ޤައުމީ އެއްބައިވަންތަކަމުގެ ދުވަހުގެ ސުކޫތުގައި ރައީސުލްޖުމްހޫރިއްޔާ ބައިވެރިވެވަޑައިގެންފި.

ޤައުމީ އެއްބައިވަންތަކަމުގެ ދުވަސް ފާހަގަކުރުމުގެ ގޮތުން މިއަދު ހެނދުނު ގެނައި ސުކޫތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ބައިވެރިވެވަޑައިގެންފިއެވެ.

ސުނާމީގެ ރާޅު 2004 ވަނަ އަހަރު ރާއްޖެއަށް އެރިކަމަށް ރިކޯޑްކުރެވިފައިވާ ގަޑިކަމުގައިވާ ހެނދުނު 9:23ގައި ގެނައި ހަމަހިމޭންކަމުގެ މި ވަގުތުކޮޅުގައި ބައިވެރިވެވަޑައިގެންނެވުމަށް ރައީސުލްޖުމްހޫރިއްޔާ ނިކުމެވަޑައިގެންނެވީ ރައީސުލްޖުމްހޫރިއްޔާގެ އޮފީހުގެ ދެކުނުން، ކުރީގެ ހުރަވީ ބިލްޑިންގ ހުރި ސަރަޙައްދަށެވެ. ރައީސުލްޖުމްހޫރިއްޔާގެ އަރިހުގައި ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމާއި ސަރުކާރުގެ އެހެނިހެން ވަޒީރުންނާއި ސަރުކާރުގެ އިސްބޭފުޅުންނާއި ވެސް މި ސުކޫތުގައި ބައިވެރިވެވަޑައިގެންނެވިއެވެ. އަދި މާލެ ސަރަޙައްދުގެ އޮފީސްތަކުގެ މުވައްޒަފުންވެސް އޮފީސްތަކުން ބޭރަށް ނުކުމެވަޑައިގެން މި ސްކޫތުގައި ބައިވެރިވެވަޑައިގެންނެވިއެވެ.

މިއަދުގެ މުނާސަބަތުގައި ކުރިއަށް ގެންދިއުމަށް ރާވާފައިވާ އިތުރު ހަރަކާތްތަކުގެ ތެރޭގައި ދިވެހި މަލާފަތާއި ކޭމާއި ތަށިބަރިފަދަ ހަދިޔާ އެއް ރަށުން އަނެއް ރަށަށް ފޮނުވުމުގެ ހަރަކާތެއް މުޅި ރާއްޖޭގައި ކުރިއަށް ގެންދިއުމަށް ވަނީ ރާވާފައެވެ. މިއީ ދިވެހީންގެ ޒަމާންވީ އެއްބައިވަންތަކަން ރަމްޒުކޮށްދިނުމުގެގޮތުން ކުރިއަށްގެންދާ ހަރަކާތެކެވެ. އެއް ރަށުން އަނެއް ރަށަށް ހަދިޔާ ފޮނުވުމުގެ އިންތިޒާމު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ ލިމިޓެޑް، އެމްޓީސީސީގެ އާރުޓީއެލް ފެރީގެ ނިޒާމު މެދުވެރިކޮށް އެ ކުންފުނިން ހަމަޖައްސާފައެވެ. މިއީ ރަށްރަށުގެ ހުރިހާ ރައްޔިތުން ބައިވެރިވާގޮތަށް ކުރިއަށްގެންދާ ހަރާކާތެކެވެ.

އެއްބައިވަންތަކަމުގެ ދުވަހާ ގުޅުވައިގެން ނެޝަނަލް ޑިޒާސްޓަރ މެނޭޖްމެންޓް އޮތޯރިޓީ، އެންޑީއެމްއޭއިން ސުނާމީގެ ހަނދާންތައް ދައްކުވައިދޭ ފޮޓޯ މައުރަޒެއް ބޭއްވުމަށް ވެސް ވަނީ ހަމަޖެހިފައެވެ. މި މައުރަޒު ހުޅުވުން އޮންނާނީ މިއަދު ހެނދުނު 11:00 ޖަހާއިރުއެވެ.

ސުނާމީ ކާރިސާއަށް މިއަދު 20 އަހަރު ފުރޭއިރު، މި ހިތާމަވެރި ކާރިސާގެ އަސަރު ރާއްޖޭގައި މީހުން ދިރިއުޅޭ 9 ރަށެއް ފިޔަވައި އެހެން ހުރިހާ ރަށަކަށް ކޮށްފައިވެއެވެ. އަދި 82 ދިވެހީން ނިޔާވެ، 26 ދިވެހީން ވީނުވީއެއް ނޭނގި ގެއްލިފައިވެއެވެ. އަދި 15000 މީހުންގެ ގެދޮރު ވަނީ ގެއްލިފައެވެ. އެދުވަހު ހާލުގައިޖެހުނު ފަރާތްތަކަށް އެހީވުމުގައި ދިވެހީން ދައްކުވައިދިން ހިތްވަރާއި ވިލުންތެރިކަން ފާހަގަ ކުރުމުގެ ގޮތުން ކޮންމެ އަހަރެއްގެ ޑިސެންބަރުމަހުގެ 26 ވަނަ ދުވަސް، ޤައުމީ އެއްބައިވަންތަކަމުގެ ދުވަހުގެ ގޮތުގައި ދަނީ ފާހަގަކުރަމުންނެވެ.

25 ޖުމާދަލްއާޚިރާ 1446

26 ޑިސެންބަރު 2024