ފެބުރުވަރީ 25އިން 2025 ފެބުރުވަރީ 28އަށް ހއ އުތީމު، ހއ ތަކަންދޫ އަދި ހއ ބާރަށަށް ފަތުރުވެރިކަމާ ބެހޭ ވުޒާރާރާއާއި، އިޤުތިޞާދީ ކަންކަމާ ބެހޭ ވުޒާރާއާ މި ވުޒާރާ ގުޅިގެން ވަނީ ޚާއްޞަ ދަތުރެއްކޮށް ރަށްރަށުގެ ރައްޔިތުންނާއި ކައުންސިލްތަކުގެ ޚިޔާލާއި މަޝްވަރާ ހޯއްދަވައިފައެވެ.
